Jueves 24 de febrero de 2022 nacándaruʼ bizulú Rusia guluu ca soldadu stiʼ ndaaniʼ guidxi Ucrania, neca gucalaʼdxiʼ ca líder stiʼ stale guidxi cadi nuzulú guerra riʼ. ¿Xi zándaca guizaaca lu guidubi Guidxilayú pur guerra riʼ yaʼ? António Guterres, secretario general stiʼ Naciones Unidas, guníʼ raca chupa chonna gubidxa, qué gánnacaʼ pabiáʼ zuninani binni, pabiáʼ zunitiluni ne zuninani seguridad stiʼ Europa ne lu guidubi Guidxilayú.

•   Maca guníʼ Jesús ziuu ti tiempu ra «zadinde ti guidxi ne sti guidxi ne zucaalú ti reinu sti reinu» (Mateo 24:7). Biindaʼ artículo «¿Cuál es la señal de “los últimos días” o de “los tiempos finales”?» para gúʼyaluʼ cayaca cumplir profecía ni guníʼ Jesús ra ná ziuu guerra ca dxi stinu riʼ.

•   Lu libru stiʼ Apocalipsis riete naca guerra casi ti jinete ni dxiʼbaʼ ti caballu «color bele» ne gucuaa autoridad para «cuee paz ndaaniʼ guidxilayú» (Apocalipsis 6:4). Para gánnaluʼ jma, biindaʼ artículo «¿Qué representan los jinetes del Apocalipsis?» ne biiyaʼ xiñee biaʼsi peʼ ca guerra ni cayaca ca dxi riʼ né ni ná profecía riʼ.

•   Lu libru stiʼ Daniel riete de ti «rey del norte» ne ti «rey del sur», ne ruzeeteni zácacaʼ enemigu (Daniel 11:25-45). Biiyaʼ videu ni láʼ Cayaca cumplir profecía ni zeeda lu Daniel 11 para guiéneluʼ xiñee Rusia ne ca xpinni nga nácacaʼ rey del norte. a

•   Laaca ruzeeteʼ Apocalipsis de «guerra ni chigaca dxi roʼ stiʼ Dios ni jma napa poder» (Apocalipsis 16:14, 16). Peru cadi nacadini ti guerra ra chitinde stale nación, casi guerra cayaca yanna riʼ. Biindaʼ artículo «¿Qué es el Armagedón?» para gánnaluʼ xcaadxi cosa de guerra riʼ.

•   Biblia rabi laanu zunduuxeʼ Dios «guerra lu guidubi guidxilayú» (Salmo 46:9). Biindaʼ artículo «La esperanza real de un mañana mejor» para gánnaluʼ jma de ca promesa stiʼ Dios.

•   Bisiidiʼ Jesús ca discípulo stiʼ guinábacaʼ gueeda Reinu stiʼ Dios (Mateo 6:9, 10). Reinu riʼ nga ti gobiernu ni nuu guibáʼ ne laani nga chigúnini guiráʼ ni racalaʼdxiʼ Dios lu Guidxilayú riʼ. Ne ni racalaʼdxiʼ Dios chuʼ lu Guidxilayú riʼ nga paz. Biiyaʼ videu ni láʼ Xii nga Reinu stiʼ Dios para gánnaluʼ xii nga chiguni Reinu ca pur lii.

 Nuu jma de 129,000 testigu stiʼ Jehová Ucrania. Ne cásica guiráʼ Testigu nuu lu Guidxilayú la? rinándacabe ejemplu stiʼ Jesús ne qué rinácabe gucheenécabe Dios. Nga runi qué riuucabe lu política ne qué riécabe lu guerra (Juan 18:36). Ne lu guidubi Guidxilayú cayabi ca testigu stiʼ Jehová binni «ca noticia galán stiʼ Reinu»; caníʼcabe maʼ chigaca chaahuiʼ ca guendanagana stiʼ binni ne maʼ qué ziuu guerra (Mateo 24:14). Cayuni invitardu lii guiníʼneluʼ laadu para gánnaluʼ xcaadxi cosa de esperanza ni cudii Biblia.