Guiráʼ iza, stale hermanu ni nuu lu guidubi naca Guidxilayú riecaʼ Escuela Bíblica de Galaad de Watchtower, lugar ra raca ca scuela ni runi xquidxi Dios ni nuu Patterson (Nueva York). a Lu scuela riʼ riziidiʼ ca hermanu riʼ ximodo gúnicaʼ dxiiñaʼ ni nápacaʼ ndaaniʼ xquidxi Dios jma jneza. Laaca riziidicabe ximodo gacanécabe congregación ne ca sucursal ni nuu lu guidubi Guidxilayú.

 Galaad nga ti scuela ra rié stale hermanu de gadxé gadxé guidxi. Casi lu clase 147, ni guca lu iza 2019, guyé 56 hermanu de 29 guidxi. Ca hermanu ni rié scuela riʼ nácacaʼ betelita, misioneru, precursor especial o superintendente de circuito.

 Raca stale cosa ante guzulú scuela riʼ. Departamento de Viaje ni nuu ra Central Mundial stiʼ ca Testigu stiʼ Jehová rizíʼ boletu de avión stiʼ ca hermanu ni cheʼ scuela riʼ. Ca hermanu ni guyé scuela ni guca Patterson, lu clase 147, bisaca boletu de avión stiʼ cada tobi 1,075 dólar. Ca hermanu ni nabeza lu islas Salomón gucuaacaʼ tapa avión para guyecaʼ Patterson, ne despué gucuaacaʼ chonna avión para bibiguétacaʼ ra lídxicaʼ. Biaʼ si 35,400 kilómetru biʼniʼ viajárcabe. Ne bisaca boletu de avión stiʼ cada tobi de laacabe 2,300 dólar. Para gaca ahorrar bueltu, riquiiñeʼ Departamento de Viajes ti programa ni ruyubi boletu de avión baratu. Neca maʼ guca apartar ca boletu riʼ, ruyúbiruʼ programa riʼ boletu jma baratu caadxi semana o beeu ante. Laaca riquiiñeʼ Departamento de Viajes ca cupón ni runi donar ca hermanu ni nabé runi viajar.

 Stale de ca hermanu ni rié scuela riʼ caquiiñecaʼ visa para chuʼcaʼ Estados Unidos. Nga runi, racané Departamento de Asuntos Legales ni nuu ra Central Mundial laacabe para gápacabe ti visa de estudiante. Cada trámite bisaca ni biaʼ 510 dólar.

 ¿Xi ribeendunu pur rié ca hermanu riʼ scuela ca yaʼ? Hendra Gunawan nga ti ancianu ni nabeza Sureste stiʼ Asia, ndaaniʼ congregación ra riebe rié ti guendaxheelaʼ ni guyé Escuela de Galaad. Sicaríʼ guniʼbe: «Dxiqué gastiʼ nin ti precursor regular ndaaniʼ congregación stidu. Peru yanna ra maʼ bedandá guendaxheelaʼ riʼ, maʼ gucanécabe xcaadxi hermanu ne laaca maʼ gúcacaʼ precursor. Ne maʼ guyé ti hermana de congregación stidu Escuela para Evangelizadores del Reino».

 Sicaríʼ guníʼ Sergio Panjaitan, ni runi dxiiñaʼ ra sucursal de Sureste stiʼ Asia, runinebe xcaadxi hermanu ni guyé Escuela de Galaad dxiiñaʼ. Sicaríʼ guniʼbe: «Guiráʼ ni biziidiʼ ca hermanu riʼ ti ndaayaʼ ni para laacabe ne para laadu. ¡Guizáʼ riziidicabe lu scuela ca! Peru lugar de guiníʼ íquecabe jma risácacabe que xcaadxi, ruluíʼcabe xcaadxi hermanu ni biziidicabe. Riguu ndiʼ gana laadu, ne laadu riguʼdu gana xcaadxi».

 ¿Ximodo riaxa para ganda cheʼ ca hermanu riʼ scuela ca yaʼ? Riquiiñeʼ ca donación ni rudii ca hermanu de guidubi Guidxilayú para guiaxa ca ni. Stale de ca donación ca rúnicabe ni de gadxé gadxé modo lu donate.pr418.com. Xquixe peʼ laatu pur ca donación ni rúnitu de guidubi ladxidoʼto. Racané ca ni para ganda gaca scuela nabé risaca riʼ.