Dxi jma nahuiineʼ gulézadu gaxha de Leipzig, ndaaniʼ guidxi ni biree lá República Democrática Alemana, gaxha de ra dxaaga guidxi Polonia ne República Checa. Dxi napaʼ 6 iza yendézadu Brasil pur dxiiñaʼ ni runi bixhozeʼ, ne despué yendézadu Ecuador.

Dxi napaʼ 14 iza, biseendaʼ bixhozeʼ ne jñaa naa ndaaniʼ ti internadu ni nuu Alemania para chaaʼ scuela. Yanna, ra maʼ nuaaʼ zitu de laacabe maʼ naa ruuyaʼ xi guneʼ. Maʼ guirutiʼ ñuni mandar naa ne maʼ qué niníʼ iqueʼ pa ruchiichi ca cosa runeʼ xcaadxi binni.

Bibiguetaʼ bixhozeʼ ne jñaa Alemania dxi maʼ napaʼ 17 iza. Nacubi ga que la? tobi si ra gulézadu, peru cumu qué riuuladxeʼ chuʼ tu guni mandar naa la? guca nagana para naa nuzuubaʼ stiidxacabe ne dxi bisaaʼ 18 iza biree de ra lidxeʼ.

Cumu zeʼ dxi jma maʼ ridxiicheʼ pur guiráʼ ni maʼ bizaaca lu xquendanabaneʼ la? ngue runi bicaa iqueʼ gannaʼ xi pur nabaneʼ. Biiyaʼ modo nabani ca binni nuu lu xiixa grupu ne despué de ngue gudixheʼ iqueʼ chaaʼ guiráʼ lugar nuu lu Guidxilayú sicarú riʼ ante gunitilú binni ni.

Guziéʼ ti motocicleta, biree de Alemania ne ziaaʼ África. Peru, qué nindaa de ngue bibiguetaʼ Europa purtiʼ nabé maʼ caxiiñeʼ moto que. Bineʼ chaahueʼ siaʼ ni la? biree ne guyaa ruaa ti playa stiʼ Portugal. Raqué nga guníʼ iqueʼ gusaana moto que ne maʼ chaaʼ xcaadxi lugar peru maʼ lu barcu.

Bidaaguaʼ xcaadxi hombrehuiiniʼ ne dxaapahuiiniʼ dxi cayuucaʼ listu para tiidicaʼ lu océano Atlántico. Ládecabe nuu Laurie, gunaa ni bichaganaʼyaʼ despué. Guyuudu lu ca isla stiʼ nisadóʼ Caribe ne despué guyuʼdu ti tiempu Puerto Rico, bibiguétadu Europa. Naa ne Laurie biyúbidu ti barcu ni napa vela para cuézadu ndaaniʼ. Peru despué de chonna beeu de cuyúbidu ni, bisaanadu de guyúbidu ni, purtiʼ guluucabe naa lade ejércitu stiʼ Alemania.

Guyuuaʼ ti iza chonna beeu lade Marina, ne tiempu que nga bichaganadu. Despué de ngue gudixhe íquedu chigunibiaʼdu xcaadxi lugar. Ante chinécabe naa lu ejércitu que, guzidu ti lancha ne chaahuiʼ chaahuiʼ bínidu ni ti barcuhuiiniʼ  napa vela dxi maʼ nuaaʼ lu ejercitu. Guníʼ íquedu cuézadu ndaaniʼ ni ne chuudu xcaadxi lugar. Cásipeʼ bireeʼ de lade Marina, dxi mayaca guilúxedu barcu que, guniʼné ca testigu stiʼ Jiobá laadu de stiidxaʼ Dios ne biindanecaʼ laadu Biblia.

Nacubi bizulú cazíʼdidu de Biblia, qué niníʼ iqueʼ pa caquiiñeʼ guchaaʼ stale cosa lu xquendanabaneʼ purtiʼ rabeʼ maʼ bichaganaʼyaʼ gunaa ni nabezaniaʼ que ne maʼ bisaana de cubaʼ gueza (Efesios 5:5). Laaca guníʼ iqueʼ jneza ngue iquiiñeʼ xquendanabaneʼ para chaaʼ guiráʼ ladu lu Guidxilayú para chigunebiaʼyaʼ ca cosa sicarú bizáʼ Dios.

Peru nuuruʼ xcaadxi cosa ni caquiiñeʼ guchaaʼ lu xquendanabaneʼ. Caʼruʼ gusaana de guchaya bi yanneʼ ne laaca qué riuuladxeʼ chuʼ tu guni mandar naa, ne laaca riuuladxeʼ guʼyaʼ binni ca cosa ni randa runeʼ ne gabeʼ laacaʼ xi guiráʼ maʼ bineʼ. Guníʼ iqueʼ jma risacaʼ que guiráʼ binni.

