Ndaaniʼ ca yoo guyuu dxiqué gupa binni ti molinu para guni harina. Tobi de ca cosa ni runi ti gunaa o ti mozo guiráʼ dxi nga guʼtuʼ biidxiʼ. Ngue runi, biaa binni gunadiaga ridxi stiʼ molinu (Éxodo 11:5; Jeremías 25:10).

Huadxélacabe caadxi dibuju ne estatuahuiiniʼ stiʼ ca binni bibani Egipto dxiqué ni rusihuinni ximodo biquiiñeʼ binni molinu. Chupa guié ni: lu guiiche riguíxhecabe biidxiʼ ne riquiiñecabe xiiñiʼ guiiche para gúʼtucabe ni. Para ganda guʼtuʼ binni lu guiiche naquiiñeʼ ruzuxibi para guinaaze xiiñiʼ guiiche né guiropaʼ chu naʼ. De racá rúnibe stipa para ganda cubayube guié ca ne gucaanabe ni ti ganda guiuutu biidxiʼ ca. Ti libru na nanaa xiiñiʼ guiiche que biaʼ chupa o tapa kilu. Pa ugázecabe ni xadiaga tuuxa zanda gatiʼ (Jueces 9:50-54).

Nabé biquiiñeʼ binni molinu dxiqué para ganda gapa ni guibaniné familia stiʼ. Nga runi Biblia na: «Guirutiʼ zanda guicaa ti molinu de manu o guié stini casi prenda, purtiʼ casi ñaca nicaacabe xquendanabani tuuxa casi prenda» (Deuteronomio 24:6).

Biblia na «nuu né» Jesucristu Bixhoze «tobi si» (Juan 1:18). Ca diidxaʼ riʼ rusihuínnicani pabiáʼ gaxha nuu Jesús de Bixhoze ne nadxiisaacaʼ. Para guiénenu ni la? guidúʼyanu costumbre gúpacabe dxiqué.

Ca dxi stiʼ Jesús, gupa ca judíu costumbre de gatahuiinicaʼ lu ti camahuiiniʼ ora maʼ chitocaʼ gueta. Cada binni chitó ratacueʼ lu ti camahuiiniʼ ladu bigaʼ stiʼ lu ti almohadahuiiniʼ ne rudxiilú ladu nuu mexaʼ que. Cumu ratahuiinicabe la? randa riquiiñecabe nácabe ladu derechu. Sicaríʼ bisiene ti libru: «Ora gatahuiiniʼ ti hombre zacá, riaana íquebe gaxha de ladxidóʼ binni zuba cueʼbe ladu bigaʼ». Nga runi, ora guni tuuxa zacá la? riníʼcabe nuucabe tobi si né tuuxa.

Nabé risaca para tuuxa ora cuiʼ cueʼ xaíque stiʼ ti familia o cueʼ tuuxa ni cayuni ti saa. Ngue runi, ora biʼniʼ Jesús últimu guendaroxhi né ca discípulo stiʼ, ni guyuuné laabe tobi si nga apóstol Juan, «dxa discípulu nadxii be que». Biblia na gudixhe ique Juan ladxidoʼbe ora gunabadiidxaʼ laabe xiixa (Juan 13:23-25; 21:20).