Lu iza 2024 riʼ, ziuu jma elección lu guidubi naca guidxilayú, jma que biaʼ huayácani lu ca iza huadiʼdiʼ ca. Neca zacá, maʼ stale binni qué gapa confianza ca políticu.

•   Stale de ca ni biʼniʼ participar lu ti encuesta ni guca Estados Unidos guniʼcaʼ: «stale de ca políticu rúnicaʼ puru para laasicaʼ» ne qué rizaaláʼdxicaʼ binni (centro de investigación Pew Research Center, 19 de septiembre de 2023). a

 Stale de ca joven laaca maʼ qué runi crecaʼ ca políticu.

•   «Ca joven ni nuu yanna ricá íquecaʼ guni chaahuicaʼ ca guendanagana ni nápanu, peru lu ca encuesta ca guníʼcabe cadi guirani zanda guni chaahuiʼ ca políticu» (The New York Times, 29 de enero de 2024).

•   «Ti encuesta bizeeteʼ jma runi cré ca joven ca binni ni rudxiibaʼ videu lu internet que ca políticu» (The Korea Times, 22 de enero de 2024).

 Yanna, ¿zuni chaahuiʼ ca políticu ca guendanagana stinu la? ¿Tuu laa zanda gápanu confianza yaʼ?

 Galán ganna chaahuiʼ binni tu guni cré. Biblia ná «ni nahuati runi cré intiica ni gábicabe laa, peru ti binni nuu xpiaaniʼ la? riníʼ ique ante guni xiixa» (Proverbios 14:15).

•   Pa racaláʼdxiluʼ guidxélaluʼ información ni dxandíʼ, biindaʼ artículo ni láʼ «Cómo protegerse de la información falsa».

 Dede né ca políticu ni jma nachaʼhuiʼ ne ca ni racalaʼdxiʼ gacané binni qué randa rúnicaʼ guiráʼ ni racaláʼdxicaʼ. Pur nga, Biblia rabi laanu ca diidxaʼ riʼ:

•   «Cadi gápaluʼ confianza ca ni runi mandar, ne ca binni ni rati, purtiʼ qué zanda gulacaʼ lii» (Salmo 146:3, La Biblia Latinoamérica).

 Biblia rusiene maʼ gulí Dios ti líder ni dxandíʼ peʼ zacané laanu, laabe nga: Jesucristu (Lucas 1:32, 33). Jesús nga Rey stiʼ Reinu stiʼ Dios, ti gobiernu ni nuu guibáʼ (Mateo 6:10).

•   Biiyaʼ xiñee zanda guni creluʼ Jesús ne ca ni chigúnibe para guni chaahuibe ca guendanagana ni ridxaagalunu. Biindaʼ ca artículo ni láʼ «¿Tuu nga Rey lu Reinu stiʼ Dios?» ne «¿Xi chiguni Reinu stiʼ Dios?».