NANNA pabiáʼ naná yuubaʼ cadiʼdiʼ María zuxibi raqué yaʼ. Nuuruʼ ndaaniʼ íquebe modo gucuaalaʼdxiʼ xiiñibe ora cayati de tantu bininácabe laa. Maʼ napa ratu de nacahui raqué neca galaa dxi ruʼ ngue nuucabe. De raqué, málasi biniibi dxacha Guidxilayú (Mateo 27:45, 51). Zándaca guníʼ ique María zaqué nga culuíʼ Jiobá binni guidxilayú laa nga ni jma cayacaná pur guti xiiñiʼ.

Laga cadiʼdiʼ biaaniʼ stiʼ huadxí que lade ca za ni nuteeguʼ guibáʼ lugar ni láʼ Gólgota, o «La Calavera», nuu María raqué cayuunaʼ purtiʼ guti xiiñiʼ (Juan 19:17, 25). Stale nga ni bietenaláʼdxibe. Zándaca bietenaláʼdxibe ni bizaaca raca treinta y tres iza, dxi guyebe né José ndaaniʼ yuʼduʼ stiʼ Jerusalén para guluíʼcabe baʼduhuiiniʼ stícabe. Raqué nuu ti binnigola láʼ Simeón ne bizulú guníʼ xi zuni baʼduhuiiniʼ que. Guniʼbe zuni stale cosa ni zadxagayaa binni, peru laaca guniʼbe zadxiña dxi zapa María ti yuubaʼ ni zeeda gaca casi ñaca nudxígacabe ti gudxíu xhialma (Lucas 2:25-35). Ne óraruʼ gudíʼdibe lu yuubaʼ que nga biénebe xii ngue guníʼ hombre que.

Nácabe yuubaʼ jma naná runi sentir binni nga gatiʼ ti xiiñiʼ. Guendaguti ca nga ti enemigu ni jma ridxíbinu ne zanda guininu guiranu runinani (Romanos 5:12; 1 Corintios 15:26). Ñee zanda guni huantar binni yuubaʼ ca la? Ora guidúʼndanu historia stiʼ María, dede dxi bizulú Jesús bicheeche diidxaʼ hasta gudiʼdiʼ si caadxi dxi despué de guti, zazíʼdinu stale de fe ni gucané laabe gudxiilube yuubaʼ ni zeeda gaca casi ti gudxíu.

Guininu ni bizaaca raca chonna iza aronda. María biʼniʼ sentir chiguizaaca xiixa, purtiʼ dede né ndaaniʼ guidxihuiiniʼ stiʼ Nazaret, nabé cuzeeteʼ binni de Juan ni riguunisa ne modo cayabi binni gaca arrepentir. Bidii María cuenta cayuuyaʼ xiiñibe guiráʼ ni cayuni Juan ni riguunisa que casi ti seña para guzulú gucheeche diidxaʼ (Mateo 3:1, 13). Peru zuchaa modo nabani María ne binnilidxi ora maʼ gusaana Jesús laacaʼ. Xiñee yaʼ.

Ruluíʼ si maʼ guti José, xheelaʼ María ca dxi ca. Pa zacá ni la? nánnabe xi yuubaʼ rapa binni ora gatiʼ ti binnilidxi. * Tiempu ca maʼ qué rábicabe Jesús «xiiñi carpinteru» si, sínuque laaca maʼ rabi binni laabe «carpinteru». Ne ruluíʼ si despué de laabe gupa María xhi xhoopaʼ baʼduʼ, ne maʼ laabe biaananebe negocio stiʼ bixhózebe ne bidiibe ni guibaniné binnilídxibe (Mateo 13:55, 56; Marcos 6:3). * Neca zándaca bisiidibe Santiago dxiiñaʼ riʼ, purtiʼ laa nga nanda déchebe la? nagana zabaninecaʼ jñaacaʼ sin laabe. Zanda guininu maca nagana nga modo nabani María. Peru ñee bidxíbibe guibánibe zaqué la? Qué gánnadinu. Peru nuu sti cosa ni jma risaca gánnanu: ximodo biʼniʼ sentirbe ora gúnnabe Jesús ngue beeda gaca Jesucristu, o Mesías bieeteʼ gueeda que yaʼ. Nuu ti relatu zeeda lu Biblia ni zacané laanu gánnanu ni (Juan 2:1-12).

