Lu 19 de mayo de 2022 que gupa departamentu de seguridad stiʼ ONU ti reunión. Lu reunión que guyuu jma de 75 oficial. Raqué bizeetecabe maca bizulú guyuu hambre dede dxi bizulú pandemia stiʼ COVID-19 ne pur cuchaa clima lu guidubi Guidxilayú, peru yanna né guerra ni cayaca Ucrania jmaruʼ si cahuinni ni. Qué nindaa de ngue, revista The Economist bizeeteʼ pur guerra ni cayaca Ucrania maʼ qué guidxela binni xi guni ne jmaruʼ si cayuu hambre lu guidubi Guidxilayú. Maʼ raca stale iza bizeeteʼ Biblia ziuu hambre tiempu nabáninu riʼ. Peru laaca né ni conseju ne promesa ni riguixhedxí ladxidoʼno.

•    Sicaríʼ guníʼ Jesús: «Purtiʼ zadinde ti guidxi ne sti guidxi ne zucaalú ti reinu sti reinu, ziuu hambre» (Mateo 24:7).

•    Lu libru stiʼ Apocalipsis ruzeeteʼ de tapa jinete. Tobi de ca jinete ca runi representar guerra. Ne despué ruzeeteʼ ni stobi ni runi representar hambre. Lu profecía riʼ riete ziuu ti tiempu zaxiéʼ guendaró ne caru zadoo ni. «Ne óraque biiyaʼ ti caballu yaaseʼ. Ne naaze ni dxiʼbaʼ laame que ti balanza. Ne galahuiʼ de guidapaʼ querubín que binadiaʼgaʼ casi ora niníʼ tuuxa: “Zasaca ti litru trigu ti denariu, [biaʼ riaxa binni ti dxi dxiiñaʼ dxiqué] ne zasaca chonna litru cebada ti denariu”» (Apocalipsis 6:5, 6).

 Lu ca profecía ni zeeda lu Biblia caníʼ ziuu hambre maʼ cayaca cumplir ca ni tiempu stinu riʼ, ne Biblia ná laani nga «ca últimu dxi» (2 Timoteo 3:1). Pa racaláʼdxiluʼ gánnaluʼ jma de «ca últimu dxi» riʼ ne ximodo cayaca cumplir ca profecía ni caníʼ de guidapaʼ jinete riʼ la? zanda gúʼyaluʼ videu ni láʼ Bichaa modo nabani binni dede lu iza 1914, laaca zanda gúʼndaluʼ artículo ni láʼ «¿Qué representan los jinetes del Apocalipsis?».

•    Rudii Biblia stale conseju laanu para gudxíʼlunu ca guendanagana ni rápanu. Casi ora huaxiéʼ bueltu nuu ne huaxiéʼ guendaró. Zadxélaluʼ xcaadxi conseju lu tema ni láʼ «Cómo vivir con menos».

•    Cayuni prometer Biblia laanu zaca chaahuiʼ ca guendanagana ca. Laaca cayabi ni laanu «ziuu stale biidxiʼ lu guidxilayú» riʼ ne qué ziaadxaʼ ni gó binni (Salmo 72:16). Para gánnanu jma de promesa riʼ ne zanda guni crenu dxandíʼ zazaaca ni la? zanda gúʼndaluʼ tema ni láʼ «La esperanza real de un mañana mejor».