Lu noticia nabé ridúʼyanu binni ni nanalaʼdxiʼ stobi ne dede ruuticabe binni pur laani. Laaca runadiáganu cadinde binni pur raza stiʼ ne nuu guerra.

•   «Nabé ridúʼyanu nanaláʼdxisaa binni lu ca red social ca dede dxi bizulú guerra ra cadinde Israel ne Gaza ne stale binni cucaacaʼ stobi guni zacaca» (The New York Times, 15 de noviembre de 2023).

•   «Dede lu 7 de octubre cayuuyaʼ guidubi naca Guidxilayú riʼ ximodo cadale binni ni nanaláʼdxisaa, cucaacabe stobi gúnini ne dede cayuuticabe binni pur laani» (Dennis Francis, presidente stiʼ Asamblea General stiʼ Naciones Unidas, 3 de noviembre de 2023).

 «Nabé runadiáganu nanaláʼdxisaa binni tiempu riʼ, cayuuticaʼ stobi ne cayúnicaʼ guerra». Lu Biblia riete maca de dxiqué guyuu hombre malu ni bicaa stobi chuláʼdxicaʼ chuʼ guerra, ne lu Biblia ná zeeda gaca ni riníʼ ca hombre riʼ casi flecha (Salmo 64:3; 120:7; 140:1). Laaca ruzeeteʼ Biblia cadi guendaridxagayaa nga nanaláʼdxisaa binni.

 Lu Biblia riete nanaláʼdxisaa binni pur chupa cosa.

1.  1. Maca ruzeeteʼ Biblia ziuu ti tiempu ra zará guendarannaxhii stiʼ binni (Mateo 24:12). Nga runi, lugar de gannaxhiisaacaʼ la? laga jmaruʼ si nanaláʼdxisaacaʼ (2 Timoteo 3:1-5).

2.  2. Biblia ná «guidubi guidxilayú riʼ nuuni lu náʼ Binidxabaʼ» (1 Juan 5:19; Apocalipsis 12:9, 12). Ca dxi riʼ cadúʼyanu nabé nanaláʼdxisaa binni purtiʼ Binidxabaʼ peʼ nga cucaa laacabe gácacabe zacá.

 Peru Biblia peʼ rabi laanu maʼ cadi candaa, zabee Dios guiráʼ ni rucaa binni gacananaláʼdxisaa. Ne laaca rábini laanu zusiándabe guiráʼ binni ni maʼ gucaná pur laani. Biblia cayuni prometer:

•   Zuchaa Dios «nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ. Maʼ gudiʼdiʼ guiráʼ ni guyuu dxiqué» (Apocalipsis 21:4).