«Sti biaje ca maʼ cadxibi binni qué gudii xpueltu», nga nga ni guníʼ presidente stiʼ Grupo Banco Mundial lu ti informe ni biree lu junio de 2022. «Jma maʼ ziguiʼbaʼ lu guiráʼ cosa ne jma maʼ huaxiéʼ bueltu napa binni».

 Maʼ guníʼ Fondo Monetario Internacional «guizáʼ nagueenda ziguiʼbaʼ lu ca cosa casi gas, gasolina ne guendaró, ne jma cayuninani ca guidxihuiiniʼ ra huaxiéʼ bueltu nuu».

 Racané Biblia laanu guiénenu xiñee nabé ziguiʼbaʼ lu guiráʼ cosa ne xiñee huaxiéʼ bueltu nuu. Laaca cayábini laanu ximodo gudxíʼlunu ca guendanagana riʼ ne ximodo chigaca chaahuiʼ ca ni huidxe si.

•   Biblia ná maʼ nabáninu lu «ca últimu dxi» (2 Timoteo 3:1).

•   Maca guníʼ Jesús, ca dxi riʼ «zuuyaʼ binni cosa ni guchibi laa» (Lucas 21:11). Ora maʼ guzulú quibaʼ lu guiráʼ cosa ridxibi binni purtiʼ qué gánnacaʼ xi zazaaca despué ne pa zanda gudiicaʼ ni caquiiñeʼ familia sticaʼ.

•   Maca biete lu libru stiʼ Apocalipsis nabé caru zadoo guendaró ca dxi stinu riʼ. «Binadiaʼgaʼ ti ridxi ná: “Ni zanda si síneluʼ biaʼ riaxa ti binni ti dxi dxiiñaʼ nga ti litru trigu ne chonna litru cebada”» (Apocalipsis 6:6, Traducción en lenguaje actual).

 Para gánnaluʼ xii nga «ca últimu dxi» ne ca profecía ni zeeda lu libru stiʼ Apocalipsis, biiyaʼ videu Bichaa modo nabani binni dede lu iza 1914 ne biindaʼ artículo «¿Qué representan los jinetes del Apocalipsis?».

•   «Zucuícabe yoo ne zabézacabe ndaaniʼ ni ne zuzuhuaacabe lubáʼ uva ne zócabe cuananaxhi stini. Qué zucuícabe yoo ne gadxé tu cueza ndaaniʼ ni; qué zúnicabe dxiiñaʼ layú ne gadxé tu gó guiráʼ ni gudiini» (Isaías 65:21, 22).

•   «Ziuu stale biidxiʼ lu guidxilayú, lu ca dani ca jma stale ziuu» (Salmo 72:16).

•   «“Ziasaʼ pur ca binni ni cayacaná ne pur ca binni pobre ni cacaalaʼdxiʼ, ne zuneʼ xiixa”, ná Jehová» (Salmo 12:5). a

 Maʼ cadi candaa zuni Dios xiixa para gapa guiráʼ binni ni iquiiñeʼ ne cadi ndaaniʼ ti guidxi si, sínuque lu guidubi naca Guidxilayú. Pa racaláʼdxiluʼ gánnaluʼ ximodo chigúnibe ni, biindaʼ artículo «¿Es realista esperar un sistema económico justo?».

 Laga cabézanu guchaa Dios modo nabáninu, zanda gacané Biblia lii tiempu ra caguiʼbaʼ lu guiráʼ cosa. ¿Ximodo yaʼ? Cudiini laanu caadxi conseju para iquiiñenu bueltu stinu jneza (Proverbios 23:4, 5; Eclesiastés 7:12). Pa racaláʼdxiluʼ gánnaluʼ jma, biindaʼ artículo «Gupa xpuéltuluʼ» ne «Cómo vivir con menos».