Tiempu riʼ ricaa ca xpinni Jehová stale publicación ne videu ni zeeda lu Biblia lu formatu electrónicu. Peru stale lugar lu Guidxilayú qué randa riguixe ca hermanu Internet. Ne nuu tu laa nabeza lugar ra nabé rié Internet, nanene ni o gastiʼ ni.

 Peru tiempu riʼ stale hermanu randa runi descargar ca publicación ne videu sin iquiiñecaʼ Internet. ¿Ximodo yaʼ?

 JW Box nga ti cajahuiiniʼ ni ricaa ca congregación ni nuu ca lugar ra huaxiéʼ nuu Internet. Para gunda guca ni la? bixuíʼ rúter lu ti empresa, ne Departamentu de Computación ni nuu Betel bíʼnicaʼ ti programa ra nuu publicación ne videu ni nuu lu jw.org. Risaca cada cajahuiiniʼ riʼ biaʼ 75 dólar.

 Ra Yoo stiʼ Reinu, raca conectar ca hermanu lu JW Box pur wifi ne runi descargarcaʼ publicación ne videu. Dede ca teléfono ne tableta ni jma nayooxhoʼ ne ni jma baratu randa raca conectar lu cajahuiiniʼ riʼ. Yanna, pa qué gapa ca congregación ca Internet yaʼ, ¿ximodo randa rapa JW Box ca información ni jma nacubi yaʼ? Gatigá ruseendaʼ sucursal memoria USB ra nuu ca congregación ca, risaca ti memoria ca biaʼ 4 dólar, ne zeeda información jma nacubi ni nuu lu jw.org luni. Raca conectar memoria USB ca lu JW Box para ganda guni descargar ca hermanu información ni jma nacubi.

 ¿Ximodo huayacané JW Box ca hermanu stinu yaʼ? Nathan Adruandra, ti hermanu ni nabeza República Democrática del Congo guníʼ: «Xadxí gupaʼ gana ñuneʼ descargar videu “Jiobá, lii siouʼ nga runeʼ confiar” ne Laguietenalaʼdxiʼ ni bizaaca xheelaʼ Lot, peru qué ñanda diʼ. Ne pur ngue guyuaaʼ triste. Peru yanna maʼ randa runeʼ descargar ca videu ca lu teléfono stinneʼ ne racanécani laadu gusíʼdidu ca xiiñidu».

 Sicaríʼ guníʼ ti hermanu ni racané ca congregación ni nuu Nigeria gaca instalar JW Box: «Para ca hermanu ti regalu ni zeeda de Jehová nga JW Box. Guizáʼ riéchecabe purtiʼ maʼ randa runi descargárcabe ca publicación ne ca videu ni nuu lu kit de enseñanza».

 Maʼ gucuaa stale congregación ni nuu África, Oceanía ne Sudamérica jma de 1,700 JW Box, ne caayadxaruʼ cheʼ stale cajahuiiniʼ riʼ ra nuu stale congregación. ¿Paraa riree bueltu para gaca ca cajahuiiniʼ riʼ yaʼ? De ca donación ni rudii binni lu guidubi Guidxilayú. Stale de ca donación riʼ rácacani lu donate.pr418.com. Xquixe peʼ laatu purtiʼ riuuláʼdxitu gudiitu de ni nápatu.