Chonna hombre de siglu XVI biyúbicaʼ guiénecaʼ ni dxandíʼ
«XII nga ni dxandí yaʼ». Zacá gunabadiidxaʼ Poncio Pilatu, ti hombre de Roma ni biʼniʼ mandar guidxi Judea, Jesucristu dxi cayuni juzgar laabe (Juan 18:38). Peru cadi dxandíʼ ngue nuu Pilatu ganna ni, modo gunabadiidxabe ni, bisihuínnibe qué runi crebe. Zándaca para laabe ni dxandíʼ ca nga ni rusiidicabe tuuxa guni cré o ni ribí guni cré. Zacaca nga riníʼ ique stale binni yanna.
Stale binni ni bibani Europa lu siglu XVI, gunabadiidxacaʼ xipeʼ naquiiñeʼ guni crecaʼ. Ca binni que dede nahuiinicaʼ biziidicaʼ naquiiñeʼ guni respetarcaʼ papa né xcaadxi cosa rusiidiʼ ca católicu, peru dxi guca ni rábicabe Reforma, bichaa stale binni modo riníʼ ique ne zaqueca guca stale lugar de Europa. Ximodo zanda gánnacabe xii nga ni dxandíʼ yaʼ.
Guyuu chonna hombre ni biyúbicaʼ gánnacaʼ ni dxandíʼ, ne guyuuruʼ xcaadxi hombre biʼniʼ casi laacabe. * Xi gucané laacabe para gúnnacabe xii nga ni dxandíʼ ne ni cadi dxandíʼ yaʼ. Xi bidxélacabe yaʼ. Guidúʼyanu ni.
GUDIʼNU LUGAR BIBLIA SI GUINÍʼ NI DXANDÍʼ
Wolfgang Capito, guca ti hombrehuiiniʼ ni nabé biʼniʼ cré cani bisiidiʼ religión stiʼ. Biindabe medicina, ley ne de teología. Lu iza 1512 gúcabe párroco ne despué gúcabe capellán stiʼ arzobispo de guidxi Maguncia.
Nécapeʼ primeru que gucaláʼdxibe nucueezabe ca reformador que, cani cusiidiʼ gadxé cosa de ni rusiidiʼ religión católica la? qué nindaa bieegube laacaʼ. Historiador James M. Kittelson na ora bíʼyabe xi guiráʼ rusiidiʼ Iglesia guníʼ íquebe naquiiñeʼ guchaagabe cani né cani rusiidiʼ Biblia, «purtiʼ [para Capito] lu sini nga zeeda ni dxandíʼ». Pur ni bíʼnibe ca gunda biénebe qué rusiidiʼ diʼ Biblia naquiiñeʼ guni crécabe transustanciación ne guni adorárcabe bidóʼ. (Biiyaʼ cuadru ni láʼ « Biiyacaʼ “pa jneza ni caziidi ca”».) Lu iza 1523, bisaana Capito puestu risaca ni gupa ne yendeza Estrasburgo, tobi de ca guidxi ra guyuu stale tu yenanda Reforma.
Stale de cani maʼ qué ninanda modo bisiidiʼ Iglesia que, guyecaʼ ra lídxibe ne raqué guníʼcabe de religión ne cani rusiidiʼ Biblia. Nuu de cani yenanda Reforma que bisiidirucaʼ de Trinidad, peru libru ni láʼ La reforma radical na «qué niníʼ diʼ [Capito] gastiʼ de Trinidad». Xiñee yaʼ. Purtiʼ bidxagayaabe ximodo ti teólogo de España ni láʼ Miguel Servet bisiene né caadxi textu zeeda lu Biblia cadi jneza ni. *
Pa guiniʼbe qué runi crebe Trinidad la? zándaca guuticabe laabe, ngue runi gupa Capito laa para cadi ganna binni ni runi cré. Neca zaqué, cani bicaabe que bisihuínnicani maca guníʼ íquebe pa jneza ngue guni crebe Trinidad dede ante gunibiaʼbe Servet. Despué bicaa ti sacerdote católicu xi biʼniʼ Capito ne ca xcompañeru, «bidagulisaacaʼ nagaʼchiʼ ne sin gucaalucaʼ Iglesia para guiniʼcaʼ de ca cosa ni nagana guiene binni de religión, [ne] despué maʼ qué ñuni crécabe Santísima Trinidad». Gudiʼdiʼ si ti gayuaa iza bihuinni beeda labe lu ti lista ra zeeda lá xcaadxi hombre ni bicaa libru ne qué ñuni crecaʼ Trinidad.
