«Qué lica niníʼ íquenu pa zanda guicaanu guendaró espiritual lu formatu electrónicu». ¿Ñee zacaca riníʼ íqueluʼ la? Ca diidxaʼ riʼ nga ni guníʼ hermanu Geoffrey Jackson lu Informe xhoopaʼ sti’ Grupu ni Zániru ni biree lu iza 2020. Laaca guniʼbe: «Ne yanna laaca riníʼ íquenu xi ñúninu yanna ra nuu pandemia riʼ pa qué ñápanu JW Library. Maca xadxí nga cayuni preparar Jehová laanu para ca dxi nagana riʼ».

 ¿Ximodo cayuni preparar Jehová laanu yaʼ? ¿Xi guca para gunda guyáʼ aplicación JW Library? ¿Ne xi caquiiñeʼ para gaca ni jma galán?

 Lu beeu mayo de 2013, gunabaʼ Grupu ni Zániru ti departamentu ni nuu ra central mundial ni lá Programación de MEPS, guzaʼcaʼ ti aplicación ni gapa Biblia Traducción del Nuevo Mundo. Paul Willies, ti hermanu runi dxiiñaʼ lu departamentu riʼ guníʼ: «Qué huayuu dxi guzadu ti aplicación ni chuʼ ra riete xcaadxi aplicación. Para gunda guyáʼ ni gupa xidé bicueezadxidu caadxi proyectu ni nápadu, bizadu ti equipu ne bíʼninedu xcaadxi departamentu ni nuu Betel dxiiñaʼ. Guizáʼ biʼniʼ orardu Jehová ne bidúʼyadu ximodo gucanebe laadu: gaayuʼ si beeu despué maʼ bihuinni aplicación que lu reunión anual».

 Despué gúpadu sti guendanagana: laani nga cuʼdu jma publicación lu stale idioma lu JW Library. Lu beeu enero de 2015, maʼ nuu stale publicación lu diidxaʼ inglés lu aplicación riʼ, ne xhoopaʼ beeu despué, maʼ zanda guni descargárcabe publicación lu jma de ti gayuaa idioma.

 Cayuni ca hermanu riʼ dxiiñaʼ para gaca aplicación riʼ jma galán. Maʼ guluucabe stale videu ne ti pestaña ra nuu guiráʼ ni caquiiñenu para gaca prepararnu para ca reunión. Laaca maʼ zanda guyúbinu ca referencia ni zeeda lu Ca tema ni huabee ca testigu stiʼ Jiobá lu Biblia.

 Cada beeu ruxheleʼ binni JW Library lu jma de 15 millón de dispositivu electrónicu. Ne guiráʼ dxi ruxheleʼ binni aplicación riʼ lu 8 millón de dispositivu. ¿Xi caquiiñeʼ gaca para ganda iquiiñeʼ aplicación riʼ lu stale dispositivu yaʼ? Sicaríʼ bisiene Paul Willies ni: «Qué ribezadxidu de gúnidu dxiiñaʼ lu ni. Siempre caguʼdu cosa nacubi lu ni para cadi gaca nagana binni iquiiñeʼ ni. Ne cumu gatigá raca actualizar ca sistema operativu stiʼ ca dispositivu electrónicu la? nga runi naquiiñeʼ gúnidu dxiiñaʼ para gaca aplicación riʼ compatible né ca versión jma nacubi. Ne cumu zeʼ dxi nuu jma grabación ne publicación lu JW Library, nga runi naquiiñeʼ guni actualizardu software ni nápadu ne gudiʼdu ni mantenimientu». Tiempu riʼ, lu JW Library nuu jma de 200,000 publicación ne jma de 600,000 grabación de audio ne videu lu gadxé gadxé idioma.

 Para ganda guni actualizardu aplicación riʼ la? cadi caquiiñeʼ si gápadu stale equipu informáticu. Laaca naquiiñeʼ sidu stale licencia de software. Ti licencia ca risaca ni 1,500 dólar lu ti iza. Laaca riquiiñeʼ Departamento de Programación de MEPS biaʼ 10,000 dólar lu ti iza para sicaʼ dispositivu de gadxé gadxé marca ti zacá gúʼyacaʼ pa runi aplicación ca dxiiñaʼ lu ca computadora, tableta ne celular jma nacubi.

 Pur aplicación JW Library maʼ qué riquiiñedu stale bueltu para guni imprimirdu, guni encuadernardu ne guséʼndadu publicación. Guidúʼyanu ni bizaaca né folletu Guidúʼndanu Stiidxaʼ Dios guiráʼ dxi. Ni biree lu iza 2013, guca imprimir 12 millón de laani. Peru, ni biree lu iza 2020, gaayuʼ millón si guca imprimir neca guyuu biaʼ 700,000 publicador jma lu guidubi Guidxilayú. Ndiʼ rusihuinni maʼ lu JW Library a ruundaʼ stale hermanu textu stiʼ dxi.

