Guiráʼ iza riuunisa stale mil binni. Pur nga caquiiñeʼ jma yoo para gaca adorar Jehová. Nga runi, ca departamento local de Diseño y Construcción ni nuu lu guidubi Guidxilayú, gudixhe íquecaʼ gucuicaʼ o guni chaahuicaʼ jma de 2,700 yoo ra raca adorar Jehová lu iza de serviciu 2020. a

 Triste guininu ni, peru pandemia stiʼ COVID-19 huacueezani stale de ca dxiiñaʼ riʼ. Para gápadu ca hermanu ne chinándadu ca ley stiʼ gobiernu, maʼ bicueeza Comité de Publicación stiʼ Grupu ni Zániru stale de ca dxiiñaʼ riʼ. Peru lu iza de serviciu 2020 gunda bicuidu ne biʼniʼ chaahuidu jma de 1,700 lugar ra raca adorar Dios, ante guzulú pandemia. Laaca biluxe jma de ti gayuaa proyectu risaca stiʼ ca yoo ni riquiiñeʼ ca sucursal ca. Guidúʼyanu chupa de laacani ne ximodo racané ni ca hermanu.

 Sucursal stiʼ Camerún. Sucursal ni guyuu dxiqué guyuu ni ndaaniʼ guidxi Duala, nahuiiniʼ ni ne caquiiñeʼ gaca chaahuiʼ stale cosa ndaaniʼ ni. Guníʼ ique Comité de Publicación gaca chaahuiʼ sucursal riʼ, peru biiyacabe jma caru zaree ni. Laaca biiyacabe pa zanda gucuícabe edificiu sti lugar o sícabe ne guni chaahuicabe sti edificiu. Peru nin tobi de ca ndiʼ qué ñanda ñúnicabe.

 Peru gunna ca hermanu nuu ca autoridad gúnicaʼ ti carretera ladu guiaʼ de guidxi Duala, gaxha de ra nuu ti Salón de Asamblea stinu. Zacané carretera nacubi ri’ para ganda chindá ca hermanu ra sucursal nagueenda ne gapa sucursal ri’ guirá’ cosa ni caquiiñe’. Ngue peʼ ni caquiiñecabe. Ngue runi biʼniʼ aprobar Grupu ni Zániru cuiʼ sucursal nacubi que lu terrenu stiʼ Salón de Asamblea que.

 Biʼniʼ contratar ca hermanu que ti empresa para guni caadxi dxiiñaʼ stiʼ proyectu que, ne zaqué biʼniʼ ahorrárcabe tiempu ne bueltu. Jma huaxiéʼ bisaca ni que biaʼ guníʼ íquecabe, guca ahorrar jma de chupa millón de dólar. Gunda yebíʼ ca betelita ndaaniʼ sucursal nacubi que ante guzulú pandemia stiʼ COVID-19.

 Yanna nabeza ca betelita de Camerún ne cayúnicaʼ dxiiñaʼ ndaaniʼ ti edificiu galán, ne ruuyacabe sucursal nacubi riʼ casi ti regalu stiʼ Jehová. Sicaríʼ guníʼ ti guendaxheelaʼ: «Yanna racaláʼdxidu gúnidu jma dxiiñaʼ ne qué riaandaʼ laadu pabiáʼ risaca regalu riʼ».

 Oficina Remota de Traducción ni runi traducir idioma tojolabal (México). Stale iza guyuu equipu ni runi traducir idioma tojolabal ra sucursal stiʼ Centroamérica, gaxha de guidxi México. Peru ra jma riníʼ binni diidxaʼ tojolabal nga guidxihuiiniʼ Altamirano ne Las Margaritas, ni riaana biaʼ 1,000 kilómetru de ra sucursal. Ngue runi guca nagana para ca traductor que gunadiágacaʼ stiidxacaʼ guiráʼ dxi. Ne guca nagana para sucursal guidxela hermanu ni nabeza gaxha ni riníʼ idioma riʼ ni zanda gacané lu traducción ne lu grabación.

 Ngue runi gudixhe Comité de Redacción stiʼ Grupu ni Zániru cheʼ equipu riʼ ti lugar ra riníʼcabe tojolabal. Ne para nga la? guzíʼ sucursal ne biʼniʼ chaahuiʼ ti edificiu. Jma baratu biree ni laacabe que nucuícabe o niguíxecabe ti lugar para gaca ca oficina riʼ.

 Ti traductor guníʼ ximodo runi sentir: «Guyuaaʼ chii iza ra sucursal ne bineʼ dxiiñaʼ de traductor, peru biaʼ tiempu ca qué nidxelaʼ nin ti familia ni riníʼ idioma stinneʼ. Yanna la? maʼ ra riníʼ binni tojolabal nuu oficina stidu. Guiráʼ dxi zanda guinieniáʼ binni idioma stinneʼ. Racané ndiʼ naa guiniéʼ diidxaʼ stinneʼ jma jneza ne guneʼ dxiiñaʼ stinneʼ jma galán».

 Para lu iza de serviciu 2021, gudixhe íquedu chuʼ 75 oficina de traducción ne yoo para Escuelas Bíblicas. Laaca nuu xhono proyectu ni chigaca ndaaniʼ gadxé gadxé sucursal, tobi de laani nga Rámapo (Nueva York) ne ra guidxaa sucursal ni nuu Argentina ne Italia de lugar. Caquiiñeʼ cuiʼ jma de ti mil Yoo stiʼ Reinu nacubi. Laaca nuu jma de 6,000 lugar ra ridagulisaanu ni caquiiñeʼ guidxaa purtiʼ maʼ cadi galán nuu ca ni, ne nuu 4,000 Yoo stiʼ Reinu ni caquiiñeʼ gaca chaahuiʼ.

 ¿Paraa riree bueltu para gaca ca proyectu riʼ yaʼ? Sicaríʼ guníʼ hermanu Lázaro González, ni nuu lu Comité de Sucursal stiʼ Centroamérica. Ndiʼ nga ni guniʼbe de Oficina de Traducción lu diidxaʼ tojolabal: «Cadi stale bueltu napa ca hermanu ni nabeza lu territorio stiʼ sucursal. Pa ñaca qué ñacané ca hermanu ni nuu lu guidubi Guidxilayú la? qué ñanda nibí ca oficina de traducción para ca hermanu ni riníʼ sti idioma. Pur ca donación riʼ, zanda guséʼndadu ca traductor para gúnicaʼ dxiiñaʼ gaxha de ra riníʼcabe idioma sticaʼ. Rudiʼdu xquixe peʼ ca hermanu pur ca donación ni rudiicaʼ de guidubi ladxidoʼcaʼ». Casi maʼ bidúʼyanu, randa raca ca proyectu de construcción riʼ pur ca donación ni rudii binni lu guidubi Guidxilayú. Stale de laa ca ni randa raca ca ni lu donate.pr418.com.