 Guyé Jesús ra nuu Juan para cuʼ nisa laa, ne zaqué beeda gaca Mesías, o ni Gulí Dios (Lucas 3:21, 22). Oraqueruʼ nga gulibe ca discípulo stibe. Nécaxa nagueenda nga naquiiñeʼ gúnibe dxiiñaʼ que, guleebe tiempu para chuʼbe ra nuu ca binnilídxibe ne ca xhamígube, casi ora gúnicaʼ xiixa para chuʼcaʼ nayecheʼ. Tobi de ca biaje guleebe tiempu para laacaʼ nga dxi guyebe ndaaniʼ guidxi Caná, ni riaana biaʼ 13 kilómetru de Nazaret, ne zándaca nuuni ique ti dani. Raqué guca ti guendaxheelaʼ ne yenebe jñaabe, ca discípulo stibe ne ca bíʼchibe. Ora cayaca guendaxheelaʼ que, bidii María cuenta nuu ti guendanagana. Zándaca biiyabe binnilidxi ca novio que ruuyadxísaacaʼ lucaʼ qué guidxélacaʼ xi gúnicaʼ ne caniʼcaʼ ra diágacaʼ. Xi cayácacabe yaʼ. ¡Bibidxi vinu stícabe! Laani nga ni qué zanda guiaadxaʼ lu ti guendaxheelaʼ runi ca judíu purtiʼ zaníʼ binni laacaʼ. Cumu cayá María laacabe la? ngue runi guyé ra nuu Jesús.

Na María rabi Jesús: «Ma qué gapa cabe vinu». Xi gulézabe ñuni Jesús yaʼ. Qué gánnadinu, peru nánnabe naca xiiñibe ti hombre nabé risaca ne zuni stale cosa ni guidxagayaa binni. Zándaca gulézabe nuzulú Jesús ñuni xhiiñaʼ oraqueca. Casi ñaca ñábibe laa: «Xiiñeʼ, ñee zanda gacaneluʼ ca binni riʼ la?». Zándaca bidxagayaabe ora bicabi Jesús laabe sicaríʼ: «Cadi gaʼbu naa xi gune». Nuu tu na qué nuluíʼ diʼ Jesús runi respetar jñaa pur modo bicabi laabe, peru cadi zacá diʼ ni. Lu diidxaʼ griegu, né diidxaʼ nadóʼ nga gudxi Jesús jñaa qué zanda guni ni nabe. Ni cusietenalaʼdxiʼ si Jesús jñaa nga cadi laa diʼ naquiiñeʼ gabi laabe ximodo gúnibe xhiiñabe, sínuque Bixhózesibe Jiobá nga zanda gabi laabe xi gúnibe.

Cumu qué rudxiibaʼ María laca laa ne nuu xpiaaniʼ la? bíʼnibe ni na xiiñibe. Ngue runi ni gúdxisibe cani cayacané ra saa que nga: «Laguni intiisi gabi be laatu». María bidii cuenta maʼ qué zanda gabi laabe xi naquiiñeʼ gúnibe; yanna la? maʼ laa ne xcaadxi binni que nga naquiiñeʼ chinándacaʼ ni gábibe laacaʼ. Peru Jesús biene ni cadiʼdiʼ cani cachaganáʼ que. Ngue runi biʼniʼ primé milagru stiʼ raqué: bíʼnibe nisa que vinu chaʼhuiʼ. Pur ngue «bini cre ca discípulu stibe laabe». Ne laaca biʼniʼ cré María, ngue runi maʼ qué ñuuyasibe Jesús casi xiiñibe, sínuque maʼ biiyabe laa casi Señor stibe ne ni zulá laabe.

