Omar: Zuluaʼsiaʼ qué zanda diʼ güinu diidxaʼ, purtiʼ huaxiéʼ riuuladxeʼ guinieeʼ de religión.

Bruno: Xquíxepeʼ lii pur cayaʼbuʼ ni naa. Naa laʼyaʼ Bruno. Lii yaʼ, tu laluʼ.

Omar: Naa laʼyaʼ Omar.

Bruno: Xquíxepeʼ lii, Omar.

Omar: Maca nannuʼ.

Bruno: Ñuuladxeʼ ninabadiidxaʼ lii xiixa: ñee guyuuluʼ lade ti religión dxiqué la?

Omar: Guyuaaʼ, dxi gucaʼ baʼduʼ. Peru bisaanaʼ ni dxi bireeʼ ra lidxeʼ para chaaʼ universidad.

Bruno: Cayeneʼ lii. Xidé bíʼndaluʼ ra universidad yaʼ.

Omar: Biindaʼ de Historia ne Ciencias sociales, purtiʼ riuuladxeʼ gannaʼ xi guiráʼ maʼ biʼniʼ binni lu Guidxilayú.

Bruno: Dxandíʼ, galán ganna binni de laani. Zándaca laaca nannuʼ zeeda stale historia lu Biblia. Ñee huayuundaluʼ libru riʼ la?

Omar: Coʼ. Nannaʼ galán libru ca, peru qué huaníʼ íquediaʼ pa zeeda historia luni.

Bruno: Cayuuyaʼ riuuláʼdxiluʼ gánnaluʼ stale cosa. Pa napuʼ chupa chonna minutu la? ñuuladxeʼ nulueeʼ lii caadxi ejemplu ni rusihuinni dxandíʼ guiráʼ historia zeeda lu Biblia.

Omar: Napaʼ, peru qué gápadiaʼ Biblia.

Bruno: Cadi guizaalaʼdxuʼ. Raríʼ napaʼ tobi. Primé la? guidúʼndanu 1 Crónicas capítulo 29, versículo 26 ne 27. Textu riʼ na sicaríʼ: «Biʼniʼ mandar David, xiiñiʼ Jesé, casi rey guidubi naca Israel; ne guiráʼ ca dxi biʼniʼ mandarbe Israel bizaa cani cuarenta iza. Biʼniʼ mandarbe gadxe iza Hebrón, ne biʼniʼ mandarbe treinta y tres iza Jerusalén».

Omar: Ximodo rusihuinni ejemplu riʼ dxandíʼ ni zeeda lu Biblia yaʼ.

Bruno: Dxiqué guyuu caadxi binni ni guníʼ cadi dxandíʼ diʼ historia stiʼ David riʼ, sínuque ti cuentu si ni.

Omar: Dxandíʼ la? Xiñee yaʼ.

Bruno: Purtiʼ Biblia si nga libru ni riníʼ dxandíʼ bibani David. Peru lu iza 1993, bidxela caadxi arqueólogo ti monumentu de guié ra zeeda ca diidxaʼ riʼ: «Lidxi David» ne «rey stiʼ Israel».

Omar: Mmm... Galán nuu nga.

Bruno: Sti binni ni guníʼcabe cadi dxandíʼ bibani nga Poncio Pilatu, ti gobernador ni biʼniʼ mandar ca dxi stiʼ Jesús. Ruzeeteʼ Biblia laabe lu libru stiʼ Lucas capítulo 3, versículo 1, laaca zeeda lá xcaadxi binni ni biʼniʼ xhiiñaʼ gobiernu tiempu que.

Omar: Ajaʼ, raríʼ na sicaríʼ: «Naca Poncio Pilatu gobernador de Judea, naca Herodes gobernador de Galilea»...

Bruno: Biaʼsi. Xadxipeʼ guyuu stale binni  ni ruundaʼ de historia ni guníʼ cadi dxandíʼ diʼ bibani Poncio Pilatu. Peru raca biaʼ cincuenta iza bidxélacabe ti monumentu de guié lu Oriente Medio ra zeeda labe.

Omar: Ni guniʼluʼ riʼ huaxa qué lica huayunadiagaʼ ni.

Bruno: Peru galanpeʼ nga maʼ biziiduʼ ni.

