¿Ñee huaníʼ íqueluʼ casi ca binni riʼ la? Zándaca gucaláʼdxiluʼ gúʼndaluʼ Biblia, peru guyuu xiixa ni bicueeza lii. Stale binni riníʼ ique pa gúʼndacaʼ libru riʼ zareecaʼ gana. Peru ¿xi niníʼ íqueluʼ pa ñábicabe lii zacané libru riʼ lii guibániluʼ galán ne nayecheʼ yaʼ? ¿Yanna pa ñábicabe lii nuu stale modo zanda gúʼndaluʼ ni sin guireeluʼ gana yaʼ? ¿Ñee ñuuluʼ dispuestu ñánnaluʼ xi rusiidiʼ Biblia la?

Biiyaʼ xi guníʼ caadxi binni ni bizulú biindacaʼ Biblia ne guleenducaʼ stale cosa galán ra bíʼnicaʼ ni.

Ezekiel, ti joven ni napa jma de 20 iza, guníʼ: «Dxiqué gucaʼ casi ca binni ni zeʼ lu ti carretera ni qué ganna pa ladu cheʼ, peru huayacané Biblia naa gannaʼ xi zanda guneʼ né xquendanabaneʼ. Luni zadxélaluʼ stale cosa galán ni zacané lii guiráʼ dxi».

Frieda, ti gunaa ni laaca napa jma de 20 iza, guníʼ: «Dxiqué nagueenda ridxiicheʼ, peru huayacané Biblia naa gucueeza laca naa. Maʼ qué ridxiicheʼ nagueenda ne yanna maʼ napaʼ jma xhamigaʼ ne xhamiguaʼ».

Ti gunaa láʼ Eunice ni napa jma de 50 iza, guníʼ: «Cayacané Biblia naa gacaʼ ti binni jma nachaʼhuiʼ ne guneʼ ni jneza».

Pa gúʼndaluʼ Biblia, zabániluʼ jma nayecheʼ, casi ca binni ni bizéʼtenu riʼ ne millón de binni ni huayuni ni (Isaías 48:17, 18). Zacané ni lii guicaaluʼ decisión galán, gápaluʼ xhamíguluʼ, cadi gápaluʼ estrés ne ni jma galán nga zanda guiziidiluʼ de Dios ni bizáʼ guiráʼ ni nuu. Ca conseju ni zeeda lu Biblia zeeda ca ni de Dios, nga runi zanda chinándanu ca ni. ¿Xiñee yaʼ? Purtiʼ nabé galán guiráʼ ca conseju ni rudiibe.

Ora gúʼndaluʼ ca xcaadxi artículo ni zeeda lu revista riʼ, zadxélaluʼ caadxi sugerencia ni zacané lii guzululuʼ gúʼndaluʼ Biblia ne cueenduluʼ ni galán ra gúniluʼ ni.