Ñee runi creluʼ ziasa cani maʼ guti casi na Biblia la? * Ora guiníʼ íquenu zadúʼyanu ca binni ni nadxiinu sti biaje rusiecheʼ nga laanu. Peru, ñee zanda guni crenu nga la? Para guicábinu ni gunabadiidxanu riʼ guidúʼyanu ejemplu stiʼ ca apóstol stiʼ Jesús.

Ca apóstol que biʼniʼ crecaʼ dxandíʼ ziasa binni de lade gueʼtuʼ. Xiñee yaʼ. Nuu chupa razón. Primé la? biʼniʼ crécabe ni purtiʼ biasa Maestru stícabe de lade gueʼtuʼ. Laapécabe biiyacabe Jesús biasa si de lade gueʼtuʼ ne despué laaca biiyaʼ «jma de gaayu gayuaa hermanu» laabe (1 Corintios 15:6). Laaca nuu guiʼchiʼ ra cá biasa Jesús lade gueʼtuʼ ne stale tu gunna dxandíʼ ni, ne zacá zeedani lu guidapaʼ Evangeliu (Mateo 27:62–28:20; Marcos 16:1-8; Lucas 24:1-53; Juan 20:1–21:25).

Guiropa la? purtiʼ biiyaʼ ca apóstol que bisibani Maestru sticaʼ chonna binni ni maʼ guti: primé que bíʼnibe ni ndaaniʼ guidxi Naín, despué ndaaniʼ guidxi Capernaum ne últimu que ndaaniʼ guidxi Betania (Lucas 7:11-17; 8:49-56; Juan 11:1-44). Últimu ca nga rieeteʼ ra ruzulú revista riʼ. Raqué gundisaʼ Jesús ti hombre ni nabé ridxaagabe laa ne binnilidxi. Guiduʼyaʼ chaahuinu xi bizaaca raqué.

Dxi maʼ napa Lázaro tapa gubidxa de guti, gudxi Jesús Marta, bizáʼnabe, ca diidxaʼ riʼ: «Zabani bizaʼna luʼ». Qué ñenegá diʼ Marta ni gudxi Jesús laa, nga runi guniʼbe: «Nanna zabani be». Laabe nánnabe zadxiña dxi ziasa bizáʼnabe, peru cadi óraque diʼ. Ngue runi, gudxi Jesús laabe ca diidxaʼ riʼ: «Naa nga rusibane gueʼtuʼ, ne naa nga rudiee enda nabani». Bixuiʼlú si pabiáʼ bidxagayaa Marta ora biʼyaʼ gundisaʼ Jesús Lázaro (Juan 11:23-25).

Yanna, paraa guyuu Lázaro tapa gubidxa despué de gutiʼ que yaʼ. Qué niníʼdibe pa guyebe paxaraa. Laabe qué ñápabe ti alma ni qué rati ni ñanda ñe guibáʼ. Ora bisibani Jesús laabe, qué riníʼ diʼ nga gulee laabe neca qué nabe de guibáʼ ra nuube gaxha de Dios. Yanna, paraa guyuu Lázaro guidapaʼ gubidxa ca yaʼ. Ndaaniʼ baʼ, racá nga gúsibe ca dxi ca (Eclesiastés 9:5, 10).

Guietenaláʼdxinu guníʼ Jesús zeeda gaca guendaguti ca casi ora nisiaasiʼ ca binni ni maʼ guti ne zabánicaʼ ora guiásacaʼ de lade gueʼtuʼ. Relatu ca na: «“Nisiaasi Lázaro xhamigu nu peru  ma chaaʼ, chi ucuaane Iaa”. Oraque na ca discípulu stibe: “Pa nisiaasi be la? Señor, zianda be”. Peru qué ñene ca xi na be. Zácaxa ca cuzeete be nisiaasi si Lázaro, tihua cuzeete be ma guti. Oraque bisiá be stiidxa be, rabi be laacaʼ: “Ma guti Lázaro”» (Juan 11:11-14). Ora bisibani Jesús Lázaro para chuʼné binnilidxi sti biaje, casi ñaca nudiibe binnilidxi ti regalu nabé sicarú.

Ora gundisaʼ Jesús binni de lade gueʼtuʼ dxi guyuu lu Guidxilayú bisihuínnibe xi chigúnibe ora maʼ guni mandarbe lu Reinu stiʼ Dios. * Dxi guni mandarbe lu Guidxilayú, zandísabe guiráʼ binni ni maʼ guti, ni nuucaʼ ca lugar ni zeeda gaca casi «baʼ». Ngue runi, guniʼbe: «Naa nga rusibane gueʼtuʼ». ¡Guníʼ ique pabiáʼ nayecheʼ ziuuluʼ ora gúʼyaluʼ ca binni ni nadxiiluʼ guibánicaʼ sti biaje ne pabiáʼ nayecheʼ zuni sentir cani guiasa ca! (Lucas 8:56.)

Sicaríʼ gudxi Jesús Marta: «Tu guni cre naa la? neca ma guti zabani, ne cani nabani ru ne runi cre naa la? qué ziuu dxi gatiʼ» (Juan 11:25, 26). Ca binni guindisaʼ Jesús de lade gueʼtuʼ, dxi guni mandar ti mil iza, zanda guibánicaʼ sin qué chuʼ dxi gáticaʼ pa qué gusaanacaʼ de gápacaʼ fe laabe.

Guníʼ si Jesús xi naquiiñeʼ guni binni para guiasa de lade gueʼtuʼ gunabadiidxabe Marta xiixa ni bicaa laa gusihuinni pa dxandíʼ napa fe: «Ruʼnu cre nga la?», de raqué bicabi Marta laabe: «Rune cre, Señor [...]. Ma bine cre lii nga Cristu, Xiiñi Dios» (Juan 11:26, 27). Yanna, lii yaʼ. Ñuuláʼdxiluʼ ñápaluʼ fe ziasa ca gueʼtuʼ ca cásica gupa Marta fe la? Para nga primeru naquiiñeʼ guiziidiluʼ xi naguixhe ique Dios guni para binni guidxilayú (Juan 17:3; 1 Timoteo 2:4). Pa gúniluʼ zacá la? zápaluʼ fe. Xiñee que guinábaluʼ ca testigu stiʼ Jiobá guluiʼcaʼ lii xi caníʼ Biblia de tema riʼ. Laacabe ziuuláʼdxicabe gusiidicabe lii jma de laani.