Gudxi Jesús ca discípulo stiʼ: «Zácatu testigu stinneʼ [...] dede ra jma zitu lu guidxilayú» (Hechos 1:8). Né stale gana cayuni cumplir ca testigu stiʼ Jehová mandatu riʼ. Neca zacá, nuu lugar caʼruʼ gaca predicar lu Guidxilayú riʼ, casi ndaaniʼ ca guidxi ra nuu stale binni. Ne nuu guidxi huaxiéʼ Testigu nuu (Mateo 9:37, 38). Yanna, ¿xi cayúnidu para chindadu ra nuu jma binni yaʼ?

 Para ganda guni cumplirdu mandatu ni bidii Jesús, ruseendaʼ Comité de Serviciu stiʼ Grupu ni Zániru stiʼ ca Testigu stiʼ Jehová misioneru ndaaniʼ ca lugar ra jma caquiiñeʼ tu guni predicar. Tiempu riʼ nuu 3,090 misioneru ni cayuni ni ná Dios lu guidubi Guidxilayú. a Stale de laacabe maʼ guyécabe scuela para gánnacabe jma de Biblia, casi Escuela para Evangelizadores del Reino. Riuu ca misioneru riʼ dispuestu para gusaanacaʼ familia sticaʼ ne checaʼ sti guidxi. Cumu riníʼ íquecabe jneza, maʼ biziidicabe de lu Biblia ne ma’ nápacabe experiencia runi predicárcabe ca noticia galán ne riguu ejemplu stícabe gana ca discípulo nacubi.

 Ndaaniʼ cada sucursal, racané Sección de Ministros en el Campo ni nuu lu Departamento de Servicio Comité de Sucursal para gudiica’ ni caquiiñeʼ ca misioneru. Rudiicabe ti lugar ra cuézacaʼ, rápacabe laacaʼ ne rudiicabe ti ndaa bueltu para gastu sticaʼ. Lu iza de serviciu 2020, biquiiñeʼ ca testigu stiʼ Jehová biaʼ 27 millón de dólar para ca misioneru. Gucané ndiʼ ca misioneru para cadi gusaana de guni predicarcaʼ ne gacanecaʼ ca congregación ra nuucaʼ.

 ¿Ximodo racané ca misioneru dxiiñaʼ de gaca predicar? Frank Madsen, ti hermanu ni nuu lu Comité de Sucursal ndaaniʼ guidxi Malaui, guníʼ sicaríʼ: «Cumu nadxibalú ca misioneru ne maʼ biziidicaʼ stale, huayacanecaʼ ca congregación guzulú guni predicarcaʼ ca territorio jma nagana, casi ca guidxihuiiniʼ ra huaxiéʼ riná binni gucaadiaga de sti religión ne ca lugar ra riníʼcabe sti idioma. Ne ora ruuyaʼ ca hermanu stipa ni rúnicabe pur guiziidicabe cultura ne idioma sticaʼ riguuni gana laacaʼ. Laaca riguu ca misioneru gana ca joven para guni servircaʼ de tiempu completu. Naquiiñeʼ gudiʼnu xquixe peʼ Jehová pur ca misioneru».

 Ne sti hermanu ni nuu lu Comité de Sucursal de sti guidxi, guníʼ: «Rusihuinni ca misioneru ca, naca ca testigu stiʼ Jehová ti guidxi ni nuu lu guidubi Guidxilayú ne nuunu tobi si. Dede ca binni ni cadi naca Testigu ruuyacaʼ neca nácanu de intiica guidxi qué ridíndenu. Ni rizíʼdinu de lu Biblia racané ni laanu gannaxhiinu ca hermanu ni nuu lu guidubi Guidxilayú».

 Yanna, ¿ximodo racané ca misioneru ca publicador ni nuu ndaaniʼ congregación sticaʼ yaʼ? Ti hermanu láʼ Paulo, de Timor Oriental, rudii xquixe peʼ pur dxiiñaʼ ni runi ca misioneru ni nuu ndaaniʼ congregación stiʼ. Sicaríʼ guniʼbe: «Nabézadu ti lugar guizáʼ nandáʼ. Ne neca zeeda ca misioneru ca de ti lugar ra nananda, qué rucueeza ni laacabe. Qué riaadxacabe ca reunión para predicación ni raca ca siadóʼ, ne stale biaje rúnicabe revisita galaa dxi, ora jma peʼ nandáʼ. Ne laaca runi predicárcabe huadxí. Maʼ gucanécabe stale binni guiziidiʼ de Jehová, ne naa nga tobi de laacabe. Rúnicabe xhiiñaʼ Jehová de guidubi ladxidóʼcabe, ne nga rucaa congregación gúnicaʼ xhiiñaʼ Dios né stale gana».

 Ketti, ti precursora regular de Malaui, bizeeteʼ ximodo gucané ti guendaxheelaʼ de misioneru familia stiʼ, laa guníʼ: «Dxi guca asignárcabe ndaaniʼ congregación stinneʼ, naasiaʼ nacaʼ Testigu ndaaniʼ familia stinneʼ. Guizáʼ gucanécabe naa ne guca xhamígucabe familia stinneʼ. Né ejemplu stícabe biziidiʼ ca xiiñeʼ, pa guni servirnu Jehová dxandíʼ zabáninu nayecheʼ. Ne yanna guioonaʼ xiiñeʼ maʼ nácacaʼ precursora regular ne maʼ bizulú xheelaʼ cayé reunión».

 ¿Paraa riree bueltu ni riquiiñeʼ para gacanedu ca misioneru ni nuu lu guidubi Guidxilayú yaʼ? Rireecani lu donación ni raca para obra mundial. Stale de laacani raca ca ni lu donate.pr418.com. Xquixe peʼ laatu pr donación ni rúnitu.