Ti dxi biindaʼ libana ni bidii Jesús lu dani ni nabé runibiáʼ binni (Mateo, capítulo 5 dede 7). Ra bizuluáʼ cayuundaʼ libana riʼ qué ñénediáʼ ximodo nga na Jesús chuʼ binni nayecheʼ. Purtiʼ lu libana que bizeetebe cani candaana ne cani cayati nisa nga cani riuu nayecheʼ (Mateo 5:6). Peru gunabadiidxaʼ laaca naa ximodo nga chuʼ binni nayecheʼ pa candaana ne cayati nisa. Ra jma maʼ ziziideʼ de Biblia bidieeʼ cuenta guiráʼ binni caquiiñeʼ chuʼ gaxha de Dios, peru para ganda chuʼ binni gaxha de Dios la? primeru naquiiñeʼ gudii cuenta caquiiñeʼ gúnini. Zacapeʼ nga guníʼ Jesús: «Nayecheʼ cani nanna naquiiñeʼ chuʼ gaxha de Dios» (Mateo 5:3,TNM).

Naa ne Laurie bizuludu bidúʼndadu Biblia Alemania, peru yendézadu Francia ne despué Italia. Ladu tiica chuudu nuu ca testigu stiʼ Jiobá. Ti cosa ni nabé bidxagayaaʼ de laacabe nga pabiáʼ nadxiisaacabe ne modo nuucabe tobi si. Ne nadxiicabe guiráʼ hermanu stícabe ni nuu lu guidubi naca Guidxilayú (Juan 13:34, 35). Ra gudiʼdiʼ dxi guyuunísadu.

Neca maʼ nacaʼ testigu stiʼ Jiobá, qué nusaanaʼ de nuchaaʼ modo naa. Naa ne Laurie maca gudixhe íquedu chuudu chigunibiaʼdu costa stiʼ África ne tiididu océano Atlántico dede chindadu Estados Unidos. Dxi maʼ ziuudu biaʼ galaa nisadóʼ que, naa siaʼ ne xheelaʼ ziuudu lu ti barcuhuiiniʼ ne puru nisa si cadúʼyadu, raqué nga bidieeʼ cuenta gastiʼ nga laadu cueʼ Dios ni bizáʼ guiráʼ xixé ni nuu. Cumu gastiʼ zanda guneʼ lu nisadóʼ que la? biindaʼ Biblia stinneʼ. Ne ora biindaʼ ca relatu ni caníʼ de guiráʼ ni biʼniʼ Jesús, bicaa cani naa guiníʼ iqueʼ. Neca gúcabe ti hombre ni qué ruchee ne bíʼnibe stale cosa ni bidxagayaa binni, peru qué ñúnibe cani para si gusisaca binni laabe. Ni jma risaca lu xquendanabánibe nga Bixhózebe, ne cadi laabe.

Ora guníʼ iqueʼ ejemplu stiʼ Jesús, bidieeʼ cuenta cadi galán diʼ iquiiñeʼ tiempu si ni runi sobra naa para guneʼ xhiiñaʼ Reinu, sínuque naquiiñeʼ gácani ni jma risaca lu xquendanabaneʼ (Mateo 6:33). Cásipeʼ yendadu Estados Unidos, gudixhe íquedu guiaanadu raqué para gúnidu ni na Dios ne maʼ cadi chigunibiaʼdu xcaadxi lugar.

Dxiqué la? guníʼ iqueʼ jma risacaʼ que guiráʼ binni, ne qué niníʼ iqueʼ xi zabeenduáʼ pur cani guneʼ. Yanna maʼ bidxelaʼ ti cosa ni racané binni guni ni jneza (Isaías 48:17, 18). Yanna, maʼ nannaʼ xi pur nabaneʼ: guneʼ adorar Dios ne gacaniáʼ binni gunibiáʼ laabe.

Nabé maʼ galán modo nabaneniáʼ Laurie purtiʼ rinándadu ca conseju zeeda lu Biblia. Ne maʼ gucuaadu ti ndaayaʼ stiʼ Dios ra gúpadu ti dxaapahuiiniʼ sicarú, laabe laaca maʼ nánnabe tuu nga Dios ne maʼ nadxiibe laa.

Zeeda gaca guiráʼ ni huadídidu casi ora ñuudu lu nisadóʼ ora rundubi ti bi yooxhoʼ. Peru qué huayuu dxi gusaana Jiobá laadu ne maʼ gudixe íquedu cadi gusaana de gúnidu ni nabe ne laaca runi credu zacanebe laadu (Proverbios 3:5, 6).