¿Xiñee stale binni qué gapa nisa para iquiiñeʼ? | ¿Xi caníʼ Biblia de laani?
Guiranu caquíʼñenu nisa para guibáninu. Peru ni feu nga stale binni qué gápacaʼ nisa. António Guterres, ni naca secretario general stiʼ ONU, guníʼ: «Gastiʼ nisa, ne ra zidiʼdiʼ tiempu jma nagana cayaca para binni gápacaʼ nisa».
Strdel/AFP via Getty Images
¿Ñee zedandá dxi zapa guiráʼ binni nisa para iquiiñeʼ la? o jmaruʼ si zaxie’ni ra tidiʼ tiempu? ¿Xi caníʼ Biblia de laani?
Ni ná Biblia zazaaca
Lu Biblia ná zedandá dxi zapa binni nisa para iquiiñeʼ ne maʼ qué ziuu dxi guiaadxani. Zaca nisa ca nayá ne zanda guécabe ni.
«Zadá nisa lu desiertu ne zuxooñeʼ nisa lu llanu. Ne layú ra maʼ bicuiidxiʼ xhuxhu gubidxa zaca casi ti laguna dxaʼ nite ndaaniʼ, ne zadá nisa lu layú nabidxi» (Isaías 35:6, 7).
Peru ¿ñee zanda guni crenu ni ná Biblia la? Guníʼ ique ti cosa ni ruzeeteʼ Biblia de modo guyáʼ Guidxilayú stinu riʼ.
Ni rusiidiʼ Biblia de Guidxilayú ne ciclo del agua
«Dios ni dxandí’, ni bizáʼ guidxilayú ne ni bi’ni’ ni, [...] cadi bizáʼsibe ni, sínuque bizaʼbe ni para cueza binni luni» (Isaías 45:18).
Bizáʼ Dios Guidxilayú para chuʼ guendanabani luni. Ne para cadi gáticaʼ, bíʼnibe xiixa para gápacaʼ ziáʼ nisa naxhi.
«Laabe [Dios] rindísabe guiráʼ gota nisa; ridale vapor dede raca ni nisaguié; ne ruxhii guiráʼ za ca nisaguié luguiáʼ binni guidxilayú» (Job 36:27, 28).
Cadi nagana modo rusiene ca versículo riʼ xi biʼniʼ Dios para cadi guiaadxaʼ nisa lu Guidxilayú. Riasa nisa ni nuu lu Guidxilayú ne ndaaniʼ nisadóʼ, despué rácani zá ne riábani casi nisaguié, ne zacá riá nisa ca ne maʼ randa reʼ binni ne maniʼ ni (Eclesiastés 1:7; Amós 5:8).
«Zusabaʼ ziáʼ nisaguié para laatu tiempu stini, ne zudii ca layú stitu, ne zacá cuananaxhi lu guiráʼ yaga ni nuu lu layú» (Levítico 26:4).
Lu versículo riʼ caniʼné Dios ca israelita ni guleza lu ca layú que. Gúdxibe laacaʼ zusábabe nisaguié para guindísacaʼ stale cosecha. Nanna Dios para ganda guindisaʼ binni cosecha lu ca layú ca, caquiiñeʼ guiaba nisaguié tiempu stini.
Biʼniʼ Dios casi peʼ gúdxibe ca israelita que, ne maʼ cadi candaa laaca zúnibeni lu guidubi Guidxilayú (Isaías 30:23). Peru laga cabézanu gúnibe ni bizéʼtenu riʼ, zeʼ dxi jma nagana raca para binni gápacaʼ nisa, ne cayaca nga purtiʼ huaxiéʼ cayaba nisaguié. Peru ¿ximodo ná Biblia zaca chaahuiʼ guendanagana riʼ yaʼ?
Xi caquiiñeʼ gaca para gapa binni nisa
Biblia rusiene Dios si nga zanda guni chaahuiʼ ca guendanagana ni nuu lu Guidxilayú riʼ, tobi de laani nga chuʼ ziáʼ nisa. Napa Dios ti gobiernu ni chiguni mandar lu Guidxilayú, ne laani nga Reinu stiʼ Dios (Daniel 2:44; Mateo 6:9, 10; Apocalipsis 11:15). Zuni gobiernu riʼ ni qué zanda guni nin ti gobiernu ni nuu lu Guidxilayú: gapa binni ziáʼ nisa para iquiiñeʼ ne qué chuʼ dxi guiaadxaʼ ni.
Guendanagana: Pur clima stiʼ Guidxilayú riʼ, maʼ cadi cayuni ciclo del agua dxiiñaʼ jneza. Nga runi, maʼ qué rudii ca layú ca ni gó binni, rilaahua stale lugar, ne rizaaca ndiʼ purtiʼ naroʼbaʼ nisaguié riaba o purtiʼ zeʼ dxi jma ziáʼ nisa nuu lu nisadóʼ.
