Guyuuladxeʼ guneʼ practicar gimnasia ne fisicoculturismo, laani nga ejerciciu runi tuuxa para gapa bidxi ladi. Despué de ngue bixheleʼ ti gimnasiu ndaaniʼ guidxi San Leandro (California, Estados Unidos) ne bineniáʼ caadxi fisicoculturista dxiiñaʼ, ládecabe guyuu tobi de cani biʼniʼ ganar premiu rábicabe míster América. Peru, neca bineʼ guiráʼ ngue para gapaʼ ti cuerpu galán, qué ñanda nibaneʼ nayecheʼ.

Tobi de ca xhamiguáʼ bineniáʼ dxiiñaʼ ndaaniʼ gimnasiu que nánnabe racaladxeʼ guieneʼ Biblia ngue runi gúdxibe naa guinieniáʼ tuuxa ni runibiaʼbe. Sti dxi que siadóʼ roʼ cuxhidxináʼ ti testigu stiʼ Jiobá ralidxeʼ ne biaʼ tapa hora bicábibe ca guendarinabadiidxaʼ napaʼ que ne Biblia. Gudxeʼ laabe guibiguétabe huadxí queca, ne byuidu diidxaʼ dede gunda galaa gueelaʼ. Cumu nabé guyuuladxeʼ ni cayunadiaʼgaʼ que la? gunabadiidxaʼ laabe pa zanda chiniáʼ laabe sti dxi que para guuyaʼ ximodo riníʼnebe xcaadxi binni de Biblia. Nabé bidxagayaa modo riquiiñeʼ Testigu que Biblia para guicabi cani rinabadiidxaʼ binni laa. Ngue runi gudixhe iqueʼ guneʼ cásica cayúnibe que.

Bituaa negocio napaʼ que ne yegucheecheniáʼ precursor que diidxaʼ, zacá nga rabi ca testigu stiʼ Jiobá cani riquiiñeʼ stale de tiempu stiʼ para guiniʼné binni de Dios. Guyuaaniʼsaʼ lu beeu mayo stiʼ iza 1948 ndaaniʼ Estadio Cow Palace de San Francisco (California). Gudiʼdiʼ si ti iza gucaʼ precursor.

Laga cazaaca guiráʼ nga, gunabaʼ ca Testigu chigánnacaʼ jñaaʼ. Laabe nabé guyuuláʼdxibe yegánnacabe laabe ne qué nindaa guyuunísabe. Qué ñuu dxi ñuulaʼdxiʼ binnilídxibe ni bíʼnibe que, peru qué nusaana jñaaʼ de ñuni ni na Dios dede dxi gutiʼ, raca caadxi iza atrá. Laasidu gúcadu Testigu ndaaniʼ familia stidu.

Lu iza 1950 yendezaʼ Grand Junction (Colorado), raqué binebiaʼyaʼ Billie. Laabe gúlebe lu iza 1928 ne biniisibe tiempu ni biree lá Gran Depresión. Guiráʼ gueelaʼ ruundané jñaabe ni láʼ Minnie laabe Biblia lu biaaniʼ stiʼ ti linterna. Dxi maʼ napa Billie tapa iza, mápeca nanna guʼndaʼ ne maʼ nanna stale historia zeeda lu Biblia de memoria. Ra ziluxe década stiʼ 1940, bizulú biindané ca testigu stiʼ Jiobá jñaabe de Biblia ne raqué biziidiʼ cadi ti lugar ra chigacaná binni nga infiernu ca, sínuque ti lugar ra caziilaʼdxiʼ ca gueʼtuʼ (Eclesiastés 9:5, 10). Minnie ne xheelaʼ gúcacaʼ Testigu.

Ndaaniʼ guidxi Boston nga guyé Billie universidad, peru lu iza 1949 bibiguétabe ra lídxibe ne bizulú biziidibe de Biblia. Lugar de ñácabe maestra, gudixhe íquebe gúnibe ni na Dios lu xquendanabánibe.  Guyuunísabe lu iza 1950 lu ti guendaridagulisaa stiʼ stale guidxi biʼniʼ ca testigu stiʼ Jiobá ndaaniʼ Estadiu stiʼ equipu Yankees de Nueva York. Caadxi iza despué binibiaʼdu, bichaganadu ne bizuludu bínidu jma lu xhiiñaʼ Dios.

