De dxi nahuiine’ nabé gunnaxhiee’ Jehová. Pur ngue gudixhe ique’ gudiee’ xquendanabane’ laabe ne chuaanisa’. Ne dxi bisaa’ 13 iza guyuaanisa’ ne guizá’ nayeche’ bine’ sentir. Dxi napa’ 14 iza, gunabadiidxa’ hermanu Helge Linck a naa pa caní’ ique’ gaca’ precursora regular. ¡Qué ñaanda’ naa guirá’ ni gunidu dxi que! Neca guca jñaa’ ne bixhoze’ precursor temporal (ni runibiá’cabe yanna casi precursor auxiliar), peru qué ganna’ xii nga riní’ gaca tuuxa precursor regular. Peru ni gunabadiidxa’ hermanu Linck que naa bicaani guiniisi xiixa ndaani’ ladxiduá’: deseu de gune’ jma lu xhiiña’ Jehová.

 Tiempu que nabé nuudinde ca políticu ndaani’ guidxi Etiopía. Ngue runi lu iza 1974 bizulú guyuu guendaridinde ndaani’ guidxi que, biseguyoocabe ne biiticabe binni. Ne pur ngue bedandá ti tiempu ra ma’ qué ñanda ñuni predicardu de yoo pur yoo ne ma’ gúpadu reunión stidu pur grupuhuiini’. Ne cumu nadipa’ cucaalú ca binni que laadu la? ngue runi guní’ ique bixhoze’ ne jñaa’ gacanecaʼ laadu chuʼdu listu pa málasi guizaaca xiixa. Ra bí’ndadu ca principiu ni zeeda lu Biblia biénedu xii nga riní’ gaca ti xpinni Cristu neutral. Laaca biénedu zacané Jehová laadu gánnadu xi guinidu ora guinabadiidxacabe laadu xiixa ne pora cadi guinidu (Mateo 10:19; 27:12, 14).

 Biluxesiá’ scuela, bine’ dxiiña’ ndaani’ ti aeropuertu, ni biree lá Ethiopian Airlines. Ti siadó’ ora yendaya’ ra dxiiña’, bi’ni’ felicitar ca xcompañerua’ naa purti’ gulícabe naa para gune’ ti desfile pur aniversariu sti’ gobiernu de raqué. Oraqueca gunieniá’ supervisor que, ne gudxe’ laa qué ziuaa’ lu desfile que purti’ naca’ xpinni Cristu ne naca neutral.

 Sti dxi que, laga cayune’ dxiiña’ ra aeropuertu que, bizaaca xiixa ni cadi cabeza’. De zitu biiya’ caadxi hombre nanda guiiba’ ne zedadxíñaca’ neza ra nuaa’, bidiee’ ca cuenta nuucabe guinaazecabe tuuxa ni racala’dxi’ guxooñe’ de guidxi que. ¡Peru málasi bilui’nácabe naa! Qué ganna’ xii ngue cayaca. Cayune’ ca dxiiña’ ni maca rune’, peru málasi bichaa xquendanabane’.

 Yené ca soldadu que naa ndaani’ ti oficina ne xadxí guyu’du raqué purti’ bí’nicabe naa stale pregunta. Gunabadiidxacabe naa: «¿Tu riguixe ca testigu sti’ Jehová? ¿Cayúnilu’ dxiiña’ né Frente de Liberación de Eritrea la? ¿Rúnilu’ o runi bixhózelu’ dxiiña’ né Gobiernu sti’ Estados Unidos la?». Neca nadipa’ presión que, peru guyuaa’ tranquila purti’ guyuu Jehová gaxha de naa (Filipenses 4:6, 7).

 Despué de ngue, yené ca soldadu que naa ndaani’ ti yoo ni caquiiñecabe casi ti cárcel. Guluucabe naa ndaani’ ti cuartu ni napa 28 si metru cuadradu. ¡Dxa’ cuartu que de binni! Purti’ raqué laaca nuu sti 15 gunaa jóven ni runiné ca políticu que dxiiña’.

 Gueela’ que, guta’ lu pisu sti’ cuartu que ne nacuaruá’ uniforme ni runeniá’ dxiiña’ que. Ne guníʼ iqueʼ pabiá’ nuu jñaa, bixhoze’ ne ca bizana’ xizaa, purti’ nánnaca’ bieguayuaa’, peru qué gánnaca’ paraa nuaa’. Gunaba’ Jehová gacané familia stinne’ gánnaca’ paraa nuseguyoocabe naa.

