Nabé cadinde binni pur política lu guidubi Guidxilayú.

•   Ndaaniʼ guidxi México, biiticabe 39 candidatu políticu, qué huayuu dxi guizaaca ti cosa zacá, ne laaca guyuu xcaadxi guendaridinde lu ca elección ni guca lu iza 2023-2024.

•   Laaca nabé huadíndecabe pur política ndaaniʼ ca guidxi ni nuu Europa, casi ni bizaaca 15 de mayo de 2024 ra gucaláʼdxicabe ñuuticabe primé ministru de guidxi Eslovaquia.

•   Ndaaniʼ guidxi Estados Unidos, guizáʼ bidxibi binni 13 de julio de 2024 que, purtiʼ gucaláʼdxicabe ñuuticabe hombre ni guca presidente de raqué ni láʼ Donald Trump.

 ¿Xiñee nabé cadinde binni pur política pue? ¿Ñee ziuu dxi maʼ qué zadinde binni la? ¿Xi caníʼ Biblia de laani?

 Maca bizeeteʼ Biblia «lu ca últimu dxi», ni zeeda gaca tiempu nabáninu riʼ, nabé zadinde binni ne qué ziuucaʼ de acuerdu purtiʼ guizáʼ feu zaca xpiaʼcaʼ.

•   «Lu ca últimu dxi ca jma nagana zaca tiempu ne nadipaʼ zaca para binni guni huantar ni. Purtiʼ zuyubi binni puru si para laa, […] qué zácacaʼ binni agradecidu ne zucheenecaʼ binni. […] Qué zanacaʼ chuʼcaʼ de acuerdu, […] zácacaʼ naduxhuʼ, […] zuni traicionarcaʼ binni ne zácacaʼ tercu, zácacaʼ orgulloso» (2 Timoteo 3:1-4).

 Laaca ruzeeteʼ Biblia zucaaluʼ binni gobiernu tiempu nabáninu riʼ ne guiráʼ ladu ziuu guendaridinde pur política (Lucas 21:9). Peru maʼ cadi candaa maʼ qué zadinde binni pur política ne ziuucaʼ tobi si.

 Ruzeeteʼ Biblia zabee Dios guiráʼ gobiernu ni nuu lu Guidxilayú riʼ ne maʼ gobiernu si stibe nga chiguni mandar.

•   «Dios ni nuu guibáʼ zucuí ti reinu […] zunideni ne zunduuxeni guiráʼ ca [xcaadxi] reinu ca, ne laasi ni ziaanani para siempre» (Daniel 2:44).

 Ora guni mandar Reinu stiʼ Dios zapa binni paz ne ziuucaʼ tobi si lu guidubi Guidxilayú.

•   Runibiáʼcabe xaíque stini, Jesucristu, casi «Príncipe ni rudii Paz». Zacanebe chuʼ paz ndaaniʼ Guidxilayú ne qué chuʼ dxi guirani (Isaías 9:6, 7).

•   Ne tiempu riʼ, ca ni cayuni ni ná Reinu ca maʼ caziidicaʼ cadi tindesaacaʼ ne chuʼ paz ládecaʼ. Ndiʼ nga ni ruzeeteʼ Biblia de ca binni riʼ: «Napa xidé gúnicabe espada stícabe cubu ni riuu ruaa aradu, ne zúnicabe lanza stícabe podadera para uganécabe guixi. Qué zandisaʼ ti guidxi roʼ espada stiʼ para gucaalú sti guidxi roʼ, ne maʼ qué zaziidicaʼ tíndecaʼ para checaʼ lu guerra» (Isaías 2:3, 4).

 Pa racaláʼdxiluʼ gánnaluʼ jma, biindaʼ artículo «¿Qué cosas logrará el Reino de Dios?» ne biiyaʼ videu Xii nga Reinu stiʼ Dios