«DIOS Espíritu laa», qué zanda guʼyaʼ binni guidxilayú laabe (Juan 4:24). Neca zacá, Biblia ruzeeteʼ nuu binni casi ñaca huayuuyacaʼ laabe (Hebreos 11:27). Dxandipeʼ zanda guidúʼyanu Dios ni qué rihuinni ca la? (Colosenses 1:15.)

Guchaaganu modo nuunu riʼ né modo nuu ti binni qué ruuyaʼ dede dxi gule. Ñee purtiʼ si qué ruuyabe ca qué zanda gudiibe cuenta xi nuu gaxha de laabe la? Coʼ. Stale modo zanda gudiibe cuenta nuu binni ne zaqueca nuu cosa gaxha de laabe. Ti hombre ni qué ruuyaʼ guníʼ: «Para guidúʼyanu cadi caquiiñenu bizalunu, sínuque xquendabiaaninu».

Zacaca nga laanu, neca qué zanda guidúʼyanu Dios né lunu, zanda guidúʼyanu laabe né «xquenda biaani [nu]» (Efesios 1:18). Guidúʼyanu chonna modo zanda gúninu ni.

Ca binni qué ruuyaʼ ca jma runadiágacaʼ ne jma runi sentircaʼ ora cánacaʼ xiixa, nga racané laacabe gánnacabe xi nuu gaxha de laacabe neca cadi cayuuyacabe cani. Zaqueca nga laanu, laaca zanda iquiiñenu guiráʼ ni maʼ bidii Dios laanu para guidúʼyanu xi guiráʼ nuu lu Guidxilayú riʼ ne zacá guidúʼyanu nuu ti Dios ni bizáʼ guirani. «Qué zanda guʼya cabe ximodo [Dios], peru dede dxi bizáʼ be guidxilayú rihuinni dxichi tu naca be pur irá ni biʼni be.» (Romanos 1:20.)

Guiníʼ íquenu de Guidxilayú riʼ. Lugar ra nuunu riʼ cadi guyáʼ ni para si guibáninu ndaaniʼ ni, sínuque para guibáninu nayecheʼ ndaaniʼ ni. Cadi dxandíʼ galán runi sentirnu ora guinaazeʼ ti bi gaʼndaʼ laanu o guni sentirnu calor stiʼ Gubidxa ca, guidoʼno ti cuananaxhi ne guidúʼyanu pabiáʼ nanixe ni o gunadiáganu pabiáʼ sicarú ruundaʼ ca manihuiiniʼ ca la? Ñee qué rusihuinni nga riene Dios ni bizáʼ guiráʼ xixé cosa laanu, nadxiibe laanu ne nacháʼhuibe né laanu la?

Xi rizíʼdinu ora guyadxinu guibáʼ ca yaʼ. Primeca la? guibáʼ ca rusihuínnini poder stiʼ Dios. Ne caadxi de ca investigación ni huayúnicabe yanna nácabe cadi ziroobaʼ si guibáʼ ca, sínuque jma nagueenda ziyácani. Biiyadxí guibáʼ ca ti huaxhinni ne guníʼ ique: «paraa riree guiráʼ stipa ni rucaa guibáʼ ca guiroobaʼ yaʼ». Biblia na «stale stipa» napa Dios ni bizáʼ guiráʼ xixé cosa (Isaías 40:26). Ne guiráʼ ni bizáʼ Dios ca rusihuínnicani nápabe stale poder; ne «guirútiruʼ napa poder biaʼ nápabe» (Job 37:23).

Ti gunaa ni napa chupa hombrehuiiniʼ ni qué ruuyaʼ guníʼ: «Tobi de ca modo jma risaca gusiidiluʼ laacabe nga guiníʼneluʼ laacabe. Naquiiñeʼ gábinu laacabe guiráʼ ni ridúʼyanu ne cani runadiáganu, guiráʼ ni cazaaca. Casi ñaca laanu nga lúcabe». Zacaca nga laanu, neca «iruti binni guidxilayú qué huayuuya Dios» la? Xiiñibe; Jesús, «ni nuu né laabe tobi si», maʼ bisiene laanu ximodo laabe (Juan 1:18). Primé ni bizáʼ Jiobá nga Jesús, laasibe nga ni bizáʼ Dios laapeʼ. Nga runi, zanda guininu casi ñaca laabe nga bizalunu; ne laasibe nga zanda gábibe laanu ximodo nga Dios.

Jesús maʼ ziné stale mil millón de iza cueʼ Dios. Guidúʼyanu caadxi cosa ni bisiénebe de Bixhózebe:

• Caʼruʼ gusaana Dios de guni dxiiñaʼ. «Dede yanna cayuni Bixhoze dxiiñaʼ.» (Juan 5:17.)