 Sti dxi que, ora bibane’ binebia’ya’ tobi de ca guardia que. Bidxagayaabe ora bí’yabe naa, ne guni’be: «Aster, ¿xi cayu’nu’ rarí’ pue?». Gunaba’ laabe chebe ra nuu jñaa’ ne bixhoze’ ne gábibe laaca’ paraa nuaa’. Ne guyebe. Dxiqueca biseenda’ jñaa’ ne bixhoze’ guendaró ne lari para naa. ¡Zaqué nga bicabi Jehová oración stinne’! Ni bizaaca’ dxi que gucané ni naa gudiee’ cuenta cadi nuaa’ stube’.

 Qué ninácabe ñapa’ Biblia ne nin sti publicación ndaani’ cárcel que. Laaca qué ninácabe niganna familia stinne’ ne ca xhamigua’ naa. Peru biquiiñe’ Jehová ca gunaa ni deguayuaaniá’ que para cuʼcaʼ gana naa. Guirá’ dxi rune’ predicar laacabe, ne guizá’ ridxagayaacabe ora rinieniá’ laacabe de Reinu sti’ Dios. Stale biaje rábicabe naa: «Laadu cayuni apoyardu ti gobiernu sti’ Guidxilayú ri’, peru lii cayuni apoyarlu’ Gobiernu sti’ Dios. Nga runi, neca guiní’cabe zuuticabe lii, ¡cadi guireelu’ gana, bi’ni’ huantar!».

 Nuu biaje ruyubi ca guardia que cueeca’ diidxa’ ca ni deguyoo que ne dede riguíñecabe laaca’. Ti dxi, bia’ a las once de la noche, bedayúbicabe naa. Ne gunabadiidxacabe naa stale cosa, bigaanicabe donda iqueʼ ne guní’cabe qué rune’ apoyar Gobiernu. Cumu qué nina’ya’ niniee’ ti frase ni riní’ ti políticu la? gudiñe chupa guardia que naa. Stale biaje bí’nicabe naa zaqué. Ne cada biaje guizaaca ni rune’ orar Jehová de guidubi ladxiduá’, ne rune’ sentir racanebe naa gune’ huantar.

 Chonna beeu despué gudxi ti guardia naa ma’ zanda guiree’, ma’ libre naa. Guizá’ bidxagayaa’ ngue ne guyuaa’ nayeche’. Peru, laaca guyuaa’ triste purti’ ma’ qué zanda guinieniá’ ca joven ni bieguayuaaniá’ que de esperanza ni ruzeete’ Biblia.

 Chupa chonna beeu despué gunaaze ca soldadu que ca joven ni nuu ndaani’ familia stinne’. Qué guinne’ dia’ yoo ora bizaaca ngue, peru zinécabe chupa benda’ ne ti bizana’. Ngue runi, guní’ ique’ jma galán guiree’ de guidxi que. Neca cayuuba’ ladxiduá’ gusaana’ familia stinne’ sti biaje, peru gudxi jñaa’ naa gaca’ nadxibalú ne gapa’ confianza Jehová. Ne qué nindaa, guzié’ ti boletu de avión para chaa’ Estados Unidos. Bia’si ngue ni bine’, purti’ huadxí que guyé ca soldadu que ra lidxe’ para guinaazeca’ naa. Cumu qué nidxélacabe naa la? nagueendaca guyécabe ra aeropuertu que. Peru ora yendácabe raqué, mápeca’ biree avión ra ziaa’ que.

 Yendaya’ guidxi Maryland, ne raqué bidxaagalú Haywood ne Joan Ward naa, laacabe nga ca misioneru ni bisiidi’ jñaa’ ne bixhoze’ ni dxandí’. Gaayu’ beeu despué ma’ gunda guca’ precursora regular. ¡Yanna huaxa ma’ gunda bigaanda’ meta stinne’! Ne Cyndi, xiiñi’ guendaxheela’ Ward, guca compañera stinne’. Guizá’ galán bi’ni’ predicardu juntu.

 Bia’ lu iza 1979, guyaa’ Betel ni nuu Nueva York, ne raqué binebia’ya’ Wesley Parker. Guyuuladxe’ ca cualidad galán ni nápabe ne ca meta ni naguixhe íquebe. Bichaganadu lu iza 1981 ne juntu bínidu dxiiña’ Betel, ni nuu Wallkill (Nueva York). Raqué bine’ dxiiña’ lu stale departamentu: casi Cuidado de Habitaciones, Lavandería, Limpieza en Seco ne Computación, ra biquiiñe’ programa MEPS. Ra bine’ dxiiña’ Betel gunda biquiiñe’ tiempu stinne’ para bine’ ni ná Jehová. Ne laaca bidxela’ stale xhamigua’ ni qué ñuu dxi nusaana naa.

 Peru guyuaa’ xizaa pur familia stinne’ ni nuu Etiopía, purti’ canazanandarúcabe laaca’, ne deguyoo ru’ guiropa’ benda’ ne ti bizana’. b Ne cumu qué rudii ca binni que ni gócabe la? guirá’ dxi runi jñaa’ guendaró para laacabe ne risaana ni ra nuucabe.