 De gadxé gadxé modo zanda gacané JW Library lii. Guzéʼtenu ni bizaaca ti hermana ni láʼ Geneviève, laa nabeza Canadá. Laabe nabe racané aplicación riʼ laabe guni estudiarbe jma jneza. Sicaríʼ guniʼbe: «Qué ñuneʼ estudiar ca siadóʼ ca pa ñaca caquiiñeʼ cueniáʼ stale libru. Peru né aplicación riʼ, ni caquiiñeʼ si guneʼ nga gucaaguieʼ tableta stinneʼ, ne racá ridxelaʼ guiráʼ ni caquiiñeʼ para guneʼ estudiar. Cumu guiráʼ dxi runeʼ estudiar racaneni naa gapaʼ ti fe jma naguidxi ne chuaaʼ jma gaxha de Jehová».

 Guizáʼ huaquiiñenu aplicación riʼ lu pandemia stiʼ COVID-19. Guzéʼtenu ni guníʼ ti hermana ni láʼ Charlyn, de Estados Unidos: «Pur nuu COVID-19 lu guidubi Guidxilayú, maʼ ziniáʼ jma de ti iza qué gapaʼ nin ti publicación ni guca imprimir. Peru lu JW Library ridxélanu guiráʼ ni caquiiñenu para chuʼnu jma gaxha de Jehová. Rudieeʼ xquixe peʼ Jehová pur regalu sicarú riʼ».

 Stale tu riníʼ ique casi Faye, ti hermana ni nabeza Filipinas. Laabe guniʼbe: «Guizáʼ galán aplicación riʼ, napa ni guiráʼ ni caquiiñeʼ para chuaaʼ gaxha de Jehová. Riquiiñeʼ ni para guundaʼ siadóʼ, para gucaadiaga xiixa ni cuʼ gana naa laga cayuneʼ buelta ra yoo, para gacaʼ preparar para reunión ne para guneʼ estudiar Biblia. Ora maʼ caziiladxeʼ, riquiiñeʼ ni para guuyaʼ videu. Ne ora zuhuaa lu ti fila cabezaʼ guni tendércabe naa, riquiiñeʼ ni para guundaʼ Biblia ne ca publicación stinu. ¡Guizáʼ risaca aplicación riʼ!».

 Laaca riquiiñeʼ aplicación riʼ para guni predicarnu. Ti hermana de Camerún guizáʼ guyuulaʼdxiʼ ti textu de lu Biblia ni biquiiñeʼ compañera de predicación stiʼ. Gudiʼdiʼ si caadxi semana gucaláʼdxibe niquiiñebe ni, peru maʼ qué rietenaláʼdxibe xi textu que. Laabe guniʼbe: «Galán nga bietenalaʼdxeʼ caadxi diidxaʼ ni zeeda lu textu que. Ngue runi bixheleʼ aplicación que, guyuaaʼ lu Biblia ne bicaaʼ ca diidxaʼ que lu buscador. Pur aplicación riʼ, randa ridxelaʼ ca textu ni riaandaʼ naa».

 Ca donación ni rúnitu de gadxé gadxé modo lu donate.pr418.com, riquiiñeʼ ca ni para ganda gaca actualizar aplicación JW Library ne gácani jma galán. Ne zanda gacané ni guiráʼ hermanu ni nuu lu guidubi Guidxilayú. Xquixe peʼ laatu pur ca donación ni rudiitu de guidubi ladxidoʼto.

1. Octubre de 2013: biree aplicación riʼ ne laaca biree revisión stiʼ Traducción del Nuevo Mundo lu diidxaʼ inglés.

2. Enero de 2015: Guyuu jma publicación lu diidxaʼ inglés lu ni ne despué lu stale idioma.

3. Noviembre de 2015: Guyuu ti opción para guni marcarluʼ lu ni.

4. Mayo de 2016: Guyuu ti ícono ni láʼ «Reuniones» lu ni.

5. Mayo de 2017: Guyuu ti opción para gucaaluʼ nota lu ni.

6. Diciembre de 2017: Guyuu Biblia de estudiu lu diidxaʼ inglés lu ni.

7. Marzo de 2019: Guyuu opción para guni descargarnu audio, guidúʼyanu videu ne guidúʼndanu ca referencia ni zeeda lu Ca tema ni huabee ca testigu stiʼ Jiobá.

8. Enero de 2021: Guca activar stale cosa lu libru ¡Zanda guibániluʼ nayecheʼ! Para gudiʼnu estudiu binni.