¡GATANANU!
2022: Ti iza naná ne ni bichibi binni | ¿Xi caníʼ Biblia de laani?
Lu iza 2022 nabé nga cayete de guerra lu noticia, gastiʼ bueltu ndaaniʼ stale guidxi ne nabé cayacaná Guidxilayú ra nabézanu riʼ. Biblia si nga zanda gusiene laanu xiñee cazaaca guiráʼ ndiʼ.
Xi pur bizaaca guiráʼ cosa ca lu iza 2022
Pur guiráʼ ni bizaaca lu iza 2022 riʼ cudiʼnu cuenta, casi ná Biblia, maʼ nabáninu «lu ca últimu dxi» (2 Timoteo 3:1). Ne bizulú ca dxi ca lu iza 1914. Raríʼ zuuyaluʼ maca xadxí guníʼ Biblia zazaaca guiráʼ cosa riʼ tiempu nabáninu riʼ:
«Guerra» (Mateo 24:6).
«Iza 2022 nga biguetaʼ dxiibi stiʼ guerra Europa». a
Biiyaʼ artículo «Maʼ biuu Rusia ndaaniʼ guidxi Ucrania».
«Hambre» (Mateo 24:7).
«2022: Iza riʼ nga jma guyuu hambre que xcaadxi iza ca». b
«Guendahuará» (Lucas 21:11).
«Cabiguetaʼ guendahuará láʼ poliomelitis, cadale viruela del mono ne cunitiluruʼ COVID-19, cusihuinni guiráʼ ndiʼ nadipaʼ guiráʼ guendahuará ni ricá binni ne gastiʼ nga binni Guidxilayú». c
Biiyaʼ artículo «Maʼ biiti COVID xhoopaʼ millón de binni».
«Zuuyaʼ binni cosa ni guchibi laa» (Lucas 21:11).
«Nabé nandáʼ, maʼ cadi cayaba nisaguié, cacaguí stale guiʼxhiʼ ne calaahua stale lugar. Qué lica ziaandaʼ laanu iza 2022 riʼ, purtiʼ guizáʼ maʼ bichaa clima stiʼ Guidxilayú riʼ, maʼ binitiluni stale lugar, maʼ biitini stale binni ne pur laani stale binni maʼ bisaana xquidxi». d
Biiyaʼ artículo «Nabé nandáʼ huayaca ca dxi stinu riʼ lu guidubi Guidxilayú».
«Cadinde binni guiráʼ ladu» (Lucas 21:9).
«Nabé cadxiichi binni purtiʼ huaxiéʼ nuu dxiiñaʼ ne jmaruʼ si purtiʼ guizáʼ maʼ gudxiʼbaʼ lu guiráʼ cosa. Ne pur nga lu iza 2022 nga jma bicaalú binni gobiernu». e
Biiyaʼ artículo «Jma maʼ caru nuu guiráʼ cosa lu guidubi Guidxilayú».
¿Xi cabeza laanu para sti iza ca pue?
Guirutiʼ qué zanda gabi laanu xi chiguizaaca lu iza 2023. Ni nánnanu nga, maʼ cadi candaa zuni chaahuiʼ Reinu stiʼ Dios o gobiernu stibe ni nuu guibáʼ, modo nabani binni (Daniel 2:44). Zunitilú gobiernu ca guiráʼ ni cayuniná binni ne zuni ni guiráʼ ni racalaʼdxiʼ Dios para guidxilayú riʼ (Mateo 6:9, 10).
Riguʼdu gana lii chinándaluʼ conseju ni bidii Jesucristu laanu: «Lagataná». Pa gúniluʼ ni, zuuyaluʼ maca cá lu Biblia zazaaca guiráʼ cosa ni cadúʼyanu cayaca lu Guidxilayú yanna riʼ (Marcos 13:37). Zanda gucaaluʼ ra nuudu para gúʼyaluʼ ximodo zanda gacané Biblia lii yanna ne ximodo zanda gacané ni lii ne familia stiluʼ gudiitu cuenta maʼ cadi candaa zaca chaahuiʼ modo nabáninu.
a AP News, «2022 Was Year the Horror of War Returned to Europe», ni bicaa Jill Lawless, December 8, 2022.
b World Food Programme, «A Global Food Crises».
c JAMA Health Forum, «Living in an Age of Pandemics—From COVID-19 to Monkeypox, Polio, and Disease X», ni bicaa Lawrence O. Gostin, JD, September 22, 2022.
d Earth.Org, «What’s Behind the Record-Breaking Extreme Weather Events of Summer 2022?» ni bicaa Martina Igini, October 24, 2022.
e Carnegie Endowment for International Peace, «Economic Anger Dominated Global Protests in 2022», ni bicaa Thomas Carothers ne Benjamin Feldman, December 8, 2022.
Laaca zándaca ziuuláʼdxiluʼ ca ndiʼ
CANI RINABADIIDXAʼ BINNI DE BIBLIA
¿Xi rusihuinni ma’ nabáninu «lu ca últimu dxi»?
Maca bizeete’ Biblia juntu zazaaca caadxi cosa ne laacani nga señal sti’ ca últimu dxi.
TORRE STIʼ NI RAPA
Maʼ cadi candaa zabee Dios guiráʼ ni runiná laanu
¿Xiñee nánnanu maʼ cadi candaa zabee Dios guiráʼ ni runiná laanu ne ca cosa ni cadi jneza?
ESSENTIAL BIBLE TEACHINGS
Xii nga Reinu stiʼ Dios
Ca dxi bicheeche Jesús diidxaʼ, jma guníʼ de Reinu stiʼ Dios que de sti tema. Maʼ stale iza huanabaʼ binni gueeda Reinu ca.
TU LAADU
Gunabaʼ chigánnacabe lii
Biiyaʼ ximodo zanda guicabi Biblia xiixa pregunta nápaluʼ o binibiaʼ chaahuiʼ ca testigu stiʼ Jehová.