 Nagana guca ca tiempu que, peru guyuu Jehová gaxha de naa. Ne ca hermanu de Betel gudixhedxica’ ladxiduá’ ne gucaneca’ naa ora caquiiñe’ ni (Marcos 10:29, 30). Ti dxi, gudxi hermanu John Booth c naa caadxi diidxa’ ni yendá ndaani’ ladxiduá’, guni’be: «Guizá’ nayeche’ nuudu cayúnilu’ dxiiña’ Betel. Pa qué ñapu’ ndaaya’ sti’ Jehová, qué ñuulu’ rarí’». Raqué bidiee’ cuenta guluu Jehová ndaaya’ decisión ni gucuaa’ de guiree’ de Etiopía ne laabe zápabe familia stinne’.

 Lu enero de iza 1989, bidiicabe laadu ti noticia ni cadi cabézadu: ¡Nacaxhiiñe’! Guyu’du xizaa pur ngue, peru caadxi dxi despué ma’ guyu’du nayeche’. Neca zaqué, guní’ íquedu stale cosa. Ne gunabadiidxadu pa zanda gusiniisidu xiiñidu jneza, paraa cuézadu ne ximodo gápadu ni iquiiñedu guireesidu de Betel.

 De raqué, 15 de abril de iza 1989, bichadu guirá’ stidu ndaani’ xcárrudu ne guyuudu Oregón (Estados Unidos). Gudixhe íquedu gúnidu xhiiña’ Jehová de tiempu completu, peru ma’ casi precursor. Caadxi dxi de yendadu raqué, gudxi ca xhamígudu laadu pur ca ni cadídidu que cadi galán gácadu precursor. Bidiicabe laadu conseju que purti’ racalá’dxicabe gacanécabe laadu. Dxandí’, huaxié’ bueltu nápadu ne chigápadu ti xiiñidu. ¡Qué gánnadu xi gúnidu! Bia’si pe’ ca dxi que, gúpadu visita sti’ superintendente de circuito, hermanu Guy Pierce, ne xheelabe, Penny. d Guluucabe gana laadu para cadi gusaanadu meta stidu de gácadu precursor. Ngue runi, gúcadu precursor purti’ gúpadu confianza zacané Jehová laadu (Malaquías 3:10). Gúpadu Lemuel, primé xiiñidu, ne despué gúpadu Jadon, guiropa xiiñidu. Ne bia’ tiempu que, qué nusaana de ñácadu precursor.

 Ti ndaaya’ naro’ba’ nga gácadu precursor ne guni predicarnedu ca xiiñidu. Pur laani gunda bisiididu ni dxandí’ ca binni de territorio stidu ne laaca bisiididu ni ca xiiñidu (Deuteronomio 11:19). Peru dxi gule Japheth, sti xiiñidu, guníʼ íquedu caquiiñeʼ gusaana de gácadu precursor ti tiempu (Miqueas 6:8).

 Bidi’du cuenta dxiiña’ jma risaca nápadu nga gacanedu ca xiiñidu gú’yaca’ Jehová casi ti Dios ni dxandí’ ne laapeca’ guyúbica’ gaca xhamíguca’ laabe. Para gunda bí’nidu ni, gúpadu adoración en familia ne biyúbidu modo chuulá’dxicabe ni, ti zacá cuézacabe né guendanayeche’ dxi rúnidu ni. Dxi nahuiinicabe, bí’ndanedu laacabe libru Guizí’dinu de Maestru Ni Jma Nanna Gusiidi’ ne Libru stinne’ de ca historia sti’ Biblia. Ne nuu biaje ruyúbidu gácadu tobi de ca personaje ni zeeda lu ca historia ca, casi ni caní’ de Jezabel. Cumu naa sia’ nga gunaa ládecabe la? nga runi naa raca tocar gune’ de reina qué iquiiñe’ que. Dede ra zuba’ que, riuula’dxi’ ca xiiñe’ gusábaca’ naa lu pisu ne despué rúnica’ casi runi ca biʼcuʼ ni riete lu historia que. Aparte de rúnidu adoración en familia, laaca rudii Wesley estudiu ca xiiñidu ne rúnibe ni tobi pur tobi.

 Bí’nidu stipa pur gusiniisidu ca xiiñidu né guendaranaxhii ne gunábadu Jehová gacané laadu chu’ familia stidu tobi si. Ra ziniisicabe, bisí’didu laacabe gacanécabe né ca dxiiña’ ni raca ndaani’ yoo, casi quíbicabe traste, gusiácabe xcuártucabe o quíbicabe xhábacabe. Ne laaca bisí’didu laacabe gúnicabe guendaró.

