Naca música ti regalu sicarú ni bidii Jehová laanu. Zanda gacané ni laanu guiníʼ íquenu cosa galán, chuʼnu nayecheʼ ne chuʼnu gana. Cadi dxandíʼ nga nga ni runi sentirnu ora rucaʼdiáganu ca canción stinu, casi ca ni nuu lu JW Broadcasting® la? Racané ca canción riʼ laanu chuʼnu gaxha de Jehová.

 Dede lu iza 2014, huayaca jma de 70 canción, ne tobi de laaca ni biree lu jma de 500 idioma. Zándaca guinabadiidxaluʼ: «¿Ximodo raca ca canción riʼ? ¿Ne tu runi ca ni?».

 Comité de Enseñanza stiʼ Grupu ni Zániru, ruuyaʼ guni Equipo de Música de Servicios de Audio y Video ca canción riʼ, casi ca ni riree lu JW Broadcasting ne xcaadxi. Trece hermanu ne hermana nga nuu lu Equipo de Música ne ruuyacaʼ gatachaahuiʼ dxiiñaʼ ca, gucaacabe letra stícani, sonidu ne xcaadxi dxiiñaʼ ni raca. Laaca maʼ biʼniʼ aprobar Comité de Enseñanza zanda gacané caadxi hermanu dede ra lidxi para gaca ca dxiiñaʼ ca. Nuu de ca hermanu ca nácacaʼ compositor, músicu ne cantante. Cumu humilde ca hermanu riʼ la? riquiiñecabe ni nánnacabe gúnicabe para gaca ca dxiiñaʼ riʼ ne qué ruyúbicabe gusisaca xcaadxi laacabe.

 ¿Ximodo raca ca canción ca? Primé la? Comité de Enseñanza riníʼ xi relatu de lu Biblia guiree canción ca ne xi racaláʼdxicabe guni sentir ca ni gucaadiaga ni. Despué, ribí Equipo de Música tu guni música stini ne tu gucaa letra stini. Raca ti grabación ne runi revisar Comité de Enseñanza ni ne rudii sugerencia. De racá runi Equipo de Música caadxi cambiu ne runi grabarcaʼ sti biaje. Raca grabar ca canción ca gadxé gadxé lugar, casi ndaaniʼ ca sucursal o ra lidxi ca hermanu.

 Para gaca componer ne gaca grabar ca canción ca, riquiiñeʼ ca hermanu stinu gadxé gadxé programa stiʼ computadora. Laaca riquiiñeʼ stale instrumentu, mezclador de sonido, amplificador, bocina ne micrófono. Risaca cada micrófono biaʼ ti gayuaa ne ti mil dólar o jma. Lu iza 2020 guca gastu 116,000 dólar para bixuíʼ equipu de grabación.

 ¿Xi raca para gaca ahorrar bueltu yaʼ? Lugar de chuʼ stale hermanu Betel lu Equipo de Música, rinábacabe gacané ca voluntariu dede ra lídxicaʼ. Ne lugar de guni grabar ti orquesta naroʼbaʼ ti lugar si, ruzáʼcabe música lu computadora.

 ¡Guizáʼ riuulaʼdxiʼ ca hermanu gucaadiágaca’ ca canción riʼ! Sicaríʼ guníʼ ti hermana de Alemania ni láʼ Tara: «Ora nuu xiixa ni naguu xizaa naa, riguixhedxí ca canción ca ladxiduáʼ. Ora rucaadiaʼgaʼ ca ni, runeʼ sentir casi ñaca caguiidxi Jehová naa». Ne ti hermanu láʼ Dimitri, ni nabeza Kazajistán, guníʼ: «Riuuladxeʼ gucaadiaʼgaʼ ca canción ca, purtiʼ qué ricá iqueʼ pa zeeda xiixa cosa feu luni. Nannaʼ lu Biblia zeeda guiráʼ ni ná ni. Ne racané ca ni naa guicá iqueʼ chuaaʼ gaxha de Jehová».

 Delia, ti hermana de Sudáfrica guníʼ ximodo runi sentir ora rucaadiaga ca canción riʼ: «Racané ca ni chuʼ fe stinneʼ naguidxi. Ora nuaaʼ triste o napaʼ guendanagana, ridxelaʼ ti canción ni racané naa lu peʼ ni caquiiñeʼ. Nuu biaje, música si ca riguixhedxí ladxiduáʼ».

 Stale hermanu ne hermana, nápacaʼ canción ni riuuláʼdxicaʼ. Lerato, ti hermana de Sudáfrica, guníʼ: «Ca canción Maʼ gaxhadóʼ nuuni ne Dxandíʼ zacaanu guendanabani ca racané ca ni naa guiníʼ iqueʼ ora guuyaʼ jñaaʼ guiasa de lade gueʼtuʼ. Cada biaje gucaadiaʼgaʼ ca ni, ruxuiʼluáʼ zeeda guxooñebe zeedabe ra nuaaʼ».

 Nuu ti canción ni guizáʼ gucané ti baʼdudxaapaʼ de Sri Lanka. Laabe guniʼbe: «Guizáʼ feu guiráʼ ni gudxi profesora de Ciencias stinneʼ naa nezalú ca compañeru stinneʼ purtiʼ nacaʼ testigu stiʼ Jehová. Guizáʼ bidxibeʼ dede qué nidxelaʼ xi ñabeʼ laabe. Ora yendayaʼ ra lidxeʼ, gudxi jñaaʼ naa gucaadiaʼgaʼ canción Fuerte tú serás. Gucané canción que naa guieneʼ nabé risaca guneʼ investigar ne gacaʼ preparar ante guinieeʼ de ni runeʼ cré. Sti dxi que gunieniáʼ profesora stinneʼ. Bicaadiágabe naa ne gúdxibe naa maʼ riénebe xi runeʼ cré. Rudieeʼ xquixe peʼ organización stiʼ Jehová purtiʼ rúnicaʼ canción ni riguu gana».

 ¿Paraa riree bueltu para gaca ca canción riʼ? Riree ca ni de ca donación ni rudiitu para obra mundial lu gadxé gadxé modo raca donar lu donate.pr418.com. Xquixe peʼ laatu pur ca donación ni rudiitu de guidubi ladxidoʼto.