Yanna riʼ, stale nga ni zanda guiziidiʼ cani napa xiiñiʼ lu ejemplu stiʼ María pur gupa fe. Dxandíʼ nga guirútiruʼ casi María huasiniisi ti xiiñiʼ ni qué ñalené donda, peru guiráʼ binni raca nagana para laacaʼ gúʼyacaʼ maʼ biniisi xiiñicaʼ. Ngue runi qué rusaanacaʼ de gápacaʼ laacabe casi xcuidi, peru cadi jneza diʼ gúnicabe zacá (1 Corintios 13:11). Ximodo zanda gacané binni xiiñiʼ neca maʼ huaniisi yaʼ. Zanda gacanécabe laacaʼ ra guluíʼcabe runi crécabe qué zusaanacaʼ Jiobá ne laabe zaguube ndaayaʼ laacaʼ. Ca diidxaʼ guiníʼcabe ca naquiiñeʼ gusihuínnicani qué rudxiibacabe laca laacabe ne zacaneni xiiñicabe. Nanna dxíchinu ra bizulú Jesús biʼniʼ xhiiñaʼ Dios bisisaca ni biʼniʼ jñaa pur laa.

Ora ruzeeteʼ guidapaʼ Evangeliu ca guionnaʼ iza aronda bicheeche Jesús diidxaʼ huaxiéʼ ruzeeteʼ cani de María, ne riénenu xiñee. Cadi guiaandaʼ laanu zándaca maʼ viuda laabe tiempu riʼ, pur ngue stúbibe cusiniisibe ca xiiñibe, ne zándaca nuu de laacaʼ nabezanérucaʼ laabe ra lídxibe. Nga runi riénenu xiñee qué ñanda ninándabe Jesús guiráʼ ra guzá (1 Timoteo 5:8). Peru laabe qué nusaanabe de niníʼ  íquebe cani biziidibe de Mesías ne laaca qué nusaanabe de ñebe ca guendaridagulisaa guca ndaaniʼ sinagoga nuu ndaaniʼ xquídxibe, casi maca  huayuni binnilídxibe (Lucas 2:19, 51; 4:16).

Ñee cadi zándaca né laabe nuube dxi guníʼ Jesús ndaaniʼ sinagoga ni nuu Nazaret la? Nanna pabiáʼ nayecheʼ guyuube ora binadiágabe guníʼ Jesús cayaca ti profecía luguiáʼ, ni gucuá raca stale gayuaa iza ante. Peru laaca gucanabe ora bíʼyabe stale de ca binni xquídxibe bidxiidéchecaʼ xiiñibe. ¡Dede gucaláʼdxicaʼ ñuuticaʼ laabe! (Lucas 4:17-30.)

Ne cadi ngasi nga ni gudíʼdibe, Juan 7:5 na guidapaʼ bíʼchibe qué ñuni crecaʼ laabe casi biʼniʼ cré jñaabe. Versículo ca ruzeeteʼ: «Nin laaca [ca bíʼchibe] qué runi cre ca laabe». Jesús gupa chupa bizaʼnaʼ ne qué ruzeeteʼ diʼ Biblia de laacabe. Pa biʼniʼ crécabe o pa coʼ la? bidxaagalú María stale guendanagana purtiʼ gadxé gadxé ni biʼniʼ cré ca xiiñiʼ. Bíʼnibe stipa para cadi guixélebe de Dios ne laaca gucanebe ca xiiñibe guni crecaʼ ni runi crebe, peru sin gucaabe laacaʼ gúnicaʼ ni neca qué racaláʼdxicaʼ.

Ti biaje, yeyubi ca binnilidxi Jesús laa para chinecaʼ laabe, purtiʼ nacaʼ «cayaca ique be» (Marcos 3:21, 31). Nécapeʼ qué niníʼ ique María casi laacabe, peru yenanda laacabe purtiʼ guníʼ ique zándaca zaqué gucaadiágacabe xiixa ni guiníʼ Jesús ne gucaa laacabe guni crécabe. Peru qué nuchaacabe modo riníʼ íquecabe neca biiyacabe ca milagru bíʼnibe ne pabiáʼ sicarú cani bisiidibe. Zándaca dede maʼ bixhacaláʼdxibe ora guniʼbe ca diidxaʼ riʼ: «Xi ruʼ caquiiñeʼ para guni crécabe Jesús yaʼ».