Primé guidxi guyuudu nga Oregón. Bizuludu ne guidxi Eugene, ra gúpadu stale xhamígudu. Lu iza 1953 yendézadu Grants Pass para gacanedu ti neza binni ridagulisaa nahuiiniʼ nuu raqué. Laaca lu iza que biʼniʼ invitárcabe laadu para chuudu Scuela stiʼ Galaad lu clase númeru 23, ti cursu ni rudii ca testigu stiʼ Jiobá ndaaniʼ guidxi South Lansing cani raca misioneru, ni nuu biaʼ 400 kilómetru ladu guiahuiiniʼ si de neza ra rindani Gubidxa de guidxi Nueva York.

Lu beeu diciembre stiʼ iza 1954, gaayuʼ beeu despué de bindúʼxedu Scuela stiʼ Galaad, naa ne Billie, gudxíbadu lu ti avión napa chupa motor ni zeʼ neza Brasil. Ti hora de ziuudu lu bi que málasi bizulú guca feu tobi de ca motor stini ngue runi gupa xidé biétedu Bermudas. Despué de ngue gupa xidé biétedu sti biaje peru yanna maʼ guidxi Cuba, ne despué de treinta y seis hora de ziuudu ni ruluíʼ qué niluxe yendadu ra nuu sucursal stiʼ ca testigu stiʼ Jiobá ni nuu ndaaniʼ guidxi Río de Janeiro (Brasil).

Despué de gulézadu raqué ti tiempu si, naa ne Billie ne xhupa misionera guyuudu guidxi Bauru (São Paulo) para bixhéledu ti yoo para ca misioneru. Nabeza biaʼ 50,000 binni ndaaniʼ guidxi que ne laasidu nácadu Testigu raqué.

Bizuludu guyuudu ra lidxi ca binni de raqué, peru cura nuu raqué nabé riziñe laadu ora maʼ cayúnidu dxiiñaʼ riʼ: maʼ nándabe laadu ne rábibe ca binni que cadi gucaadiágacaʼ laadu. Peru bidxéladu ti familia naroʼbaʼ ni bizulú bíʼndanedu laaca de Biblia. Caadxi si semana de cayuundacaʼ gudixhe íquecaʼ gácacaʼ Testigu ne guyuunísacaʼ. Despué laaca guyuu xcaadxi binni gunacaʼ gúʼndanedu laaca Biblia.

Familia ni guyuunisa que nápacaʼ ti binnilídxicaʼ naca presidente stiʼ ti club social. Guninedu laabe para gunidu ti guendaridagulisaa roʼ ndaaniʼ club que. Ora gunna cura que ni la? gucaláʼdxibe nucueezabe laadu de ñúnidu ni, peru bidagulisaané presidente stiʼ club que xcaadxi socio stini ne gúdxibe laacaʼ: «Pa maʼ qué gudiitu lugar gácani la? maʼ qué zuneniáʼ laatu dxiiñaʼ». Zaqué gunda bínidu guendaridagulisaa roʼ que.

Sti iza que, lu 1956, yenedu biaʼ cuarenta Testigu de neza binni ridagulisaa stidu ti guendaridagulisaa roʼ ni gucaʼ Santos (São Paulo) lu tren. Ora bibiguétadu Bauru, biindaʼ ti carta biseendacabe ra nuaaʼ ra cayábicabe naa chigannaʼ ca neza binni ridagulisaa stiʼ ca testigu stiʼ Jiobá casi superintendente viajante. Bineʼ dxiiñaʼ que casi veinticinco iza ne zaqué binibiaʼdu casi guidubi naca Brasil.

Tiempu que nabé nagana para cheʼ binni paxaraa, purtiʼ nápadu xidé chuudu lu autobús, tren, carreta, bicicleta o nuu biaje riuudu a pie. Tobi de ca guidxi yegánnadu primé nga Jaú (São Paulo). Raqué bicaalú cura que laadu.

Sicaríʼ gúdxibe laadu: «¡Qué zanda diʼ guiníʼnetu ca dendxuhuiiniʼ stineʼ!».

Peru laadu bicábidu laabe: «Cadi stiʼ diouʼ laacabe. Stiʼ Dios laacabe».

