Zándaca zuuyaʼ jma de gaayuʼ mil millón de binni Copa Mundial stiʼ FIFA, zaca ni 20 de noviembre hasta 18 de diciembre de 2022. Stale tu riníʼ ique zanda gacané ca tipu eventu riʼ binni para chuʼcaʼ tobi si.

•   «Napa deporte poder para guchaa guidxilayú riʼ, napa ni poder para gucaani binni guni xiixa, laasini napa ni poder para gacané ni binni chuʼ tobi si» (Nelson Mandela, ni guca presidente de Sudáfrica).

•   «Racané futbol laanu gánnanu zanda chuʼnu tobi si; guiráʼ zanda chuʼ nayecheʼ, guiráʼ zanda gannaxhiisaa neca de gadxé gadxé lugar laacaʼ o gadxé raza sticaʼ» (Gianni Infantino, presidente stiʼ FIFA). a

 ¿Zanda gacané ti mundial stiʼ futbol o sti eventu deportivu para gaca ni guníʼ ca binni ca la? ¿Zanda chuʼ paz ne chuʼ binni tobi si la?

 Cadi de futbol si cayete lu mundial stiʼ iza riʼ. Nabé cucaa ni binni ne ca políticu guiniʼcaʼ de ca derechu stiʼ binni, de racismo ne de bueltu.

 Neca zacá, stale tu riníʼ ique nabé racané ca eventu deportivu casi mundial de futbol para chuʼ binni nayecheʼ neca ti ratu. Peru, neca nga nga ni riuulaʼdxiʼ binni la? ti ratu si nga riuucaʼ tobi si. Purtiʼ pur laacani rihuinni modo riníʼ ique binni ne rúnicaʼ cosa ni rutinde laacaʼ. Maca riete lu Biblia zacá zaca xpiaʼ binni «lu ca últimu dxi» riʼ (2 Timoteo 3:1-5).

 Rabi Biblia laanu zedandá tiempu ziuu binni guidxilayú tobi si. Cayabi ni laanu ziuu binni tobi si lu guidubi Guidxilayú ora maʼ guni mandar ti gobiernu ni runibiáʼcabe casi «Reinu stiʼ Dios» (Lucas 4:43; Mateo 6:10).

 Jesucristu nga rey stiʼ gobiernu riʼ, ne zuuyabe chuʼ paz lu guidubi Guidxilayú. Biblia ná:

•   «Zadale ca ni nachaʼhuiʼ, ne ziuu stale paz» (Salmo 72:7).

•   «Zulabe binni pobre ni cuyubi tu gacané laa […]. Zulabe laacaʼ de lu náʼ ca binni ni cuquiichináʼ laacaʼ ne de ca binni ni ridinde» (Salmo 72:12, 14).

 Ca dxi riʼ cayacané ni bisiidiʼ Jesús stale binni lu chupa gayuaa treinta y nueve guidxi ne territorio, ne cayacané ni laacabe para cadi gaca nanaláʼdxicabe binni. Para gánnaluʼ jma, biindaʼ revista «Xi gúninu ti cadi gaca nanaláʼdxinu binni».