Ñee rusisaca Dios stipa ni runi binni para gusiecheʼ laa la? Nuu binni na coʼ, purtiʼ laacabe nácabe qué rizaaláʼdxibe laanu. Peru modo riníʼcabe ca rusihuínnicabe malu Dios. Biblia na rusisaca Jiobá stipa runi ca xpinni. Guidúʼyanu ni na ca diidxaʼ guníʼ apóstol Pablu ni zeeda lu Hebreos 11:6.

Xi caquiiñeʼ gúninu para gusiéchenu Jiobá yaʼ. Pablu bicaa ca diidxaʼ riʼ: «Qué zanda guni binni ni riulaʼdxi Dios pa qué runi cre» laabe. Cadi na diʼ apóstol Pablu «nagana» ni, sínuque guniʼbe «qué zanda». Ni nabe raríʼ nga naquiiñeʼ guni crenu Dios para ganda gusiéchenu laa.

Yanna, ximodo rusihuinni binni runi cré yaʼ. Nuu chupa modo gusihuínninu ni. Primeru la? napa «xidé guni cre cabe nuu be», purtiʼ qué zanda diʼ gusiéchenu Dios pa qué runi crenu nuube. Peru cadi ngasi nga ni naquiiñeʼ gúninu purtiʼ dede ca demonio ca runi crecaʼ nuu Dios (Santiago 2:19). Ora laanu runi crenu dxandíʼ nuu Dios la? zucaa nga laanu gúninu ni riuulaʼdxiʼ Dios, o guibáninu modo riuuláʼdxibe (Santiago 2:20, 26).

Ne guiropa la? naquiiñeʼ guni crenu «rulabi be cani uyubi laabe», o riguube ndaayaʼ laacaʼ. Binni ni napa fe la? nanna dxichi «cadi pur gana si cayuni» stipa para guibani modo riuulaʼdxiʼ Dios (1 Corintios 15:58). Ñee zanda xa gusiéchenu Dios pa qué guni crenu racaláʼdxibe uguube ndaayaʼ laanu o qué zanda gúnibe ni (Santiago 1:17; 1 Pedro 5:7). Pa riníʼ íquenu cadi nachaʼhuiʼ Dios, qué rusisácabe laanu o qué rizaaláʼdxibe laanu la? qué liica runibiaʼnu laabe.

Tuu nga cani riguu Dios ndaayaʼ yaʼ. «Cani uyubi laabe», na Pablu. Ti libru ni riquiiñeʼ ca binni ni rutiixhi Biblia na, diidxaʼ ni biquiiñecabe lu griegu para «uyubi laabe» ca, qué riníʼsini «racalaʼdxiʼ binni guidxelaʼ xiixa», sínuque ruyubi laabe para guni «adorar laabe». Sti libru na, diidxaʼ ni biquiiñecabe racá, riniʼni guyubi lele binni xiixa ne gúnini de guidubi ladxidóʼ. Nga runi, riguu Jiobá ndaayaʼ ca binni ni rucaa fe sticaʼ laacaʼ guni adorarcaʼ laabe purtiʼ de guidubi ladxidoʼcaʼ nadxiicaʼ laabe (Mateo 22:37).

Xi ndaayaʼ zudii Dios cani runi adorar laa yaʼ. Ti premiu nabé risaca ni rusihuinni pabiáʼ nacháʼhuibe ne nadxiibe binni: zabánicaʼ ndaaniʼ ti paraísu lu Guidxilayú riʼ sin qué chuʼ dxi gáticaʼ (Apocalipsis 21:3, 4). Dede ca yanna nabé caguu Dios ndaayaʼ ca binni ni cuyubi laa de guidubi ladxidóʼ. Espíritu santu stiʼ Dios ne Stiidxabe cayacané laacabe guibánicabe galán ne nayecheʼ (Salmo 144:15; Mateo 5:3).

Casi maʼ bidúʼyanu ca, rusisaca Jiobá Dios ni runi ca xpinni ni runi adorar laa. Nga naquiiñeʼ gucaa laanu guidxíñanu laabe. Ñuuláʼdxiluʼ ñannuʼ ximodo zanda gapuʼ fe ni riuulaʼdxiʼ Dios ti uguu ndaayaʼ lii la?