Omar: Racaladxeʼ gabeʼ lii xiixa, nabé runeʼ respetar Biblia casi ti libru sicarú. Para naa la? qué zanda diʼ iquiiñeʼ ni tiempu stinu. Zándaca zeeda xiixa ni gacané laanu gánnanu de historia, peru ngasi.

Bruno: Stale binni riníʼ ique cásica riníʼ íqueluʼ, peru naa gadxé modo riníʼ iqueʼ. Chigusieneʼ lii xiñee. Yanna riʼ riquiiñenu ni guidoʼno, lari gácunu ne ti yoo ra gásinu. Laaca riquiiñeʼ guinínenu sti binni ne guibaninenu familia stinu nayecheʼ. Cadi dxandíʼ maca xadxí riquiiñeʼ binni ca cosa riʼ la?

Omar: Dxandíʼ pue.

Bruno: Nga runi, zanda gacané Biblia laanu gápanu guiráʼ ni caquiiñenu. Dxandíʼ maʼ nayooxhoʼ ni, peru zándaruʼ iquiiñenu ni yanna.

Omar: Raʼbuʼ zanda la?

Bruno: Zanda pue. Chigusieneʼ ni lii sti modo: cásica biquiiñeʼ ca conseju stiʼ Biblia dxi gucuá cani, zacaca zanda iquiiñeʼ cani yanna.

Omar: Biluíʼ naa ti ejemplu, ti guuyaʼ pa dxandíʼ ni.

Bruno: Zanda gacané Biblia laanu gánnanu ximodo jma jneza iquiiñenu xpuéltunu, gápanu ti familia nayecheʼ ne gánnanu tu gaca xhamígunu. Zeeda gácani casi ti mapa ni zanda guluíʼ laanu xi neza naquiiñeʼ chuunu. Chiguzeeteʼ ti ejemplu. Cadi dxandíʼ raca nagana para stale hombre gudii ni caquiiñeʼ familia stiʼ ne gusihuinni pabiáʼ runi respetar xheelaʼ la?

Omar: Dxandíʼ pue. Maʼ raca ti iza de bichaganaʼyaʼ, peru stale biaje raca nagana para naa ne xheelaʼ chuʼdu tobi si lu cani riníʼ íquedu.

Bruno: Biaa, zeeda caadxi conseju lu Biblia ni zanda gacané binni, cadi nagana diʼ cani ne ribeendú binni stale cosa sicarú ora chinanda cani. Guidúʼyanu tobi de laacani, zeeda ni lu Efesios capítulo 5, versículo 28. Ñuuláʼdxiluʼ ñuundaluʼ ni la?

Omar: Nani sicaríʼ: «Naquiiñe ganaxhii hombre xheela casi nadxii cuerpu stiʼ. Ni nadxii xheela la? nadxii laca laa».

Bruno: Xquíxepeʼ lii. Cadi dxandíʼ nibani ti familia jma nayecheʼ pa ninanda ti hombre conseju riʼ la?

Omar: Naa la? rabeʼ nibani xa. Guiráʼ binni niníʼ zanda guni ni, peru nagana para gaca ni.

Bruno: Dxandíʼ, purtiʼ guiranu rucheʼnu. Peru, nannuʼ xi la? laaca nuu sti textu ni cayabi laanu gácanu binni nachaʼhuiʼ. * Lu guiráʼ guendaxheelaʼ naquiiñeʼ ganna binni pora zanda guni xiixa ne pora cadi naquiiñeʼ guni ni. Nabé huayacané Biblia naa ne xheelaʼ gánnadu gúnidu zacá.

Omar: Biaʼsi nga ni guniʼluʼ.

Bruno: Laadu, ca testigu stiʼ Jiobá, nápadu ti sitiu lu Internet ra zeeda stale tema galán para ca guendaxheelaʼ ne para ca familia. Né chupa minutu si zanda gulueeʼ lii xi nuu lu sitiu riʼ.

Omar: Biaʼsi, qué zuniteʼ gastiʼ né chupa minutu.

Bruno: Sitiu riʼ nga www.pr418.com/zai. Ndiʼ nga primé yaza stini.

Omar: Cayuuladxeʼ ca foto rihuinni raríʼ.

