XIÑEE NUU TU QUÉ RUNI CRÉ: Nuu tu laa maʼ canayubi lele tu quixhedxí ladxidóʼ, peru nacaʼ pa guinábacaʼ Dios gacané laaca gudxiilucaʼ ca guendanagana sticaʼ la? caníʼ íquecaʼ puru si para laacaʼ. Ti gunaa láʼ Raquel guníʼ: «Ora guiníʼ iqueʼ guiráʼ xixé binni nuu lu Guidxilayú riʼ ne guiráʼ guendanagana nápacaʼ, runeʼ sentir gastiʼ nga ni cazaacaʼ ne pur nga maʼ qué rinabaʼ Dios gacané naa».

XI RUSIIDIʼ BIBLIA: Maʼ biʼniʼ Dios ti cosa nabé risaca para gacané ne quixhedxí ladxidóʼ binni. Guiranu gulenenu ti «guendahuará crónico»: laani nga guendaruchee. Nga runi qué randa rúninu módopeʼ rinabaʼ Dios laanu gúninu. Peru, «gunaxhii [Dios] laanu ne biseenda be Xiiñi be [Jesucristu] beda tixe irá ni huachéʼ né nu laabe» (1 Juan 4:10). Pur guendaguti stiʼ Jesús ca, rutiidilaʼdxiʼ Dios ca donda stinu, rápanu ti conciencia nayá ne zanda guibáninu ndaaniʼ ti guidxilayú cubi ra guirutiʼ zadinde. * Yanna, ñee rusihuinni guendaguti stiʼ Jesús ca rizaalaʼdxiʼ Dios guiráʼ binni guidxilayú o rizaaláʼdxibe lii la?

Guidúʼyanu ejemplu stiʼ apóstol Pablu. Nabé biniibi guenda guti stiʼ Jesús que ladxidoʼbe ngue runi bicaabe ca diidxaʼ riʼ: «Xiiñi Dios [...] nadxii naa ne bidii xpida pur naa» (Gálatas 2:20). Nécapeʼ maʼ guti Jesús dxi gucaʼ Pablu xpinni Cristu la? biiyabe guendaguti ca casi ti regalu bidii Dios laabe.

Guendaguti stiʼ Jesús ca laaca nácani ti regalu ni maʼ bidii Dios lii para gusihuínnibe pabiáʼ rusisácabe lii. Regalu riʼ zanda gudiini «laanu ti enda nayeche ni qué zaluxe, ne gudixhe ni sicarú para laanu» ne zúnini laanu naguidxi para gúninu «puru si ni nachaʼhuiʼ» (2 Tesalonicenses 2:16, 17).

Peru Jesús bidii xquendanabani maʼ raca biaʼ chupa mil iza. Ximodo nánnanu rizaaláʼdxiruʼ Dios laanu yanna yaʼ.