Guluu Rusia ca soldadu stiʼ ndaaniʼ guidxi Ucrania 24 de febrero de 2022. Ne pur ndiʼ maʼ qué gapa peʼ binni stale cosa ni guibaniné ne nga nga ni cucaa laacabe guireecabe de ndaaniʼ guidxi riʼ. a

 «Cayaba bomba ne cayaca ruidu. Tantu cadxibeʼ dede qué zanda gusieneʼ ni. Ora gúnnadu nuu caadxi tren ni cabee binni lugar que, nagueendaca bireʼdu. Ti mochila si bidiicabe lugar guiréʼnedu, raqué nga nácabe cuʼdu guiráʼ ni zaquiiñedu para guibaninedu. Ni bireʼnésidu nga ca guiʼchiʼ jma risaca stidu, medicina, nisa ne xiixa ni guidoʼdo. Laga cayaba ca bomba que, bisaanadu guiráʼ ni nápadu ne ziuudu ra estación de tren que» (Natalia, de Járkov, Ucrania).

 «Qué lica niníʼ íquedu pa chisulú ti guerra. Málasi binadiaʼgaʼ cayaba bomba chupa chonna lugar, dede cayacaditi guiráʼ ventana. Para biree ziaaʼ ne ziniáʼ ni caquiiñeʼ siaʼ. Bireeʼ de ra lidxeʼ las ocho de la mañana ne gudxibaʼ lu ti tren ni zeʼ Lviv, despué gudxibaʼ lu ti autobús ni zeʼ Polonia» (Nadia, de Járkov).

Lu artículo riʼ zadúʼyanu:

•  ¿Xi pur cuxooñelú ca binni riʼ de xquidxi pue?

•  ¿Paraa zanda guidxela ca binni riʼ ti esperanza?

•  ¿Zanda gacané Biblia ca binni ni cuxooñelú de xquidxi yanna la?

 ¿Xi pur cuxooñelú ca binni riʼ de xquidxi pue?

 Cuxooñelú binni de guidxi Ucrania purtiʼ guyuu ca soldadu de Rusia racá, peru Biblia cusiene laanu xi pur peʼ nga cayaca guiráʼ cosa riʼ.

•   Ca gobiernu nuu lu Guidxilayú riʼ. Qué ganda diʼ gudii ca gobiernu riʼ guiráʼ ni caquiiñeʼ binni. Lugar de ñacanécabe binni, laga riquiiñecabe autoridad stícabe para guninácabe laacaʼ (Eclesiastés 4:1; 8:9).

•   Binidxabaʼ. Laabe nga «ni cayuni mandar guidxilayú riʼ» ne rucaabe binni guni cosa malu. Biblia peʼ rabi laanu: «Guidubi guidxilayú riʼ nuuni lu náʼ Binidxabaʼ» (Juan 14:30; 1 Juan 5:19).

•   Aparte de ca guendanagana ni huayuniná binni maʼ raca stale iza, laaca nabáninu ti tiempu ni maca bizeeteʼ Biblia. Lu 2 Timoteo 3:1 riete: «Lu ca últimu dxi ca jma nagana zaca tiempu ne nadipaʼ zaca para binni guni huantar ni». Ne cadi ngasi, laaca ziuu guerra, desastre natural, hambre ne epidemia ni zusihuinni dxandíʼ maʼ nabáninu lu ca últimu dxi. Rucaa ca cosa riʼ binni guiree de ra lidxi (Lucas 21:10, 11).

 ¿Paraa zanda guidxela ca binni riʼ ti esperanza?

