Rusiidiʼ ca testigu stiʼ Jehová binni de stiidxaʼ Dios ne laaca racanécabe laacaʼ ora caquiiñecaʼ xiixa ne rúnicabe ni ndaaniʼ jma de 200 guidxi ne territorio. Peru 35 si de ca guidxi riʼ rugaanda donación rudii ca hermanu para ganda gapa ca hermanu ni nabeza lu territorio sticaʼ ni caquiiñecaʼ. Yanna, ¿xi rizaaca ndaaniʼ ca guidxi ra huaxiéʼ nuu bueltu yaʼ?

 Ruuyaʼ Grupu ni Zániru stiʼ ca testigu stiʼ Jehová dxiiñaʼ cayaca ne pabiáʼ necesidad espiritual napa ca Testigu ni nuu lu guidubi Guidxilayú. Nabé jneza modo riquiiñecabe bueltu ni ruseendaʼ ca hermanu ra sucursal. Pa chuʼ stale bueltu ra ti sucursal, ruseendacabe ni guni sobra laacabe ra nuu sti sucursal ni jma caquiiñeʼ ni. Rácani sicaríʼ purtiʼ maca zacá biʼniʼ ca xpinni Cristu ni bibani lu primé siglu. Biquiiñeʼ ca hermanu riʼ ni biʼniʼ sobra laacaʼ para gacanecaʼ ca xpinni Cristu ni jma caquiiñeʼ ni ne zacá gápacabe «biáʼqueca» (2 Corintios 8:14).

 ¿Ximodo runi sentir ca hermanu ni raca beneficiar pur bueltu ni riaana sobra ni rudii ca sucursal ca yaʼ? Guzéʼtenu ti ejemplu, ndaaniʼ guidxi Tanzania, jma de galaa de ca binni ni nabeza racá ribáninecaʼ menu de 2 dolár cada dxi, peru biquiiñeʼ sucursal bueltu ni biseendacabe ra nuucaʼ para bicuicaʼ Yoo stiʼ Reinu stiʼ congregación Mafinga. Ca hermanu de congregación riʼ guniʼcaʼ: «Dede dxi biʼniʼ chaahuicabe Yoo stiʼ Reinu stidu, jma jma stale binni rié reunión. Rudiʼdu xquixe peʼ organización stiʼ Jehová ne ca hermanu ni nuu lu guidubi Guidxilayú pur ca donación sticaʼ. Yanna huaxa maʼ nápadu ti lugar sicarú ra runi adorardu Jehová».

 Pur pandemia COVID-19, caadxi hermanu ni nabeza Sri Lanka huaxiéʼ guendaró nápacaʼ. Lade ca hermanu que nuu hermana Imara Fernando ne xiiñibe ni láʼ Enosh. Peru pur ca donación ni bidii xcaadxi guidxi gunda gucuaa hermana riʼ ne xiiñiʼ ni caquiiñecaʼ. Despué bicaacabe ca diidxaʼ riʼ lu ti tarjeta: «Rudiʼdu xquixe peʼ ca hermanu purtiʼ bisihuínnicaʼ nadxiicaʼ laadu ora peʼ cadídidu ra nagana. Nayecheʼ nuudu purtiʼ nácadu parte de familia stiʼ Jehová ne runi orardu para gacané Jehová ca hermanu lu ca últimu dxi riʼ».

 Gastiʼ naca paraa nabeza ca hermanu stinu, peru guiracaʼ riuuláʼdxicaʼ gudiicaʼ de ni nápacaʼ. Guzéʼtenu ti ejemplu, Enosh xiiñiʼ hermana Imara, biʼniʼ ti caja huiiniʼ para gusaba ca donación stiʼ ne zaqué gacané ca familia ni jma caquiiñeʼ ni. Hermana Guadalupe Álvarez laaca riuulaʼdxiʼ gacané, nabezabe ti lugar ndaaniʼ guidxi México ra huaxiéʼ runi ganar binni bueltu, peru neca zacá rúnibe biaʼ gándatiʼ para gacanebe ca hermanu. Guadalupe guníʼ: «Rudieeʼ xquixe peʼ Jehová purtiʼ nachaʼhuiʼ ne nadxii naa. Nannaʼ dxicheʼ ca donación stinneʼ ne stiʼ ca hermanu zacaneni ca hermanu ni jma caquiiñeʼ ni tiempu riʼ».

 Nabé nayecheʼ nuu ca sucursal ni ruseendaʼ bueltu para gapa ca hermanu ni caquiiñecaʼ. Anthony Carvalho, ni nuu lu Comité de Sucursal de guidxi Brasil, guníʼ: «Stale iza gucané xcaadxi sucursal laadu ra biseendacaʼ bueltu ra nuudu. Pur ni bíʼnicabe riʼ, maʼ biroobaʼ xhiiñaʼ Reinu lugar ra nuudu riʼ. Yanna maʼ nápadu ni iquiiñedu ne maʼ racanedu xcaadxi sucursal. Runi predicar ca hermanu purtiʼ nánnacaʼ raca dxiiñaʼ riʼ lu guidubi Guidxilayú ne rudiicaʼ cuenta zanda gacanecaʼ casi runi ti discípulo stiʼ Cristu».

 ¿Ximodo zanda gacané ca testigu stiʼ Jehová ca hermanu sticaʼ ni jma caquiiñeʼ ni? Ni jma galán gúnicabe nga uguucabe ca donación stícabe lu obra mundial ne cadi guseendacabe bueltu stícabe sti sucursal de sti guidxi. Zanda uguucabe ca donación stícabe ndaaniʼ caja ni láʼ «Obra mundial» ni nuu ndaaniʼ ca Yoo stiʼ Reinu o zanda gúnicabe ni lu donate.pr418.com. Nabé risaca guiráʼ ca donación ni rudiitu.