Wolfgang Capito guníʼ bichee Iglesia ra bisaana de chinanda «ni rusiidiʼ Biblia»
Biʼniʼ cré Capito Biblia si nga rusiidiʼ ni dxandíʼ. Guniʼbe: «Gudiʼnu lugar Biblia si ne ley stiʼ Cristu gusihuínnicaʼ ni dxandíʼ lade cani ruundaʼ de teología». Kittelson na: «Qué nusaana [Capito] de niníʼ ra bichee ca teólogo escolástico nga ra bisaanacaʼ de chinándacaʼ ni rusiidiʼ Biblia».
Laabe nabé guyuuláʼdxibe gánnabe cani dxandíʼ zeeda lu Biblia, laaca zaqueca guyuulaʼdxiʼ Martin Cellarius ni (ni laaca binibiáʼcabe casi Martin Borrhaus), ti hombrehuiiniʼ ni guyuu ra lidxi Capito lu iza 1526.
«NI GÚNNABE DE DIOS NI DXANDÍʼ»
Primé yaza stiʼ libru De Operibus Dei, ni biʼniʼ Martin Cellarius, ra bichaagabe cani rusiidiʼ Iglesia ne ni rusiidiʼ Biblia
Cellarius gule lu iza 1499. Laabe nabé biindabe de teología ne filosofía, ne laaca gúpabe ti puestu de profesor Wittenberg (Alemania), ti lugar ra biasastí Reforma. Qué nindaa de ngue binibiaʼbe Martín Lutero ne xcaadxi reformador. Ximodo zanda gánnabe gunáʼ nga cani dxandíʼ rusiidiʼ Biblia né cani rusiidiʼ binni guidxilayú yaʼ.
Libru ni láʼ Teaching the Reformation (Enseñanza de la Reforma) bizeeteʼ, biʼniʼ cré Cellarius para guiene chaahuiʼ binni xi rusiidiʼ Biblia la? naquiiñeʼ «gunʼdaʼ ni guiráʼ dxi ne guchaaga cani cá ndaaniʼ ni, ne laaca naquiiñeʼ guni oración ne gaca arrepentir». Xi bidxélabe ora bíʼnibe zacá yaʼ.
Lu beeu julio stiʼ iza 1527, bicaabe lu ti libru cani bidxélabe lu Biblia, libru ca lani De Operibus Dei (Sobre las obras de Dios). Luni guniʼbe cani rinabaʼ Iglesia guni cré binni, casi transustanciación que bichaagasicabe ni ne cuerpu ne rini stiʼ Cristu. Profesor Robin Barnes, guníʼ libru que laaca bisiene «caadxi de ca profecía zeeda lu Biblia ra na zadxiña ti tiempu ra zadiʼdiʼ binni stale yuubaʼ ne guendanagana, ne despué zaca chaahuiʼ guiráʼ cosa ne ziuu guiráʼ binni guidxilayú nayecheʼ» (2 Pedro 3:10-13).
Nabé risaca ca diidxaʼ ni guníʼ Cellarius de Jesucristu. Nécapeʼ qué niniʼbe cadi jneza guni cré binni Trinidad la? bizeetebe gadxé nga «Bixhózenu ni nuu Guibáʼ» ne «Xiiñibe Jesucristu». Laaca guniʼbe naca Jesús tobi de ca dios ni nuu ne tobi de ca xiiñiʼ Dios ni jma napa poder (Juan 10:34, 35).
Lu libru ni láʼ Antitrinitarian Biography (Biografía antitrinitaria), ni biree lu iza 1850, Robert Wallace guníʼ cani bicaa Cellarius que bisihuínnicani qué ninándabe modo guníʼ ique binni de Trinidad. * Nga runi, stale binni ni biʼndaʼ nacaʼ qué ñuni crebe ni. Cellarius nga tobi de cani biquiiñeʼ Dios «para gusiidiʼ binni de Dios ni dxandíʼ ne de Cristu».
GULEZABE ÑÚNICAʼ NI STI BIAJE
Lu iza 1527, ndaaniʼ guidxi Wittenberg guleza ti teólogo ni láʼ Johannes Campanus, tobi de ca hombre ni nabé nuu xpiaaniʼ tiempu que. Nécapeʼ Campanus gúcabe ti binni nabé risaca lu Reforma que la? qué ñuuláʼdxibe cani bisiidiʼ Martín Lutero. Xiñee yaʼ.
Purtiʼ qué ninabe ñuni crebe transustanciación ne consustanciación. * André Séguenny, ti hombre ni nanna de tema riʼ na biʼniʼ cré Campanus qué raca diʼ pan ca sti cosa ora riquiiñecabe ni lu mixaʼ, sínuque casi ñaca sini xcuerpu Cristu. Dxi bidagulisaacabe Marburgo lu iza 1529 para guiníʼcabe de ca tema ca, qué nudiicabe lugar niníʼ Campanus guiráʼ ni bidxela lu Biblia, ne despué maʼ qué niná ca xhamígube de Wittenberg ni nuu lu Reforma que ñuube ládecaʼ.