• Nanna Dios xi caquiiñenu. «Maca nanna Bixhoze tu xii nga caquiiñe tu.» (Mateo 6:8.)

•  Riuulaʼdxiʼ Dios gudii laanu ni caquiiñenu. «Bixhoze tu ni nuu ibáʼ [...] rudii lugar guzaani gubidxa sti ra nuu cani nachaʼhui ne ra nuu cani nadxabaʼ, ne rusaba nisa guie ra nuu cani runi ni na, ne ra nuu cani qué runi ni na.» (Mateo 5:45.)

• Rusisaca Dios cada tobi de laanu. «Laaca tu nanna tu ridoo chupa mani huiini pur chupa domiʼ, peru neca qué risaca came, qué ziaba si tobi de laacame layú pa qué na Dios. Zaqueca ma bigaba be irá xixé guicha ique tu. Nga runi cadi idxibi tu, purti jma risaca tu que ca mani huiiniʼ.» (Mateo 10:29-31.)

Cani qué ruuyaʼ ca gadxé modo riénecabe ca cosa ca de modo riene ti binni ni ruuyaʼ cani. Casi bandáʼ ca la? gadxé modo riénecabe ni, zándaca qué ziénecabe ni casi ti lugar ra nacahui ra qué rinaazeʼ Gubidxa, sínuque riénecabe ni casi ti lugar ra qué zuniná Gubidxa ca laacabe. Cásica ti binni ni qué ruuyaʼ qué zanda gúʼyabe biaaniʼ ca nin bandáʼ ca la? laanu laaca qué zanda guiénenu ximódopeʼ nga Jiobá de laasinu. Nga runi, biseendaʼ Dios ti hombre ni zanda gusihuinni ca guenda stibe cásipeʼ laacani.

Hombre ca nga Jesús (Filipenses 2:7). Laabe guníʼnebe laanu de Bixhózebe ne laaca biluiʼbe laanu ximódopeʼ nga laa. Felipe, ti discípulo stibe gudxi laabe: «Señor, biluíʼ laadu Bixhoʼzo». Peru laabe gúdxibe laa: «Ni ma biiya naa la? ma biiya Bixhozeʼ» (Juan 14:8, 9). Xi zanda guidúʼyanu de Dios ra guidúʼndanu xi guiráʼ biʼniʼ Jesús dxi bibani yaʼ.

Nabé nachaʼhuiʼ guca Jesús, qué nudxiibabe laabe ne bidiibe lugar guidxiña binni ra nuube (Mateo 11:28-30). Pur modo laabe guyuulaʼdxiʼ binni guidxiña laabe. Biabe binni ni cayacaná ne biéchebe ora cayéchecaʼ (Lucas 10:17, 21; Juan 11:32-35). Ora gúʼndaluʼ ca relatu ni cuzeeteʼ de Jesús o gucaadiágaluʼ cani la? biquiiñeʼ ca sentidu stiluʼ ne bixuiʼlú casi ora ñuuluʼ ra cayácani. Pa guiníʼ íqueluʼ ximodo guca Jesús né binni la? zuuyaluʼ ximódopeʼ Dios ne zuni sentirluʼ jma gaxha de laabe.

Ti especialista cusiene xi runi cani qué ruuyaʼ ca para guiénecaʼ Guidxilayú riʼ: «Para guiénecabe ti cosa la? ruchaagacabe ca cosa ni runibiáʼcabe né cani cánacabe, chuʼ xiicabe, gunadiágacabe ne xcaadxi ni riquiiñenu para guibáninu ne zacá ruuyacabe xi guiráʼ cayaca». Zacaca nga laanu, pa guidúʼyanu cani bizáʼ Dios, guidúʼndanu ni guníʼ Jesús de Bixhoze, ne guidúʼyanu ximodo bisihuínnibe ca guenda stiʼ Dios la? chaahuidugá jma ziénenu ximódopeʼ nga Dios. Jma zadúʼyanu laabe casi ti binni nabani.

Ngapeʼ nga ni guca Job, ti hombre ni ruzeeteʼ Biblia. Primeru guniʼbe de caadxi cosa ni qué ñene chaahuibe (Job 42:3). Peru, ra bíʼyabe xi guiráʼ bizáʼ Dios, guniʼbe: «Nannaʼ tu lii pur ni huayunadiaʼga, peru yanna maʼ cayuuyapeʼ guieluaʼ lii» (Job 42:5).

Ngaca nga ni zanda guizaacaluʼ. Pa guyúbiluʼ Dios la? «laabe zudiibe lugar guidxélaluʼ laabe» (1 Crónicas 28:9). Ca testigu stiʼ Jiobá ziuuláʼdxicaʼ gacanecaʼ lii gunibiáʼ chaahuiluʼ Dios ni qué rihuinni.