Guleʼ ndaaniʼ guidxi Paddington, Londres (Inglaterra), ti guidxi ra nabeza stale binni. Gulezaniáʼ jñaaʼ ne chonna bendaʼ ni jma huaniisi que naa. Cumu nabé rixudxi bixhozeʼ la? casi qué riuube yoo né laadu.

Dxi nahuiineʼ, guiráʼ huaxhinni bisiidiʼ jñaaʼ naa guneʼ orar, gupaʼ ti Biblia huiiniʼ ni né si libru stiʼ Salmos ne gudixheʼ saa stícani para guʼndaʼ. Ti biaje biindaʼ ca diidxaʼ riʼ lu ti libru: «Zedandá dxi, zaluxe guiráʼ ni nuu». Ora biindaʼ ca diidxaʼ riʼ, maʼ qué randa raseʼ ca huaxhinni purtiʼ nisi laani maʼ cá iqueʼ. Ngue runi guníʼ iqueʼ: «¿Ñee ndiʼ si nga guendanabani la? ¿Xiñee nabaneʼ pue?». Ni dxandíʼ la? qué racalaʼdxeʼ gateʼ.

Guyuuladxeʼ gannaʼ jma de ocultismo, ngue runi, biyubeʼ ximodo guinieniaʼ ca gueʼtuʼ ne guyaaʼ ra pantión né ca xhamiguaʼ ni yeniáʼ scuela. Laaca biiyaniáʼ laacabe película de terror. Guiráʼ ndiʼ ruchibi ni laadu ne dede riá birí ládidu, peru riuuláʼdxidu cani.

Dxi napaʼ chii iza, mápeca cayuneʼ ni cadi jneza. Gudubaʼ gueza ne biaba lu viciu ca. Despué guduba’ marihuana ne dxi napaʼ once iza bizuluáʼ gueeʼ nisadxuʼniʼ. Qué riuuladxeʼ sabor stini peru riuuladxeʼ guneʼ sentir maʼ naxhudxeʼ. Laaca riuuladxeʼ gucaadiaʼgaʼ música, guyaaʼ ne chaaʼ saa. Rireeʼ gueelaʼ ne ra maʼ zirá gueelaʼ ribiguetaʼ sin gu’ya’ guirutiʼ naa. Peru sti dxi ca, cumu maʼ bidxagaʼ la? qué riaaʼ scuela ne ora riaaʼ nisi maʼ caxhudxe’ ndaaniʼ ca salón ca.

Últimu iza guyaaʼ scuela qué nidideʼ nin ti materia. Cumu qué ganna jñaaʼ guiráʼ cosa ni cadi jneza cayuneʼ la? biuubaʼ ladxidoʼbe ora gúnnabe ni ne bidxiichinebe naa. Gudinde diidxadu ne bireeʼ de ra yoo. Gulezaniáʼ Tony, xnoviuaʼ. Runi apoyarbe ti movimientu stiʼ ca jamaicanu, ribáʼnabe, rutoobe droga ne nabé ridíndebe. Ne qué nindaa dxi napaʼ 16 iza guca xiiñeʼ ne gupaʼ primé baʼduʼ stinneʼ.

Dxi nuaa’ ndaaniʼ ti albergue ra nuu puru madre soltera né ca xiiñiʼ, binebiaʼyaʼ ca testigu stiʼ Jehová. Gunda gulezaʼ raqué purtiʼ racanécabe binni. Cada semana reeda ganna chupa hermana Testigu caadxi madre soltera. Ti dxi gurieniaʼ laacabe para gabeʼ ca hermana que cadi dxandíʼ ni rusiidicaʼ. Peru né diidxaʼ nadóʼ biquiiñeʼ ca hermana que Biblia para bicábicabe ca pregunta stinneʼ. Guizáʼ guyuuladxeʼ modo guniʼnécabe naa. Ngue runi, gudxeʼ laacabe zuneʼ estudiar Biblia.

