Guleʼ ndaaniʼ guidxi Bakú (Azerbaiyán), gupa jñaaʼ ne bixhozeʼ chupa xiiñidxaapaʼ ne naa nga ni jma nahuiiniʼ. Nécapeʼ bixhozeʼ guca musulmán ne jñaaʼ guca judía, que ñuu dxi nidindecabe purtiʼ si gadxé religión stícabe. Nabé gunnaxhiicabe. Ora guni ayunar bixhozeʼ lu beeu ramadán, runi respetar jñaaʼ laabe, ne ora guni jñaa Pascua la? Ngueca runi bixhozeʼ né laabe. Ra lídxidu gúpadu libru Corán, Torá ne Biblia.

Bineʼ cré guirá ni rusiidiʼ ca musulmán. Neca bineʼ cré nuu ti Dios, peru guyuu cosa ni qué ñeneʼ. Rinabadiidxaʼ laca naa: «Xiñee bizaʼbe laanu. Xiñee naquiiñeʼ tiidiʼ binni lu guendanagana ne despué tiidiruʼ jma yuubaʼ ndaaniʼ ti infiernu yaʼ». Stale binni na rizaaca ca cosa ca purtiʼ zacá nga na Dios gacaʼ cani, nabé rucaa ngue naa guiníʼ iqueʼ: «Ñee riguite Dios laanu casi títere la? Riéchebe ora gúʼyabe cayacananu la?».

Dxi napaʼ 12 iza bizuluáʼ bineʼ namaz, gaayuʼ oración runi ca musulmán guiráʼ dxi. Ca dxi que ca bicaa bixhozeʼ laʼyaʼ ne lá bendaʼ ra ti scuela stiʼ ca judíu. Raqué bizíʼdidu hebreu ne de religión. Guiráʼ dxi runi orardu casi runi ca judíu. Ra lídxidu runeʼ namaz ne ra scuela runeʼ ca oración stiʼ ca judíu.

Gupaʼ stale guendarinabadiidxaʼ ne gupaʼ gana ñannaʼ ni dxandíʼ de laacani. Gatigá gunabadiidxaʼ ni ca rábinu nuu ra scuela que: «Xiñee bizáʼ Dios laanu. Ñee riuuláʼdxibe naca bixhozeʼ musulmán la? Bixhozeʼ nabé nachaʼhuiʼ, xiñee natu cadi nacháʼhuibe yaʼ. Yanna, pa cadi nacháʼhuibe, xiñee bizáʼ Dios laabe yaʼ». Huaxiéʼ bicuudxicabe naa ne modo bicábicabe ca guendarinabadiidxaʼ ca.

Lu iza 2002 bizaaca ti cosa ni bicaa naa maʼ cadi guneʼ cré Dios. Yendézadu Alemania, ti semana de nuudu raqué, bidii ti derrame cerebral bixhozeʼ ne biaanabe casi ti gueʼtuʼ. Maʼ xadxí de rinabaʼ Dios gapaʼ binnilidxeʼ. Nannaʼ dxiicheʼ laasibe zanda gulabe xquendanabáninu, ngue runi guiráʼ dxi rinabaʼ laabe  gacanebe bixhozeʼ. Guníʼ iqueʼ cumu nabé nandxoʼbe la? cadi nagana para gúnibe ni canabaʼ laabe que. Bineʼ cré zucaadiágabe naa, peru últimu guti bixhozeʼ.

Bineʼ sentir qué rizaalaʼdxiʼ Dios binni, ne nabé bininá ni naa. Guníʼ ique chupa cosa: «O qué gannaʼ guneʼ orar la? o cadi dxandíʼ nuu Dios». Maʼ qué ñannaʼ xi ñuneʼ ngue runi bisaanaʼ de guneʼ orar. Ne nin xcaadxi religión maʼ qué ñacanecaʼ naa, dede guníʼ iqueʼ cadi dxandíʼ nuu Dios.

