Lu beeu diciembre rihuinni lu guidubi naca Guidxilayú stale dibuju ra gule Jesús ndaaniʼ ti currá ne laaca zacaca rúnicabe ora riguíxhecabe niñu. Peru ñee jneza nga guiníʼ íquenu naca Jesús ti baʼduriʼniʼ dede yanna la?... * Cadi jneza diʼ guiníʼ íquenu zacá. Xiñee yaʼ. Zánnanu ni ora guietenaláʼdxinu ni bizaaca caadxi pastor ti gueelaʼ dxi cayápacaʼ dendxuʼ sticaʼ gaxha de Belén.

Biiyaʼ ca pastor que ti ángel ni gudxi laacaʼ: «Yanadxí gule tobi ni ulá [...] ne laabe nga Cristu Señor». De raqué gudxi ángel que laacabe zadxélacabe «ti badu huiini renda lari nexhe ndaani ti cajón ra ro mani guixi». Ora guca nga bihuinni xcaadxi ángel ne bizulú bisisácacaʼ Dios.

Ximodo ñuni sentirluʼ pa ñunadiágaluʼ ca ángel que cusisácacaʼ Dios yaʼ... Nabé biecheʼ ca pastor que ne guniʼcaʼ sicaríʼ: «Chuu Belén, chu duʼya ni guca raqué, ni bisenda tidxi Dios laanu riʼ». Raqué biiyacabe «José ne María ne badu huiini que nexhe ndaani ti cajón ra ro mani guixi».

Qué nindaa de ngue guyeruʼ xcaadxi binni Belén. Ora gudxi ca pastor que laacabe ni bizaaca la? nabé bidxagayaacabe. Ñuuláʼdxiluʼ niziidiluʼ guiráʼ cosa sicarú riʼ de Jesús la?... Guiráʼ cani nadxii Dios riuuláʼdxicaʼ gánnacaʼ ni. Yanna guidúʼyanu xiñee biecheʼ ca binni que ora gúnnacaʼ maʼ gule Jesús. Ne para gánnanu ni guietenaláʼdxinu dxi caʼruʼ guichaganáʼ María.

Ti dxi yeganna ángel Gabriel María ne gúdxibe laa chigapa ti baʼduhuiiniʼ. Laaca gudxi ángel que laabe risaca baʼduhuiiniʼ que ne zábicabe laa «Xiiñi Dios ni nuu ibáʼ». Despué zácabe rey ne qué ziuu dxi guiluxe reinu stibe.

Racalaʼdxiʼ María ganna ximodo ndiʼ gacaxiiñiʼ pa qué huayuu dxi gatané ti hombre. Gabriel bisiene laabe: «Zutaagu enda nandxóʼ sti Dios lii» ne «zaree  chu badu huiini ca para Dios, ne zabi cabe laa Xiiñi Dios». Chiguni Jiobá ti milagru: chicaabe guendanabani stiʼ Xiiñibe, ni nuu guibáʼ, ne chinduube laa ndaaniʼ matriz stiʼ María para guiroobaʼ casi riroobaʼ guiráʼ baʼduhuiiniʼ.

Ñee maʼ biiyuʼ rihuinni chonna «rey magu» ni ziganna Jesús lu ca dibuju riquiiñeʼ binni lu Navidad ne ora riguíxhecaʼ niñu la?... Peru cadi zacá diʼ nga gúcani. Ca «rey magu» que la? astrólogo laacabe, ne qué riuulaʼdxiʼ Jiobá dxiiñaʼ ni rúnicabe. Guidúʼyanu xi guca dxi yendácabe ra nuu Jesús. Biblia na: «Ora biuu cabe ndaani yoo, biiya cabe badu huiini que ne María jñaa». Ngue runi, maʼ cadi ti baʼduriʼniʼ ni deruʼ gule laabe ne laaca cadi nexhedibe ra ro maniʼ guixi; maʼ ti baʼduhuiiniʼ laabe ne maʼ nabezanebe José ne María ra lídxicabe.

Nannuʼ ximodo bidxela ca astrólogo que Jesús la?... Yenándacabe ti biaaniʼ ni ruluíʼ ti beleguí. Peru ante chiné «beleguí» que laacabe Belén, yeneni laacabe Jerusalén, ra nuu rey Herodes. Ne Biblia na racalaʼdxiʼ Herodes guidxela Jesús para guuti laabe. Yanna, tu bicaa «beleguí» ca racá yaʼ... Cadi Dios diʼ; sínuque Binidxabaʼ, xhenemígube.

Racalaʼdxiʼ Binidxabaʼ guni cré binni nácaruʼ Jesús ti baʼduhuiiniʼ ni deruʼ gule. Peru bietenalaʼdxiʼ ni gudxi ángel Gabriel María: «Zaca be rey [ne] qué ziuu dxi guiaana dxí be de guni mandar be». Maʼ naca Jesús rey guibáʼ ne maʼ cadi candaa zunitilube guiráʼ ca xhenemigu Dios. Zacá nga naquiiñeʼ guidúʼyanu laabe, ne ngapeʼ nga ni naquiiñeʼ gusíʼdinu binni.