Pa nápaluʼ xiiñiluʼ ni maʼ ziniisi, ca guendanagana ni gapaneluʼ laabe zusihuinni cani pabiáʼ nannuʼ gusiniisiluʼ xiiñiluʼ... ne pa napuʼ paciencia. Sicaríʼ guníʼ Maria, ti gunaa ni nabeza Brasil ne napa ti xiiñidxaapaʼ de 14 iza: «Riguiʼbaʼ ti guí naa ora qué riná xiiñeʼ guzuubaʼ stiidxaʼ. Guirópadu ridxiichidu ne rindísadu ridxi». Carmela, ti gunaa de Italia, zacaca nuuné xiiñiʼ. Laabe guniʼbe sicaríʼ: «Naa ne xiiñeʼ nabé ridinde diidxadu, dede rindísadu ridxi, ne oraruʼ guideguyoobe ndaaniʼ xcuártube riuʼdxidu».

Xiñee nabé naduxhuʼ ca hombrehuiiniʼ ne ca dxaapahuiiniʼ ca yanna. Ñee zacá laacabe purtiʼ maʼ gucuá xpiaʼ ca xhamígucabe laacabe la? Zándaca. Biblia na ca binni ni guidxaaganu zanda gucaacaʼ laanu gúninu ni jneza o cosa malu (Proverbios 13:20; 1 Corintios 15:33). Nuu stale cosa ni rucaa ca hombrehuiiniʼ ne ca dxaapahuiiniʼ ca gucaalucaʼ bixhózecaʼ ne jñaacaʼ, casi cani ridiʼdiʼ lu televisión.

Peru nuu xcaadxi cosa ni naquiiñeʼ gánnaluʼ, ne nga zacané lii cadi gaca nagana para lii guiéneluʼ xiiñiluʼ. Guidúʼyanu caadxi de laacani.

Sicaríʼ bicaa apóstol Pablu: «Dxi guca xcuidi la? unié casi riníʼ xcuidi, uníʼ ique casi riníʼ ique xcuidi ne biene biaʼ riene xcuidi. Peru dxi ma biniise bisaana irá enda xcuidi que» (1 Corintios 13: 11). Ca diidxaʼ ca rusihuínnicani gadxé modo riníʼ ique ca xcuidihuiiniʼ ne gadxé modo riníʼ ique cani huaniisi. Guidúʼyanu ximodo.

Ni nanna si ca xcuidihuiiniʼ ca nga nuu cosa galán ne nuu cosa malu. Peru ora nuu xiixa cosa nagana para guiene binni la? ti ni huaniisi rindaa ique né ni ti ganda guiene ne ganna gunáʼ nga ni jma jneza guni. Casi pa caníʼ íquebe gúnibe xiixa la? zuuyaʼ chaahuibe pa jneza gúnibe ni ne zaníʼ íquebe pa zacaneni sti binni. Cani huaniisi maʼ biaacaʼ gúnicaʼ zacá, peru cani nahuiiniʼ caziidirucaʼ.

Biblia cayabi cani nahuiiniʼ gánnacaʼ «guiníʼ íquecaʼ jneza» (Proverbios 1:4). Ne Biblia cayabi ca xpinni Cristu gánnacaʼ guná nga ni jneza ne gunáʼ nga ni cadi jneza (Hebreos 5:14). Nga runi, ora maʼ runi cani nahuiiniʼ ca zacá zándaca zadinde diidxanécabe bixhózecabe ne jñaacabe pur intiica si cosa ni huaxiéʼ risaca. O zándaca guiníʼcabe xiixa ni cadi jneza (Proverbios 14:12). Pa guizaaca nga, xi zanda gúniluʼ ti gacaneluʼ xiiñiluʼ guiziidiʼ guiníʼ ique sin tinde diidxatu yaʼ.

Peru cadi guiaandaʼ ndiʼ lii: ora gacaneluʼ xiiñiluʼ guiníʼ ique, cadi guicaluʼ tema gaca ni naluʼ. Neca rábiluʼ cadi cucaadiaga xiiñiluʼ lii la? zándaca stale de cani guiniʼluʼ ziaananebe ne neca cadi guiniʼbe biaʼsi cani gúdxiluʼ laabe. Cadi guidxagayaaluʼ pa despué de tiidiʼ chupa chonna dxi guiníʼ xiiñiluʼ jneza ni guniʼluʼ que o dede guiniʼbe laabe ngue guniʼbe gácani zaqué.

«Guyuu biaje gudinde diidxadu pur intiica si cosa, casi ora gabeʼ laabe gánnabe iquiiñebe xiixa cosa, o cadi guchiichibe bizáʼnabe. Peru stale biaje ni racaláʼdxisibe nga guinabadiidxaʼ laabe xi riníʼ íquebe, ne ñuneʼ stipa pur ñeneʼ laabe ne ñabeʼ laabe: “Yanna nga nga cayácaluʼ pue”, o “Nga nga ni caníʼ íqueluʼ pue”. Yanna ruʼ rabeʼ pa niniéʼ zacá la? qué nidinde diidxadu.» (Kenji, Japón.)