Qué nindaa biziideʼ xiixa lu Biblia ni bichaa modo nabaneʼ. Dede dxi nahuiineʼ ridxibeʼ gateʼ, peru despué biziideʼ guníʼ Jesús zabani binni de lade gue’tu’ (Juan 5:28, 29). Laaca biziideʼ rizaalaʼdxiʼ Dios naa (1 Pedro 5:7). Ca diidxaʼ ni zeeda lu Jeremías 29:11, yendácani dede ndaaniʼ ladxiduáʼ, racá ná: «Purtiʼ nannaʼ dxicheʼ xi caníʼ iqueʼ guneʼ para laatu —ná Jehová—. Racalaʼdxeʼ gápatu paz, cadi gacanatu. Racalaʼdxeʼ gudieeʼ laatu ti futuro ne ti esperanza». Bizuluáʼ bineʼ cré zanda guibaneʼ ndaaniʼ Guidxilayú riʼ dxi gácani ti Paraísu (Salmo 37:29).

Nabé nacha’hui’ guca ca testigu stiʼ Jehová né naa. Primé biaje guyaaʼ reunión la? bidieeʼ cuenta dxandíʼ nadxiicabe binni ne nabé galán modo bidxaagalúcabe naa (Juan 13:34, 35). Gadxé si ni de modo bi’ni’ tratárcabe naa ndaaniʼ yu’du’. Qué ñuni ca testigu stiʼ Jehová menu naa, sínuque guleecaʼ tiempu para naa, bizaaláʼdxicaʼ ni caquiiñeʼ ne gucanecaʼ naa. Yanna huaxa bineʼ sentir nuaa’ ndaaniʼ ti familia.

Ora bineʼ estudiar Biblia, bieneʼ naquiiñeʼ guchaaʼ modo nabaneʼ ti guibaneʼ modo ná Dios. Guca nagana para naa gusaanaʼ de cubaʼ gueza. Laaca bidieeʼ cuenta ora rucaadiaʼgaʼ xiixa música rucaani naa cubaʼ marihuana. Nga runi, bicaadiagaʼ gadxé música. Maʼ qué ñaadiá’ ca saa ca purtiʼ racá zanda gueeda xhudxe’ sti biaje, sínuque biyubeʼ xhamiguaʼ ni zanda gacané naa (Proverbios 13:20).

Ca dxi queca, cayuni estudiar Tony Biblia né ca testigu stiʼ Jehová. Laga ziyénebe xi rusiidiʼ Biblia, jmaruʼ si guyuube seguru dxandíʼ ni caziidibe. Bichaabe modo nabánibe, maʼ qué nidxaagabe ca xhamígube ni ridinde ne maʼ qué niguubabe marihuana. Peru bidiʼdu cuenta pa racaláʼdxidu gúnidu ni ná Jehová ne gusiniisidu ca xiiñidu galán la? naquiiñeʼ guichaganadu. Nga runi, bichaganadu lu iza 1982.

Rietenalaʼdxeʼ dxiqué nabé biyubeʼ lu revista Torre stiʼ ni rapa ne ¡Gutaná!, * experiencia stiʼ binni ni bichaa modo nabani ni zanda gacané naa. Nabé guluu ca experiencia stícabe gana naa ne gucaneni naa para cadi guireeʼ gana. Guiráʼ dxi rinabaʼ Jehová cadi gusaana naa. Naa ne Tony guyuunísadu casi testigu stiʼ Jehová lu beeu julio iza 1982

Bilá xquendanabaneʼ dxi gucaʼ xhamigaʼ Jehová. Naa ne Tony huadúʼyadu modo huayacané Jehová laadu ora cadídidu ra nagana. Maʼ bizíʼdidu gápadu confianza laabe ne huadúʼyadu ximodo huayápabe familia stidu (Salmo 55:22).

Riéchedu purtiʼ gucanedu ca xiiñidu gaca xhamígucaʼ Jehová. Laaca riecheʼ guuyaʼ ca xiaagaʼ zeʼ dxi jma ziyunibiaʼcaʼ Jehová.

Maʼ qué ribeeʼ xcaandaʼ huaxhinni ne maʼ qué riníʼ iqueʼ diaʼ guendaguti ne ximodo zabaneʼ despué. Naa ne Tony rigánnadu cada semana ti congregación stiʼ ca testigu stiʼ Jehová para uguʼdu gana ca hermanu stinu. Runi predicarnedu laacabe ne rusiididu binni de Jehová, ne pa gapa ca binni riʼ fe Jesús la? zabánicaʼ sin qué chuʼ dxi gáticaʼ.