Yanna lii yaʼ, ñee gadxé gadxé religión napa binnilídxiluʼ la? Pa zacá ni, nabé zacané ejemplu stiʼ María lii purtiʼ gupa fe. Laabe qué ñuu dxi niníʼ íquebe qué zuni cré binnilídxibe Jesús. Ngue runi biluiʼbe laacaʼ pabiáʼ nayecheʼ nuube ne nexhedxí ladxidoʼbe pur fe stibe que. Laabe laaca gucanebe xiiñibe guiráʼ ora. Ñee bibánabe laa la? Ñee guyuu ora guníʼ íquebe jma galán ñuuruʼ ra nuube la? Pa zacá biʼniʼ sentirbe la? zanda guininu bíʼnibe stipa para cadi guicá íquebe ni. Para laabe guizáʼ risaca ngue gacanebe xiiñibe ne uguube gana laa. Ñee cayacaneluʼ ca xiiñiluʼ gúnicaʼ xhiiñaʼ Jiobá primeru lu xquendanabánicaʼ la?

Xi ndaayaʼ gucuaa María pur gupa fe Jesús yaʼ. Jiobá qué rusaana de cuʼ ndaayaʼ ca xpinni ni gapa fe laa, ne nanna dxíchinu zacaca bíʼnibe né María (Hebreos 11:6). Bixuiʼlú pabiáʼ nayecheʼ biʼniʼ sentirbe ora binadiágabe ca libana bidii xiiñibe o zándaca ora binadiágabe caníʼ ca binni ni yegucaadiaga cani bisiidiʼ Jesús que.

Ora binadiaga María ca ejemplu biquiiñeʼ Jesús para gusiidiʼ, ñee guníʼ íquebe biquiiñeʼ Jesús cani biʼyaʼ dxi nahuiiniʼ para guníʼ ca ejemplu ca la? Laa guníʼ de ti gunaa ni binduubaʼ ra lidxi dede ra bidxela moneda ni biniti, ne guníʼ de chupa gunaa ni cayuutucaʼ biidxi para cueecaʼ harina ne laaca bizeeteʼ de ti gunaa ni bicaaguí ti lámpara ne bizuhuaʼni lu xiixa. Ñee bisietenalaʼdxiʼ ca ejemplu ca María nuu Jesús cueʼ dxi nahuiiniʼ laga cayuni ca dxiiñaʼ ca la? (Lucas 11:33; 15:8, 9; 17:35.) Dxi guníʼ Jesús nasisi ayubu stiʼ ne cadi nanaani, ñee bietenalaʼdxiʼ María ti huadxí cusiidiʼ José Jesús ximodo guni ti ayubu para cadi guninani xayanni yuze la? (Mateo 11:29, 30.) Nánnanu biecheʼ María ora guníʼ ique naroʼbaʼ ndaayaʼ bidii Jiobá laa, purtiʼ bisiniisibe ti baʼduhuiiniʼ ni beeda gaca Mesías. Ne laaca biéchebe ora bicaadiágabe guiráʼ ni guníʼ Jesús, ti maestru ni jma nanna gusiidiʼ ne biquiiñeʼ intiica si ni runibiáʼ binni para gusiidiʼ stale cosa risaca.