Modo gaca chaahuini: Zuni Reinu stiʼ Dios xiixa para guibiguetaʼ chuʼ Guidxilayú modo bizáʼ Dios ni. Dios peʼ guníʼ: «Cayuneʼ guiráʼ cosa nacubi» (Apocalipsis 21:5). Ziuu ziáʼ nisa lu ca layú nabidxi, ne zabeza binni ca lugar ra guirutiʼ nabeza (Isaías 41:17-20). Ne ora guni mandar Jesucristu lu Reinu stiʼ Dios, zapa poder para gucueeza ca desastre natural.
Bicueeza Jesús ti tormenta naroʼbaʼ dxi guyuu lu Guidxilayú. Ne laani nga ti cosa ni bisihuinni bidii Dios laabe poder (Marcos 4:39, 41). Nga runi, ora maʼ guni mandar Jesús lu Reinu stiʼ Dios, maʼ qué ziuu desastre natural. Zapa binni guendariuudxi ne maʼ qué zadxíbicaʼ.
Guendanagana: Stale empresa ne binni cayuni biidicaʼ stale guiiguʼ, laguna ne nisa nuu xagueteʼ yú, nga runi nabé zixiéʼ nisa nayá.
Modo gaca chaahuini: Zusiá Dios ca guiiguʼ, laguna ne nisadóʼ. Zuni chaahuibe guiráʼ ra maʼ gucaná Guidxilayú riʼ ne zúnibe ni ti paraísu. Biblia ná: «Desiertu ne ra gastiʼ nisa ziéchecaʼ ne ra napampa casi desiertu ziuu nayecheʼ, ne zudii guieʼ casi azafrán» (Isaías 35:1).
¿Xi zazaaca binni ni cayuni biidiʼ Guidxilayú ne ca ni qué rizaalaʼdxiʼ ni cayaca stobi yaʼ? Dios peʼ maʼ guníʼ zunitilú «ca ni cunitilú guidxilayú» (Apocalipsis 11:18; Proverbios 2:21, 22).
Guendanagana: Cumu nabé ziáʼ nisa riquiiñeʼ binni la? cadi cudiicaʼ lugar guni Guidxilayú riʼ dxiiñaʼ jneza para chuʼ jma ziáʼ nisa.
Modo gaca chaahuini: Ora guni mandar Reinu stiʼ Dios lu Guidxilayú riʼ, zaca ni ná Dios ne cadi ni ná binni ni ruyubi puru para laasi (Mateo 6:9, 10). Laaca zacané Reinu riʼ binni guiziidicaʼ gúnicaʼ ni jneza. Ne nga nga ni ná Isaías 11:9, nani: «Zadxá tipa guidxilayú riʼ de guiráʼ ni rusiidiʼ Jehová». a Cumu nadxiinu Dios ne cudiʼnu lugar gusiidibe laanu la? zúninu biaʼ gándatiʼ para gápanu Guidxilayú riʼ ne guiráʼ ni nuu ndaaniʼ ni.
Pa racaláʼdxiluʼ gánnaluʼ jma, biindaʼ artículo ni láʼ «¿Xi chiguni Reinu stiʼ Dios?»
¿Ñee racaláʼdxiluʼ gánnaluʼ ximodo zaca Guidxilayú riʼ ora maʼ gaca ni ti paraísu la? Zanda gúʼndaluʼ ni lu Biblia stiluʼ, lu capítulo 35 stiʼ Isaías.
Pa racaláʼdxiluʼ gánnaluʼ xi naguixhe ique Dios guni lu Guidxilayú, biiyaʼ videu ni láʼ ¿Xiñee bizáʼ Dios Guidxilayú?
a Jehová nga lá Dios (Salmo 83:18). Biindaʼ artículo ni láʼ «¿Tuu nga Jehová?».
Laaca zándaca ziuuláʼdxiluʼ ca ndiʼ
¡GATANANU!
Nabé nadipaʼ cayaca gusibá | ¿Xi caníʼ Biblia de laani?
¿Zanda gaca chaahuiʼ guendanagana riʼ la? ¿Xi esperanza nuu?
ESSENTIAL BIBLE TEACHINGS
Xii nga Reinu stiʼ Dios
Ca dxi bicheeche Jesús diidxaʼ, jma guníʼ de Reinu stiʼ Dios que de sti tema. Maʼ stale iza huanabaʼ binni gueeda Reinu ca.
TU LAADU
Gunabaʼ chigánnacabe lii
Biiyaʼ ximodo zanda guicabi Biblia xiixa pregunta nápaluʼ o binibiaʼ chaahuiʼ ca testigu stiʼ Jehová.