Ti cosa ni nabé risaca guni ti binni ni cusiniisi xiiñiʼ nga gacané laabe chuʼbe listu para dxi guireebe de ralídxibe ne maʼ guibánibe stúbibe (Génesis 2:24). Para nga naquiiñeʼ gacané binni xiiñiʼ ganna ximodo gaca, nga runi naquiiñeʼ gusiidiluʼ laabe gápabe caadxi guenda galán, guiníʼ íquebe jneza ne gúnibe stale cosa ni gusihuinni ximódopeʼ nga laabe. Ora chuʼ tu gucaa ni nahuiiniʼ ca guni cosa malu, pa maʼ biziidibe guiráʼ ni guninu ca la? zaníʼ íquebe xi zazaaca pa gúnibe xiixa ne zaníʼ íquebe: «Ximódopeʼ naa yaʼ. Ñee runeʼ ni jneza la? Xi ñuni ti binni ni nanna guni ni jneza pa nidiʼdiʼ ra cadideʼ riʼ yaʼ» (2 Pedro 3:11).

Biblia ruzeeteʼ de ti hombrehuiiniʼ ni láʼ José ne maca nanna xi naquiiñeʼ guni. Ora gunabaʼ xheelaʼ Potifar laabe gatanebe laa, guniʼbe sicaríʼ: «Qué zanda diʼ guneʼ guendaquéiquiiñeʼ riʼ ne gucheeniáʼ Dios pur laani» (Génesis 39:9). Nécapeʼ gastiʼ diʼ ti ley ra caníʼ cadi naquiiñeʼ chuʼné binni ni cadi xheelaʼ la? biene José ximodo ruuyaʼ Dios ni. Ne ora guniʼbe ca diidxaʼ («Qué zanda diʼ...») bisihuínnibe riníʼ íquebe casi riníʼ ique Dios (Efesios 5:1).

Yanna xiiñiluʼ laaca deruʼ nga cahuinni ximódopeʼ nga laabe, nga runi guiráʼ ni guiziidibe zacanécani laabe gánnabe xi naquiiñeʼ gúnibe ora gucaa ca xhamígube laabe gúnibe ni cadi jneza (Proverbios 1:10-15). Peru pur deruʼ cahuinni ximódopeʼ laabe zándaca gucaalube lii. Xi zanda guʼnuʼ ora guizaacaluʼ nga yaʼ.

 Ora maʼ cahuinni ximódopeʼ chigaca cani nahuiiniʼ ca, rusihuínnicabe xii nga ni runi crécabe, ne zacané ni laacabe. Lu Biblia na cadi naquiiñeʼ chinanda ca xpinni Cristu «intiica nacubi ni canausiidi binni, casi runi xcuidi, ti dxi rarí, sti dxi raricaʼ» (Efesios 4:14). Nga runi, galán gacaneluʼ xiiñiluʼ ganna ximodo gaca.

«Ora guʼyaʼ ca xiiñedxaapaʼ rucaadiaʼgaʼ laacaʼ la? laaca rinacaʼ gucaadiágacaʼ naa, neca gadxé ni riníʼ íquecaʼ. Ne riuuaʼ cuidadu cadi gucaa laacabe guiníʼ íquecabe cásica riníʼ iqueʼ; lugar de guneʼ zacá rudieeʼ lugar guiníʼcabe xi riuuláʼdxicabe.» (Ivana, República Checa.)

Cásica nanna ca xcuidihuiiniʼ zuni bixhózecaʼ ne jñaacaʼ ni racaláʼdxicaʼ pa guicacaʼ tema la? zacaca runi ca hombrehuiiniʼ ne ca dxaapahuiiniʼ. Pa runi ca xiiñiluʼ lii zacá la? guyuu cuidadu. Dxandíʼ maʼ qué zaziñe ca xiiñiluʼ lii pa gúniluʼ ni nacaʼ, peru ndiʼ nga ni zaníʼ íquecabe: «Zúnibe ni rabeʼ pa siñe laabe». Peru xi zanda guʼnuʼ yaʼ. Yenanda conseju bidii Jesús ora guníʼ: «Ora riníʼ tu la? lainíʼ “ya” pa huandí zuni tu ni, o pa qué zuni tu ni la? lainíʼ “coʼ”» (Mateo 5:37). Maʼ qué zaziñe xiiñiluʼ lii pa nanna zúniluʼ ni guniʼluʼ.

Peru laaca naquiiñeʼ gácaluʼ naguudxi. Bidii lugar gabi xiiñiluʼ lii xiñee ñuulaʼdxiʼ nudiiluʼ lugar laa ñuu yoo xcaadxi huadxí. Pa gudii lugar laabe gúnibe ni canábabe lii la? qué zusihuinni diʼ nga cucaabe lii guʼnuʼ ni nabe; ni cayunisiouʼ nga zinanduʼ conseju riʼ: «Lagaca nachaʼhui [o «binni riene», Traducción del Nuevo Mundo] dede izaabi stiidxa tu», o ganna binni ni (Filipenses 4:5).

Peru naquiiñeʼ gánnanu laaca ruchee bixhoze binni ne jñaa casi na Biblia: «Irá nu ruchéʼ nu» (Santiago 3:2). Pa gudiiluʼ cuenta runi lii nga maʼ cadinde diidxatu la? gunabaʼ xiiñiluʼ gutiidilaʼdxiʼ stóndaluʼ. Pa guiniʼluʼ dxandíʼ bicheeluʼ la? zusiidiluʼ xiiñiluʼ qué rudxiibaluʼ laca lii ne zaziidibe gúnibe casi cayúniluʼ.

«Ora maʼ biluxe gudinde diidxadu, ne maʼ cadi cadxiicheʼ la? rinabaʼ xiiñeʼ gutiidilaʼdxiʼ naa purtiʼ nabé bidxiicheʼ. Nga racané laabe maʼ cadi guidxiichibe ne randa ruidu diidxaʼ galán.» (Kenji, Japón.)