Gudíxhedu gutiididu ti película ni rusiene de dxiiñaʼ rúninu lu guidubi naca Guidxilayú ni láʼ La Sociedad del Nuevo Mundo en acción, peru cura que guyé yegucaalú laadu né ti grupu de xpinni. Casi gúnnadu la? guninedu puliciá. Ora bedandá cani zedagucaalú laadu ra nuu teatro que la? Biiyacabe cayapa caadxi  puliciá raqué ne nudxiicaʼ ca guiibaʼ sticaʼ neza zeedacabe que. Nabé guyuulaʼdxiʼ ca binni que película que.

Guiráʼ ladu chuudu ridúʼyadu modo nanalaʼdxiʼ ca xaíque yuʼduʼ que laadu. Casi ndaaniʼ guidxi Brusque, ni nuu gaxha de Blumenau (Santa Catarina), binibiaʼdu chupa precursora. Laacabe bicheechecabe diidxaʼ ti lugar nabé bicaalú binni laacabe, peru pur biʼniʼ huantárcabe guluu Dios ndaayaʼ dxiiñaʼ bíʼnicabe. Yanna, despué de cincuenta iza, maʼ nuu jma de sesenta neza binni ridagulisaa raqué, zaqueca maʼ nuu ti Yoo ra raca guendaridagulisaa roʼ nabé sicarú ndaaniʼ guidxi nuu cueʼni láʼ Itajaí.

Tobi de ca cosa jma guyuuláʼdxidu gúnidu ora chigánnadu ca neza binni ridagulisaa que nga, quixhe chaahuidu guiráʼ ni caquiiñeʼ para gapa ca xpinni Cristu guendaridagulisaa roʼ sticaʼ. Biaʼ lu iza 1975 gucaʼ superintendente stiʼ guendaridagulisaa roʼ ni gucaʼ lugar ni láʼ Estadio Morumbi. Gunábadu biaʼ ti gayuaa neza binni ridagulisaa guseendacaʼ chii binni cada tobi de laacani para chigusiacaʼ estadiu que ti gueelaʼ ante gacaʼ guendaridagulisaa roʼ que.

Gueelaʼ que, caadxi de cani gudxite futbol raqué biʼniʼ burlacaʼ laacabe ora zireecaʼ ndaaniʼ estadiu que ne nacaʼ: «¡Biaa ca gunaa ca né gubaʼyahuiiniʼ sticaʼ biaa!». Né ca «gubaʼyahuiiniʼ» que nga bisaanadu estadiu que nayaguieʼ biaʼ galaa gueelaʼ. Administador stiʼ lugar que guníʼ: «¡Ti semana ninedu para ñúnidu ni bíʼnitu panda si hora ca!».

Lu iza 1980 guti bixhozeʼ; qué nindaa de ngue bibiguétadu Estados Unidos para gápadu jñaaʼ ndaaniʼ guidxi Fremont (California). Bidxéladu dxiiñaʼ de gusiadu edificiu huaxhinni para cadi gusaana de gácadu precursor ne gacanedu ca binni ni riníʼ diidxaʼ portugués. Despué yendézadu ti lugar láʼ valle de San Joaquín, cadi tan zitu de Fremont. Raqué laaca biyúbidu ca binni riníʼ diidxaʼ portugués, biaje riʼ bínidu ni dede lugar ni láʼ Sacramento hasta Bakersfield. Yanna maʼ nuu chii neza binni ridagulisaa de diidxaʼ ca California.

Dxi gutiʼ jñaaʼ, lu iza 1995, guyuudu Florida para gápadu bixhoze Billie dede dxi gutiʼ. Jñaabe dede lu iza 1975 guti. Lu iza 2000 yendézadu lu ti desiertu nuu ladu guetehuiiniʼ si de neza ra rindani Gubidxa de guidxi Colorado. Raqué biquiiñedu tiempu stidu para guinínedu ca navajo ne ca utes ni nuu Estados Unidos de Biblia. Peru triste ni bizaaca, guti Billie lu beeu febrero 2014.

Maʼ gudiʼdiʼ jma de sesenta y cinco iza dede dxi bicabi ti testigu stiʼ Jiobá naa cani gunabadiidxaʼ laa ne Biblia. ¡Guizáʼ nayecheʼ runeʼ sentir pur bicaadiagaʼ laabe ne guuyaʼ dxandíʼ guiráʼ ni gúdxibe naa que! Pur laacani, bidieeʼ xquendanabaneʼ Dios para guneʼ ni na... ne stale ni maʼ guleenduáʼ.