NI BIZAACA. Biyubi stale políticu ne xaíque yuʼduʼ modo guiniʼcaʼ cadi jneza ni zeeda lu Biblia. Stale biaje biquiiñecabe autoridad nápacabe para gucaacabe binni cadi guʼndaʼ ne cadi guni traducir Biblia. Guzéʼtenu chupa ejemplu:

• Biaʼ lu iza 167 ante de ca dxi stinu, biʼniʼ mandar Antíoco Epífanes gunitilúcabe guiráʼ copia stiʼ ca Escrituras Hebreas purtiʼ gucaláʼdxibe ninanda ca judíu religión stiʼ ca griegu. Heinrich Graetz, ti hombre ni nanna de historia guníʼ «binitilú ne bizaaquiʼ ca funcionariu stiʼ rey riʼ ca rollo stiʼ ley ni bidxélacaʼ ne biiticaʼ ca binni ni biindaʼ ni.

• Lu Edad Media, bidxiichi stale xaíque yuʼduʼ purtiʼ biʼniʼ predicar ca laico ni rusiidiʼ Biblia ne cadi ni rusiidiʼ yuʼduʼ ne guníʼcabe qué rinanda ca laico ni rusiidiʼ yuʼduʼ purtiʼ riquiiñecaʼ Biblia para guni predicarcaʼ. Gulí caadxi xaíque yuʼduʼ caadxi hombre para guyúbicaʼ ca binni ni qué runi ni ná ley ne guzaaquicabe laacaʼ.

Pa ñaca nunitilúcabe Biblia niniti mensaje stini.

XIMODO BILÁ BIBLIA. Ndaaniʼ guidxi Israel nga jma biyubi Antíoco modo nunitilú Biblia. Peru tiempu que nabeza stale de ca judíu que sti guidxi. Ca expertu ca nacaʼ lu primé siglu que, jma de 60% de ca judíu maʼ cadi nabézacaʼ Israel. Ndaaniʼ ca sinagoga gúpacabe ca copia stiʼ ca Escritura ne laacani nga biquiiñeʼ ca ni zá de laacabe ne ca xpinni Cristu (Hechos 15:21).

Lu Edad Media, ca binni ni gunnaxhii Biblia biʼniʼ traducircaʼ ne biʼniʼ copiarcaʼ ca Escritura neca guyuu tu guzananda laacaʼ. Lu siglu quince, ante chuʼ imprenta maca nuu caadxi ndaa stiʼ Biblia lu 33 idioma. Dede ca dxi que guca traducir ne guca imprimir stale Biblia.

CA COSA GALÁN BIZAACA. Neca gucalaʼdxiʼ stale rey ne xaíque yuʼduʼ nunítilucaʼ Biblia laani nga libru ni jma napa binni ne ni jma huayaca traducir. Huayacané Biblia stale guidxi gánnacaʼ xi ley quíxhecaʼ ne ximodo guicá idioma sticaʼ, ne laaca huayacaneni stale binni guchaacaʼ modo nabánicaʼ.