Lu beeu julio de 2022, stale binni guti pur ca balacera ni cayaca lu guidubi Guidxilayú:

•   «Ra biiticabe hombre ni guca primé ministru de Japón, Shinzo Abe, nabé bidxagayaa binni de guidxi ca ne ni nuu lu guidubi Guidxilayú. Purtiʼ huaxiéʼ ridíndecabe ndaaniʼ guidxi ca ne nápacabe ley ra ná cadi tutiica binni zanda iquiiñeʼ guiibaʼ» (10 de julio de 2022, The Japan Times).

•   «Nabé bidxibi binni dxi biiti ti hombre ni naaze guiibaʼ chonna binni ra ti tienda ndaaniʼ guidxi Copenhague, Dinamarca» (4 de julio de 2022, Reuters).

•   «Guidxi Sudáfrica: caadxi hombre naaze guiibaʼ, biiticaʼ 15 binni ra ti bar ndaaniʼ guidxi Soweto» (10 de julio de 2022, The Guardian).

•   «Jma de chupa gayuaa gande binni guti pur caadxi balacera dxi guca celebrar 4 de julio ndaaniʼ guidxi Estados Unidos» (5 de julio de 2022, CBS News).

 ¿Ñee nuu razón para guni crenu maʼ qué ziuu binni malu la? ¿Xi caníʼ Biblia de laani?

 Biblia ná maʼ nabáninu «lu ca últimu dxi», ti tiempu ra zaca binni naduxhuʼ ne qué ziacaʼ stobi (2 Timoteo 3:1, 3). Ruchibi ca binni malu riʼ binni pur ca guendaquéiquiiñeʼ ni rúnicaʼ (Lucas 21:11). Peru lu Biblia riete huidxe si maʼ qué ziuuruʼ binni malu ne zabeza binni «ti lugar ra nuu guendariuudxi, ziuucaʼ ndaaniʼ yoo sin chuʼ tu guchibi laacaʼ ne gastiʼ zuchiiñaʼ laacaʼ lugar ra guiziiláʼdxicaʼ» (Isaías 32:18). Yanna, ¿ximodo guiree binni malu yaʼ?

 Zunduuxeʼ Dios laacabe ne guiráʼ guiibaʼ riquiiñecabe.

•   «Ca binni malu la? zanitilucaʼ de lu guidxilayú» (Proverbios 2:22).

•   Runduuxeʼ Dios «guerra lu guidubi guidxilayú. Rigúzabe arcu ne ruxuuxebe lanza; rucaaguibe carru stiʼ ca soldadu lu guí» (Salmo 46:9).

 Zusiidiʼ Dios binni cadi tinde, ne zacá nga záxhabe guendaquéiquiiñeʼ lu Guidxilayú.

•   «Guirutiʼ tu zuniná ne zunitilú lu guidubi naca dani nayá stinneʼ, purtiʼ zadxá tipa guidxilayú riʼ de guiráʼ ni rusiidiʼ Jehová cásica dxátipa nisadóʼ» (Isaías 11:9).

•   Dede ca yanna, lu guidubi Guidxilayú cusiidiʼ Jehová binni cadi tíndecaʼ ne cadi guinaazecaʼ guiibaʼ ne gúnicaʼ espada sticaʼ cubu ni ricá ruaa aradu, ne lanza sticaʼ podadera (Miqueas 4:3).

 Pa racaláʼdxiluʼ gánnaluʼ jma de promesa ni caníʼ zedandá dxi maʼ qué zadxibi binni, biindaʼ artículo «¿Es posible librarse del miedo?».

 Para gánnaluʼ ximodo chindee Dios binni malu ne guendaquéiquiiñeʼ la? biindaʼ artículo «¡Por fin paz en la Tierra!».