 Peru qué nucaa diʼ nga María nudxiibaʼ laca laa. Qué ñuu dxi niníʼ Jesús xiixa galán de laabe para niníʼ íquebe naquiiñeʼ gusisácacabe laabe ne guni adorárcabe laabe. Ti biaje gudxi ti gunaa Jesús ca diidxaʼ riʼ: «Dichosa de ni uxana lii». Peru Jesús bicabi laabe: «Jma dichoso cani ucaa diaga stiidxa Dios ne guni ni na ni» (Lucas 11:27, 28). Zaqueca dxi gúdxicabe laabe zeeda jñaabe ne ca bíʼchibe ra nuube, guniʼbe guiráʼ cani guni cré laabe nga zeeda gácacaʼ casi jñaabe ne casi bíʼchibe. Lugar de ñaca sentir María pur modo guniʼbe que la? biénebe xii ngue caníʼ xiiñibe: jma risaca nga gúʼyanu cani cayuni ni na Dios casi binnilídxinu que cani dxandíʼ xfamílianu laacaʼ (Marcos 3:32-35).

Peru qué zanda guchaaganu guiráʼ nga né yuubaʼ biʼniʼ sentir María ora biʼyaʼ cayati xiiñiʼ lu yaga que. Sti binni ni biʼyaʼ dxi gutiʼ Jesús nga apóstol Juan, laabe bicaabe lu Evangeliu stibe xiixa ni bíʼyabe raqué: «Cueʼ [«yaga cá», TNM] Jesús que, zuhuaa jñaa». Dede dxi cayati xiiñibe qué nusaanabe de ñuube gaxha de laa. Ngue runi, biiyadxí Jesús laabe zuxíbibe raqué, ne neca naná modo cacaa bi ne apena para guiníʼ la? gunabaʼ Juan gapa laabe. Xiñee Juan gunábabe gapa jñaabe pa náparube bíʼchibe yaʼ. Purtiʼ laacaʼ qué runi crecaʼ cani bisiidibe. Zacá bisihuínnibe pabiáʼ risaca nga gudii ti binni napa fe ni caquiiñeʼ binnilidxi ne jmaruʼ si ni gacané laacaʼ chuʼcaʼ gaxha de Dios (Juan 19:25-27).

Dxi gutiʼ Jesús que nga biʼniʼ sentirbe ti yuubaʼ ni zeeda gaca casi ti gudxíu, casi maca gúdxicabe laabe caadxi iza ante. Pa nagana para  guxuíʼlunu pabiáʼ yuubaʼ biʼniʼ sentirbe, jmaruʼ si nagana para guxuíʼlunu pabiáʼ nayecheʼ guyuube chonna gubidxa despué de guti xiiñibe. Xiñee yaʼ. Purtiʼ biasa xiiñibe de lade gueʼtuʼ, ne nga nga ti milagru ni jma naroʼbaʼ huayaca lu Guidxilayú. Ne jmaruʼ si nayecheʼ guyuube purtiʼ qué nindaa de ngue guyé Jesús ra nuu Santiago, ne zándaca stubi si nuu óraque (1 Corintios 15:7). Ni guca ca bicaani Santiago ne ca biʼchiʼ guchaacaʼ modo riníʼ íquecaʼ. Nánnanu biʼniʼ crécabe bíʼchicabe Jesús que nga Cristu purtiʼ Hechos 1:14 ruzeeteʼ qué nindaa de ngue maʼ nuucabe lu ti guendaridagulisaa ne jñaacabe, ne nabé cayuni orárcabe. Dede bicaa chupa de laacabe, Santiago (Jacobo) ne Judas, chupa carta zeeda lu Biblia.

Yanna María la? últimu biaje ruzeeteʼ Biblia laabe nga dxi nuube lu guendaridagulisaa ca cayuni orarbe. Guizáʼ galán modo riluxe historia  stiʼ María ne nabé galán ejemplu bisaanabe  para laanu. Pur fe stibe gunda bidxiilube yuubaʼ ni zeeda gaca casi ti gudxíu que ne despué  gucuaabe ti ndaayaʼ naroʼbaʼ:  zebe guibáʼ.  Pa gápanu fe casi gúpabe ca la? zanda  gudxíʼlunu intiica yuubaʼ guidxaagalunu lu Guidxilayú  malu riʼ ne zacaanu ndaayaʼ jma sicarú que biaʼ huaníʼ íquenu guicaanu.