 Biblia ná nadxii Jehová, b Dios ni bizáʼ laanu, ca binni ni bixooñeʼ de xquidxi ne ca binni ni maʼ bisaana lidxi ne riabe laacaʼ (Deuteronomio 10:18). Laabe maʼ guniʼbe zuni chaahuibe ca guendanagana ni rapa ca binni ni cuxooñeʼ de xquidxi. ¿Ximodo yaʼ? Ra iquiiñebe Reinu stibe, laani nga ti gobiernu ni nuu guibáʼ ne zabeeni guiráʼ gobiernu stiʼ guidxilayú riʼ (Daniel 2:44; Mateo 6:10). Zaquiiñeʼ Jehová Reinu riʼ para gunitilú Binidxabaʼ (Romanos 16:20). Lu guidubi Guidxilayú zuni mandar Reinu riʼ ne maʼ qué ziuu frontera ni guxheleʼ ca guidxi ca. Guiráʼ binni ni nuu lu guidubi Guidxilayú zácacaʼ ti familia si. Maʼ guirutiʼ tu zuxooñelú de ra lidxi, purtiʼ Biblia cayuni prometer: «Ne zabí cada tobi xaʼnaʼ lubáʼ uva stiʼ ne xaʼnaʼ yaga duʼgaʼ stiʼ, ne qué ziuu tu guchibi laacaʼ, purtiʼ Jehová, Dios stiʼ ca ejércitu guníʼ ni» (Miqueas 4:4).

 Reinu si stiʼ Dios nga zanda guni chaahuiʼ ca guendanagana ni cadxaagalú ca binni ni cuxooñeʼ de xquidxi yanna. Zaquiiñeʼ Jehová Reinu stiʼ para cuee ca guendanagana ni rucaa binni guxooñeʼ de xquidxi ne chindeza sti ladu. Guzéʼtenu xi rucaa binni guxooñeʼ ne xi chiguni Dios:

•   Guerra. «Runduuxebe [Jehová] guerra» (Salmo 46:9). Para gánnaluʼ ximodo chindee Dios ca guendarindinde nuu yanna, biindaʼ artículo ni láʼ «¿Cómo llegará a haber paz en la Tierra?».

•   Guquiichináʼ ne guniná binni stobi. Zulá Jehová ca ni cuquiichinácabe ne ca ni cayuninácabe laacaʼ (Salmo 72:14). Para guiéneluʼ ximodo zanda guchaa ti binni neca cadi galán xpiáʼ, biindaʼ ca tema ni zeeda lu artículo ni láʼ «Xi gúninu ti cadi gaca nanaláʼdxinu binni».

•   Guendapobre. Rulá Jehová ca pobre ni cucaa ridxi para gacanécabe laa (Salmo 72:12). Para gánnaluʼ ximodo chindee Dios guendapobre, biindaʼ artículo ni láʼ «¿Es realista esperar un sistema económico justo?».

•   Hambre. «Ziuu stale biidxiʼ lu guidxilayú» (Salmo 72:16). Para gánnaluʼ xi zuni Dios para cadi chuʼ tuuxa tidiʼ hambre, biindaʼ artículo ni láʼ «¿Un mundo sin hambre?».

 ¿Zanda gacané Biblia ca binni ni cuxooñelú de xquidxi yanna la?

 Zanda. Cadi cudii si Jehová ti esperanza ca binni ni cuxooñeʼ de xquidxi, Biblia laaca cudii conseju ni zanda gacané laacabe gudxiilúcabe ca guendanagana ni nápacabe yanna.

 Ni rusiidiʼ Biblia: «Cadi chuʼtu xizaa. Lu intiica ni cadíʼditu lagabi Dios xi caquiiñetu, laguni orar, laguni rogar ne lagudii xquixe peʼ laa; óraque zudii Dios laatu paz stiʼ dede guirutiʼ zanda guiene ximodo ni, ne zápani ladxidoʼto ne xquendabiaanitu» (Filipenses 4:6, 7).

 Xi riníʼ ni: Intiica ni cazaacaluʼ gunabaʼ Dios quixhedxí ladxidoʼloʼ ne xquendabiaaniluʼ. Biindaʼ tema «Filipenses 4:6, 7 | “No se inquieten por nada”».