Lu libru ni láʼ Restitution, bisihuinni Johannes Campanus cadi jneza guni cré binni Trinidad
Ni jma bichiichi ca reformador que nga ni biʼniʼ cré Campanus de Bixhózenu ni nuu guibáʼ, Xiiñibe ne de espíritu santu. Lu libru stibe ni láʼ Restitution (Restitución), ni biree lu iza 1532, bisiene Campanus gadxé nga Jesús ne gadxé nga Bixhoze. Laabe guniʼbe ximodo nga Bixhózenu ni nuu guibáʼ ne Xiiñiʼ, bizeetebe tobi si laacaʼ, cásica nuu ti hombre ne ti gunaa «tobi si», peru cadi ti binni si laacaʼ (Mateo 19:5; Juan 10:30). Laabe biiyabe ngueca ejemplu riquiiñeʼ Biblia para gusiene jma napa Bixhózenu ni nuu guibáʼ poder que Xiiñiʼ: «Hombre nga xaíque sti gunaa, ne Dios nga xaíque sti Cristu» (1 Corintios 11:3).
Yanna, xi zanda guininu de espíritu santu yaʼ. Sti biaje ca biquiiñeʼ Campanus Biblia ora guníʼ: «Gastiʼ diʼ nin ti textu lu Biblia ni cusiene Espíritu Santu ca nga guionna binni [...]. Naquiiñeʼ guiénenu espíritu stiʼ Dios ca, laani nga poder ni riquiiñebe para quixhe chaahuibe ne gúnibe cani cá íquebe» (Génesis 1:2).
Lutero bizeeteʼ guniʼbe mal ne bicaalube Xiiñiʼ Dios. Sti reformador gunabaʼ guuticabe laabe. Peru qué nulabi Campanus laacabe. Libru La reforma radical, bizeeteʼ biʼniʼ cré Campanus maʼ qué ñapa Iglesia stipa purtiʼ biʼniʼ crecaʼ guiráʼ ni rucaa binni guni cré Trinidad.
Laabe qué ñuu dxi niníʼ íquebe nuzaʼbe religión stibe. Ca diidxaʼ bicaabe bisihuínnicani gucaláʼdxibe nidxélabe ni dxandíʼ ca «lade ca secta que ne lade cani qué ñuni cré cani bisiidiʼ Iglesia», peru qué nidxélabe gastiʼ. Ngue runi, gulézabe nusaana religión católica de ñuni cré cani cadi jneza bisiidiʼ ne nibiguetaʼ ñuni cré sti biaje cani biʼniʼ cré ca primé xpinni Cristu. Peru ca xaíque stiʼ Iglesia que gunaazecaʼ laabe. Zándaca biteguyoocabe laabe jma de gande iza, ne ca historiador nacaʼ zándaca gútibe lu iza 1575.
«LAUYUBI UNÁ NGA NI JNEZA»
Cumu biindaʼ Capito, Cellarius, Campanus ne xcaadxi binni Biblia la? ngue runi gunda bidiicabe cuenta xii nga ni dxandíʼ ne xii nga ni cadi dxandíʼ. Nécapeʼ cadi guiráʼ diʼ ni bidxélacabe jneza cani né cani rusiidiʼ Biblia, ca hombre riʼ biindaʼ chaahuicabe cani zeeda lu Stiidxaʼ Dios ne bisisácacabe cani.
Apóstol Pablu gunabaʼ ca xpinni Cristu: «Lauyubi uná nga ni jneza, ne nga laguiaana né» (1 Tesalonicenses 5:21). Pa racaláʼdxiluʼ gánnaluʼ xii nga ni dxandíʼ la? ca testigu stiʼ Jiobá maʼ guleecaʼ ti libru ni zacané lii. Libru ca lani Xipeʼ ndiʼ cusiidiʼ Biblia.
^ párrafo 4 Biiyaʼ cuadru «Dejen que ambos crezcan juntos hasta la siega» ni zeeda lu yaza 44 stiʼ libru Los testigos de Jehová, proclamadores del Reino de Dios, ni biʼniʼ ca testigu stiʼ Jiobá.
^ párrafo 8 Biindaʼ tema ni láʼ: «Miguel Servet y su búsqueda en solitario de la verdad», ni zeeda lu revista ¡Despertad! stiʼ mayo 2006, ni biʼniʼ ca testigu stiʼ Jiobá.
^ párrafo 17 Libru ca bizeeteʼ ximodo biquiiñeʼ Cellarius diidxaʼ dios para guiniʼbe de Cristu: «Laabe biquiiñebe deus né minúscula. Mayúscula ca biquiiñebe ni para guiniʼbe de Dios ni jma nandxóʼ».
^ párrafo 20 Consustanciación ca nga tobi de ca cosa ni bisiidiʼ Lutero ra na, vinu ne pan ne xcuerpu Cristu nuucani ora rúnicabe Eucaristía.
