Guiráʼ beeu ribézadu né stale gana guidúʼyadu programa ne videu ni riguiʼbaʼ lu JW Broadcasting ni riguu gana laadu. Peru stale de ca hermanu stidu ni nuu África qué randa ruuyacaʼ ni lu internet. ¿Xiñee yaʼ?

 Purtiʼ stale de ca lugar stiʼ África gastiʼ internet. Ne ra nuu internet la? nabé caru ne nanene ni. Guzéʼtenu ti ejemplu, ti dxi guyé ti superintendente de circuito ndaaniʼ ti ciber para guindeteʼ programa ni riree cada beeu JW Broadcasting ne gupa xidé gudíxebe 16 dólar. a Jma stale ndiʼ que biaʼ runi ganar stale binni lu ti semana.

 Neca nuu ca guendanagana riʼ, millón de binni ni nuu África randa ruuyacaʼ JW Broadcasting sin iquiiñecaʼ internet. ¿Ximodo rúnicabe yaʼ?

 Dede lu iza 2017, ca ni nabeza ndaaniʼ ca guidxi stiʼ África ni nuu zitu de nisadóʼ Mediterráneo randa ruuyacaʼ JW Broadcasting lu ti canal de televisión ni riquiiñeʼ señal stiʼ satélite. Que riguíxecabe para ganda gúʼyacabe canal riʼ ne ridiʼdiʼ ni guidubi dxi interu semana lu 16 idioma.

 Para ganda chuʼ canal riʼ riguixe ca testigu stiʼ Jehová ti canal de televisión para gutiidicaʼ ca programa sticaʼ ne señal stiʼ satélite. Rindá señal stiʼ satélite riʼ lu 35 guidxi stiʼ África ni nuu zitu de nisadóʼ Mediterráneo ne risaca ni 12,000 dólar cada beeu. Ne nuu biaje riguíxedu sti ndaa bueltu para gutíʼdidu sti programa lu sti canal ora peʼ cayaca ni. Pur ndiʼ la? stale binni zanda guʼyaʼ asamblea regional ne programa especial ora riganna ti representante stiʼ central mundial sucursal.

 Stale binni, casi ca Testigu ne ni cadi Testigu, ruuyacaʼ canal riʼ lu televisión sticaʼ. Peru raca nagana para stale hermanu sicaʼ antena ni riquiiñeʼ para gúʼyacaʼ ni. Nga runi maʼ guca instalar antena ndaaniʼ biaʼ 3,670 Yoo stiʼ Reinu. Ne zacá maʼ randa ruuyaʼ ca hermanu JW Broadcasting. Risaca ndiʼ 70 dólar maca né saca guseendacabe ni pa maʼ napa Yoo stiʼ Reinu ca ti pantalla o ti proyector. Peru pa qué gapa ni la? zasaca ca equipu riʼ 530 dólar.

 Guizáʼ rudii ca hermanu xquixe peʼ pur nápacaʼ canal riʼ. Ti ancianu de Camerún guníʼ sicaríʼ: «Zeeda gácani casi maná lu desiertu para familia stinneʼ». Odebode, sti hermanu de Nigeria guníʼ: «Naa ne familia stinneʼ ridúʼyadu canal riʼ chonna biaje lu ti semana. Ribeza peʼ ca xiiñeʼ guedandá dxi ridúʼyadu ca programa riʼ. Ne dede rinábacabe laadu cuʼdu programa ca para gúʼyacabe ni». Rose, ti hermana de Nigeria guníʼ: «¡Guizáʼ nuaaʼ nayecheʼ! Dxiqué nabé biiyaʼ noticia, yanna jma riuuladxeʼ guuyaʼ canal JW. Ora biiyaʼ noticia la? guizáʼ nagueenda bidxiicheʼ ne riguiʼbaʼ presión stinneʼ. Peru guizáʼ riguu canal JW gana naa ne riguixhedxí ni ladxiduáʼ... Laani nga canal ni jma riuuladxeʼ. Ti ndaayaʼ stiʼ Jehová ni».

 Ti superintendente de circuito de Mozambique guníʼ maʼ nuu antena ni ricaa señal stiʼ satélite ndaaniʼ ca Yoo stiʼ Reinu ni nuu lu circuito stiʼ para ganda gúʼyacaʼ canal JW. Rié ca hermanu que ti hora ante o jma ra Yoo stiʼ Reinu para gúʼyacaʼ JW Broadcasting ante guzulú reunión sticaʼ.

 Lu ti asamblea internacional ni guca lu iza 2019 ndaaniʼ guidxi Johannesburgo (Sudáfrica), biquiiñeʼ canal riʼ para ganda guʼyaʼ ca hermanu ca discursu ni bitiidiʼ ca hermanu ni nuu lu Grupu ni Zániru ndaaniʼ gaʼ lugar. Sphumelele, ti hermanu ni runi dxiiñaʼ lu Departamento Local de Broadcasting stiʼ sucursal stiʼ Sudáfrica, guníʼ: «Ante la? lu internet nga bitíʼdidu ca discursu que. Ne para nga la? caquiiñeʼ gápadu internet galán ne sidu datu. Peru jma baratu riree gutíʼdidu ni lu canal ni riquiiñeʼ satélite ne jma seguru ni».

 Pur ca donación stitu, maʼ riquiiñeʼ satélite para guʼyaʼ ca hermanu ni nuu África JW Broadcasting. Xquixe peʼ laatu pur ca donación ni rúnitu para obra mundial lu ca modo rácani lu donate.pr418.com.