Millón de binni runi cré guiráʼ ni chiguni Reinu stiʼ Dios. Nga runi rinándacaʼ ni biʼniʼ mandar Jesús ca discípulo stiʼ. Laa biʼniʼ mandar laacabe guinábacabe: «Biseendaʼ reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mateo 6:10, TNM).

Peru neca stale binni racalaʼdxiʼ ganna de Reinu riʼ, stale de ca religión ca qué rusiidicaʼ de laani. Historiador H. G. Wells bidxagayaa modo bisaca para Jesús guiníʼ de ti «Reinu ni nuu Guibáʼ», peru qué lica rieeteʼ de Reinu riʼ lu «guiráʼ ni runi stale de ca religión ca ne ora maʼ cusiidicaʼ».

Peru maʼ gadxé ca testigu stiʼ Jiobá de xcaadxi religión, purtiʼ laadu qué rusaanadu de gusíʼdidu de Reinu stiʼ Dios. Casi revista ni cayuundaluʼ riʼ, nabé runibiáʼ binni ni, rireeni lu 220 diidxaʼ. Ne cada númeru stiʼ revista riʼ raca imprimir biaʼ 46 millón de laani, nga runi laani nga revista jma ruundaʼ binni lu Guidxilayú. Peru, xi tema jma rusiidini yaʼ. Biiyaʼ título stini ca: Torre stiʼ ni rapa. Ni caníʼ de Reinu stiʼ Jiobá.  *

Xiñee rúnidu stipa pur guinidu de Reinu riʼ yaʼ. Purtiʼ laani nga ni jma rusiidiʼ Biblia, libru jma risaca nuu lu Guidxilayú. Ne laaca runi credu Reinu si stiʼ Dios nga zanda guni chaahuiʼ guiráʼ guendanagana ni runiná binni guidxilayú.

Ni cayúnisidu nga zinándadu ejemplu stiʼ Jesús. Ni jma risaca para Jesús nga guni ni ná Reinu stiʼ Dios lu xquendanabani ne de laani nga ni jma bisiidibe dxi guyuube lu Guidxilayú (Lucas 4:43). Xiñee nabé bisácani para laabe yaʼ. Xi zanda guni Reinu ca pur lii yaʼ. Runi invitardu lii gúʼyaluʼ ximodo ricabi Biblia ca guendarinabadiidxaʼ ca lu xcaadxi tema stiʼ revista riʼ.