TEMA STIʼ PORTADA | XI RINÍʼ IQUE DIOS DE GUERRA
Modo biʼyaʼ Dios guerra lu primé siglu
Nabé cayacaná guidxi riʼ. ¡Nanna pabiáʼ biʼniʼ orar ca judíu ni bibani lu primé siglu que para guinábacaʼ gacané Dios laacaʼ tantu cuquiichináʼ imperiu stiʼ Roma laaca yaʼ! Biáʼsipeʼ tiempu que nga beeda Jesús, ne nuu tu gunabadiidxaʼ pa laabe ngue Mesías ni nexheʼ gueeda que. Ngue runi, gulézacaʼ «ulá be ca binni Israel» de lu náʼ ca romanu (Lucas 24:21). Peru qué nulabe laacaʼ casi cabézacaʼ gácani, ne ni jma triste nga lu iza 70 binitilú ejércitu stiʼ Roma Jerusalén ne yuʼduʼ stiʼ.
Xiñee qué nidinde Dios pur ca judíu casi biʼniʼ dxiqué yaʼ. Xiñee qué nudiibe lugar nidíndecaʼ para nilacaʼ yaʼ. Ñee maʼ bichaa Dios modo riníʼ ique de guerra la? Coʼ. Ni bichaa nga bisaana ca judíu que Dios, qué ninacaʼ ñuni crecaʼ Jesucristu nga Mesías ni gueeda que (Hechos 2:36). Ngue runi, bisaana Dios laacabe ne maʼ qué ñácacabe xquídxibe (Mateo 23:37, 38).
Bisaana Dios de ñacané ca judíu ne maʼ qué ñapa layú ni bidii laacabe que. Ngue runi, maʼ qué zanda diʼ guiníʼcabe zacané Dios laacabe para tindenécabe xiixa guidxi. Casi maca guníʼ Jesús, maʼ qué ñacaneruʼ Dios guidxi Israel ne maʼ qué ñaparucaʼ ndaayaʼ stibe. Yanna la? maʼ sti guidxi nga chiguicaa ndaayaʼ stibe: Israel stiʼ Dios (Gálatas 6:16; Mateo 21:43). Gulí Dios ti grupu de xpinni Cristu ne laacaʼ nga guidxi ca. Ngue runi, gúdxicabe laacaʼ lu primé siglu: «Yanna ma xpinni [Dios] laatu» (1 Pedro 2:9, 10).
Yanna, pa maʼ ca xpinni Cristu riʼ nga xquidxi Dios, ñee gucanebe o gudíndebe pur laacaʼ dxi biquiichináʼ Roma laacaʼ la? Ñee bidiibe lugar gucaalucaʼ cani cuquiichináʼ laacaʼ que la? Coʼ, qué ñúnidibe ni. Xiñee yaʼ. Casi bidúʼyanu lu tema gudídinu que, ora guʼyaʼ Dios caquiiñeʼ gaca ti guerra la? laasi nga riníʼ pora chécabe luni. Qué nidinde diʼ Dios pur ca xpinni Cristu ni bibani lu primé siglu ne laaca qué ñábibe laacaʼ nitíndecaʼ lu xiixa guerra. Rihuinni dxíchica cadi tiempu que diʼ nga nexheʼ gunduuxeʼ Dios ca guendaquéiquiiñeʼ ne ca binni cuquiichináʼ laacabe que.
Cásica guleza ca xpinni Dios ni bibani dxiqué, ca primé xpinni Cristu laaca naquiiñeʼ cuézacaʼ ne sin guireecaʼ gana dede ora guedandá dxi gacané Dios laacaʼ. Pa qué guedandá dxi ca la? qué gápacabe xidé guzulúcabe ti guerra pa qué gabi Dios laacabe gúnicabe ni. Bisiá ca Jesucristu diidxaʼ né laacabe; qué ñábisibe laacaʼ cadi checaʼ lu guerra, sínuque gúdxibe laacaʼ cadi gúnicaʼ ni. Sicaríʼ guniʼbe: «Laganaxhii cani nanalaʼdxi laatu, [...] ne lainaba lu Dios pur cani riladxi laatu» (Mateo 5:44). Dxi guniʼbe zucaalú ejércitu romanu guidxi Jerusalén, gúdxibe laacaʼ guxooñecaʼ lugar de tíndecaʼ, ne zaqué bíʼnicaʼ ni (Lucas 21:20, 21).
Apóstol Pablu laaca bicaa ca diidxaʼ riʼ: «Cadi uquixe tu ni guni cabe laatu, [...] purti cá ni lu Xquiʼchi be ra na be: Xcuenta nuu ni, ne naa uquixe ni laacabe» (Romanos 12:19). Ca diidxaʼ bizeeteʼ Pablu riʼ maca guníʼ Dios cani gayuaa iza ante, ne zeeda cani lu Levítico 19:18 ne Deuteronomio 32:35. Maʼ bidúʼyanu gucané Dios xquidxi ni gupa dxiqué ora tíndenecaʼ ca xhenemígucaʼ. Né ca diidxaʼ guníʼ Pablu lu primé siglu que rusihuínnicani caʼruʼ guchaa modo riníʼ ique Dios de guerra; riquiiñebe cani para gulabe ca xpínnibe, gunduuxebe guendaquéiquiiñeʼ ne ca binni ni cuquiichináʼ laacaʼ. Cásica dxiqué, Jiobá si nga guiníʼ pora gaca ti guerra ne tu zanda tinde luni.
Rihuinni dxíchica qué ñabi Jiobá ca primé xpinni Cristu que tíndecaʼ. Ca dxi riʼ yaʼ. Ñee nuu ti grupu lu Guidxilayú riʼ ni napa ndaayaʼ stiʼ Dios para cheʼ lu guerra la? Ñee maʼ bedandá dxi tinde Dios pur ca xpinni la? Xi riníʼ ique Dios de guerra yanna. Sti tema ca zacabi ca guendarinabadiidxaʼ riʼ.