Bruno: Laacabe nga ca xcompañeruaʼ ni cucheeche diidxaʼ lu guidubi Guidxilayú. Raríʼ nuu ti sección ra na LIBRU NE REVISTA. Raríʼ zadxeʼluʼ revista ni jma nacubi ne xcaadxi publicación ni rusiidiʼ de gadxé gadxé tema, dede né ni rusiidiʼ de familia. Guidúʼyanu ti ejemplu ni zeeda lu folletu riʼ Ca diidxaʼ sicarú ni zeeda de Dios. Tobi de ca tema stiʼ folletu riʼ láʼ sicaríʼ: «Ximodo zanda guibani binni nayecheʼ né binnilidxi».

 Omar: Galán nuu tema riʼ. ¡Ndipeʼ nga ni caquiiñeʼ!

Bruno: Lu tema riʼ zeeda caadxi conseju ni zanda gacané lii chuʼluʼ nayecheʼ lu guendaxheelaʼ stiuʼ. Guidúʼyanu xiná párrafo ra zeeda guiropa guendarinabadiidxaʼ riʼ. Omar, ñee zanda gúʼndaluʼ ca diidxaʼ zeeda ra ziluxe párrafo riʼ la?

Omar: Zanda pue. Nani sicaríʼ: «Cani maʼ bichaganáʼ naquiiñeʼ gannaxhiisaacaʼ ne guni respetársaacaʼ. Ne cumu guirópacabe binni ruchee laacabe la? laaca naquiiñeʼ guiziidicabe gutiidiláʼdxicabe stóndacabe para ganda guibánicabe nayecheʼ». Jneza ni cusiidiʼ párrafo riʼ.

Bruno: Xquíxepeʼ lii. Laaca zeeda textu stiʼ Efesios 5:33 raríʼ. Zanda gúʼndaluʼ ni lu Biblia stinneʼ riʼ la?

Omar: Sicaríʼ na textu stiʼ Efesios 5:33 riʼ: «Naquiiñe ganaxhii hombre xheela casi nadxii laca laa, ne irá gunaa guni [respetar] xheelaʼ».

Bruno: Maʼ biiyuʼ xiná conseju riʼ la? Ndiʼ nga ni cusiidini: cada tobi de cani maʼ bichaganáʼ naquiiñeʼ gudii ni caquiiñeʼ xheelaʼ.

Omar: Ximodo, cadi cayénediaʼ lii.

Bruno: Biaa, cadi dxandíʼ riuulaʼdxiʼ guiráʼ hombre guni respetar xheelaʼ laa la? Ne cadi dxandíʼ riuulaʼdxiʼ guiráʼ gunaa gusihuinni xheelaʼ pabiáʼ nadxii laa la?

Omar: Dxandíʼ pue.

Bruno: Yanna, pa guyubi hombre riʼ modo gusihuinni pabiáʼ nadxii xheelaʼ la? qué zaca nagana para xheelabe guni respetar laabe. Ximodo ruuyuʼ nga.

Omar: Dxandíʼ, jneza ni guniʼluʼ.

Bruno: Maʼ raca biaʼ chupa mil iza de gucuá conseju riʼ, peru dede nagasi caquiiñeruʼ ni. Pa chinanda ca guendaxheelaʼ ni nani la? zacaneni laacaʼ gápacaʼ ni caquiiñecaʼ ne zabeenducaʼ stale cosa sicarú.

Omar: Yánnaruʼ cayuuyaʼ rusiidiʼ Biblia stale cosa ni qué huayuu dxi guiníʼ iqueʼ.

Bruno: Galán nga maʼ bieʼnuʼ xi rusiidiʼ Biblia. Ñee zanda güinu diidxaʼ raríʼ sti biaje la? Ñuuladxeʼ ñannaʼ xi riníʼ íqueluʼ de guionna guendarinabadiidxaʼ zeeda lu tema stiʼ folletu ni nápadu lu sitiu riʼ: «Ñee jneza nga gusaanaluʼ xheelaluʼ pa cadi nabézaneluʼ laabe nayecheʼ la?». *

Omar: Zanda pue. Zabeʼ xheelaʼ guundaniáʼ laa tema riʼ.