XIÑEE NUU TU QUÉ RUNI CRÉ: Stale binni napa fe Dios, peru runi crecaʼ nuube zitu de laacaʼ. Ti gunaa ni guyé yuʼduʼ guiráʼ semana de guidxi Irlanda láʼ Christina guníʼ: «Nannaʼ Dios bizáʼ guiráʼ cosa ni nuu, peru qué runebiaʼyaʼ laabe. Qué ñuu dxi ñuneʼ sentir nuaaʼ gaxha de laabe».

XI RUSIIDIʼ BIBLIA: Zándaca guni sentirnu nuunu zitu de Dios, peru laabe qué rusaanabe laanu. Biquiiñeʼ Jesús ca diidxaʼ riʼ para bisiene ximodo rapa Dios laanu: «Pa ñapa ti hombre ti gayuaa dendxu ne niniti tobi, ñee qué nusaana be noventa y nueve que ne ñaazi be guiʼxhi niyubi be ni biniti que la?». Xi riníʼ ndiʼ yaʼ. Sicaríʼ bisiene Jesús ni: «Qué racalaʼdxi Bixhoze tu ni nuu ibáʼ initi nin tobi de ca nahuiini riʼ» (Mateo 18:12-14).

Rusisaca Dios cada tobi de ca «nahuiini» riʼ. Ximodo ruyúbibe dendxuʼ «ni biniti» ca yaʼ. Casi na textu cá ra ruzulú tema riʼ, ribídxibe laa ra nuube.

Dios nga ruyubi ne ribidxi ca binni ni nayá ladxidóʼ. Lu primé siglu que biseendabe Felipe, ti xpinni Cristu, chiugaanda carru stiʼ ti oficial de Etiopía ne gusiene hombre que xi raca significar profecía cayuundaʼ que (Hechos 8:26-39). Sti biaje, yenebe apóstol Pedru ra lidxi ti oficial romanu láʼ Corneliu, ti hombre ni cayuni orar ca dxi que ne cayuni stipa pur guni ni na Dios (Hechos 10:1-48). Laaca yenebe apóstol Pablu ne ca xcompañeru ruaa ti guiiguʼ fuera de guidxi Filipos. Raqué binibiáʼcabe ti gunaa rusisaca Dios láʼ Lidia, laabe «bicuudxi [Jiobá] ladxidóʼ be para gucuaa be stiidxa» (Hechos 16:9-15).

Lu ca ejemplu bidúʼyanu ca, Jiobá peʼ bidii lugar guiráʼ ca binni ni dxandíʼ cuyubi laa que gunibiaʼcaʼ laa. Ca dxi nabáninu riʼ. Tuu nga cani rié dede ra lidxi binni o ridxíñacaʼ ra nuucabe lu calle para guiníʼnecaʼ laacabe de Dios yaʼ. Ca testigu stiʼ Jiobá. Yanna, gunabadiidxaʼ laca lii: «Ñee caquiiñeʼ Dios laacabe para cuidxi naa la?». Gunabaʼ Dios gacané lii para guicaaluʼ invitación stiʼ de guidxíñaluʼ ra nuu. *