 Cadi ca xiiñisidu biziidica’ cosa risaca, sínuque né laadu, purti’ cadi perfectu laadu. Nuu biaje nagueenda ridxiichidu ne huaxié’ galán rinínedu ca xiiñidu. Ne nuu tiru naa ne xheela’ rinidu diidxa’ ni rúniná laadu. Ne ora rizaaca nga, rácadu humilde ne runi perdonársaadu.

 Siempre runi invitardu ca hermanu de congregación ra lídxidu. Laaca runi invitardu xcaadxi hermanu, casi ca betelita, ca misioneru, ca superintendente de circuito ne xcaadxi hermanu ni cayuni apoyar sti congregación (Romanos 12:13). Ora ma’ nuunedu ca invitadu stidu, qué ruséʼndanu ca xiiñidu chichíteca’ sti ladu. Riuucabe né laadu ora ma’ cayuí’du diidxa’ ne rucaadiágacabe ca experiencia riní’ ca hermanu que. Guendaridxagayaa nga purti’ jma stale ni riaananécabe de ni riní’ ca hermanu ca que laadu.

 Naa ne Wesley guizá’ bí’nidu stipa para chuula’dxi’ ca xiiñidu gúnica’ ni ná Jehová. Para gunda bínidu ni, bitópatu ti ndaa bueltu ne biquíʼñedu ca dxi de vacación stidu para chizánedu laacabe xcaadxi guidxi. Ne cada guidxi chuudu, rigánnadu ca sucursal nuu raqué, riuudu ca reunión ne runi predicarnedu ca hermanu. Gucané ngue laadu gannaxhiidu xquidxi Jehová ne jma guyu’du tobi si casi familia.

 Neza ra nabézadu que bidi’du cuenta nuu stale binni ni riní’ diidxastía, peru huaxié’ runi predicárcabe laaca’. Dxi nahuiini’ ca xiiñidu, gunabadiidxadu hermanu Pierce pa bia’si nga guidxa’du ti congregación diidxastía. Dede cuxidxihuiiniʼ bicabi laadu: «Ti binni ni rié guuze’ ruyubi ra nuu stale benda». Ngue pe’ nga ni caquíʼñedu ne bidxa’du ti congregación didxastía guidxi Woodburn (Oregón). ¡Galán guyé ni laadu! Gúpadu stale estudiu ni bi’ni’ progresar, gucanedu caadxi binni chú’nisa ne bí’yadu ximodo ti grupuhuiini’ de binni ni riní’ didxastía beeda gácaca’ ti congregación.

 Málasi biaana Wesley sin dxiiña’, peru bidxélabe tobi California ne pur ngue yendézadu raqué. Dxi ma’ zinedu chupa iza de nuudu California, naa, Lemuel ne Jadon, gudixhe íquedu gácadu precursor regular. Ne lu iza 2007 guizá’ nayeche’ guyu’du purti’ guiónnadu juntu guyuudu Escuela del Servicio de Precursor. Qué nindaa bidi’du cuenta, nuu binni riní’ árabe neza ra nabézadu que. Ngue runi, despué de 13 iza de cayuni servirdu ti congregación diidxastía, gudixhe íquedu guidxa’du ti congregación ra riníʼcabe árabe. Guizá’ nayeche’ guyu’du ra bi’ni’ predicardu ca binni riní’ diidxa’ que ne gucanedu lu campaña ni runi ca hermanu que para gaca predicar ndaaniʼ xcaadxi guidxi. Yanna la? cayuni servirdu casi precursor ndaani’ ti congregación árabe, ni nuu San Diego, California.

 Guizá’ nacha’hui’ Wesley, xheela’, ne racanebe laadu chu’du gaxha de Jehová. Guizá’ runi respetarbe ni runi organización sti’ Jehová. Qué rini’be mal de modo runi Betel dxiiña’ o ni raca ndaani’ congregación. Sínuque siempre rini’be xiixa galán de xquidxi Jehová. Riuulá’dxibe guni orardu juntu ne rinábabe Jehová gacané naa. Ora rucaadiaga’ ca oración stibe, rudii ca ni stipa naa ne racané ca ni naa cadi chuaa’ xizaa ora gápadu guendanagana.

 Ni dxandí’ la? guizá’ nayeche’ huayu’du. Huayúnidu ni ná Jehová de tiempu completu, huayácanedu ca congregación ra nuu necesidad ne dede bisiniisidu ca xiiñidu. Laapedu huayuuya dxí’chidu ximodo riguu Jehová ndaaya’ ca binni ni runi ni nabe primé lu xquendanabani ne qué huayuu dxi gusiaadxabe laadu xiixa (Salmo 37:25). Siempre gudixhe’ ique’ gune’ ni ná Jehová primé lu xquendanabane’ ne nanna’ dxiche’ nga nga decisión jma galán gucuaa’ (Salmo 84:10).