Xhoopaʼ beeu despué, bixhidxináʼ ca testigu stiʼ Jiobá ra puertaʼ lídxidu. Para laadu cadi jneza ni rusiidiʼ ca religión ni na zinanda Cristu, ngue runi naa né bendaʼ gucaláʼdxidu nuluidu laacabe cadi jneza ni rusiidicabe. Gunabadiidxadu laacabe: «Xiñee runi adorar cani na zinanda Cristu bidóʼ, cruz, Jesús ne María, pa lu Chii Mandamientu que na cadi naquiiñeʼ gúnicabe ni yaʼ». Biquiiñecabe Biblia para biluíʼcabe laadu cani dxandíʼ xpinni Cristu cadi naquiiñeʼ guni adorarcaʼ bidóʼ ne ora guni orarnu la? Dios si nga naquiiñeʼ guinínenu. Nabé bidxagayaa modo bicábicabe naa.

Despué gunabadiidxadu laacabe: «Laga xi rábitu laadu de Trinidad yaʼ. Pa Jesús nga Dios, ximodo beedabe lu Guidxilayú riʼ ne biiticabe laabe yaʼ». Biquiiñecabe Biblia sti biaje para bisiénecabe laadu cadi Jesús diʼ nga Dios ne cadi biaʼca laabe Dios. Ne gúdxicabe laadu pur laani nga runi qué runi crécabe Trinidad. Óraque guníʼ iqueʼ: «¡Nayaahui ni runi cré ca binni riʼ!».

Peru gunabadiidxaruaʼ laca naa xiñee rati binni ne xiñee rudii Dios lugar gacananu. Despué biluíʼcabe naa ti libru ni láʼ El conocimiento que lleva a vida eterna; * lu libru que zeeda caadxi capítulo ni ricabi ca guendarinabadiidxaʼ que. Oraqueca bizuluáʼ bineʼ estudiar Biblia né laacabe.

Cada biaje ridúʼndadu jneza modo ricábicabe naa, ne guiráʼ biaje riquiiñecabe Biblia para gúnicabe ni. Biziideʼ Jiobá nga láʼ Dios ne nabé rusihuínnibe nadxiibe binni (Salmo 83:18; 1 Juan 4:8). Bizáʼ Dios laanu purtiʼ racalaʼdxiʼ gudii laanu guendanabani. Bieneʼ neca rudiibe lugar guizaaca ca cosa ni cadi jneza ca, nanaláʼdxibe cani ne mayaca gunduuxebe cani. Laaca biziideʼ pur bichee Adán ne Eva nga cadiʼdiʼ binni lu stale yuubaʼ (Romanos 5:12). Tobi de laacani nga ora gatiʼ ti binnilídxinu ni nadxiinu, casi bixhozeʼ. Peru lu guidxilayú cubi ni cudii stiidxaʼ Dios laanu ca, zaree guiráʼ ni cayuniná laanu, ne cani maʼ guti ca ziásacaʼ sti biaje (Hechos 24:15).

Bicabi Biblia cani racaladxeʼ gannaʼ. Zaqué bineʼ cré Dios sti biaje. Chaahuiʼ chaahuiʼ jma binebiaʼyaʼ ca testigu stiʼ Jiobá ne biiyaʼ dxandíʼ nadxiisaacabe neca de gadxé gadxé guidxi laacabe. Nabé bidxagayaa modo laacabe (Juan 13:34, 35). Guiráʼ ni biziideʼ de Dios que bicaacani naa guneʼ xhiiñabe ne gudixheʼ iqueʼ gacaʼ testigu stiʼ Jiobá. Guyuaanisaʼ 8 stiʼ enero 2005.

Pur modo ricabi Biblia cani rinabadiidxaʼ, yanna maʼ gadxé modo ruuyaʼ guendanabani ca ne jma maʼ ratadxí ladxiduáʼ. Gannaʼ zusibani Dios bixhozeʼ sti biaje ribaʼquidxini ladxiduáʼ ne riguuni naa nayecheʼ (Juan 5:28, 29).

Maʼ xhoopaʼ iza de bichaganaʼyaʼ ti xpinni Cristu láʼ Jonathan. Maʼ bizíʼdidu dxandíʼ ni na lu Stiidxaʼ Dios, cadi nagana para guiene binni ni ne nabé risaca ni. Nga runi riuuláʼdxidu guinínedu binni de laani ne de ca ndaayaʼ cabézanu guicaanu. Yanna maʼ nannaʼ cadi nayaahui diʼ cani runi cré ca testigu stiʼ Jiobá, sínuque dxandíʼ xpinni Cristu laacabe.