Coʼ, ca testigu stiʼ Jehová cadi ti secta laadu. Nácadu xpinni Cristu ne rúnidu stipa gúnidu casi biʼniʼ Jesús ne guibánidu modo bisiidiʼ.

 Gadxé gadxé ni riníʼ binni de laani. Guidúʼyanu chupa de laacani ne xiñee qué zanda guininu naca ca testigu stiʼ Jehová ti secta.

•   Nuu tu riníʼ ti secta nga ti religión nacubi ni qué runi ni raca ndaaniʼ stale religión. Laadu ca testigu stiʼ Jehová, qué nindísadu ti religión nacubi. Rinándadu ejemplu stiʼ ca primé xpinni Cristu ne rúnidu cani bisiidicaʼ purtiʼ zeeda cani lu Biblia (2 Timoteo 3:16, 17). Nanna dxíchidu Biblia nga naquiiñeʼ quixheʼ modo gaca adorar Dios.

•   Nuu tu riníʼ ti secta nga ti grupu ni runi cosa ni cadi jneza ne napa tuuxa binni casi xaíque stiʼ. Primé la? laadu ca testigu stiʼ Jehová qué gápadu nin ti hombre o gunaa casi xaíque stidu, purtiʼ rúnidu ni na ca diidxaʼ gudxi Jesús ca discípulo stiʼ: «Tobi si nga xaíque stitu, ne laa nga Cristu» (Mateo 23:10).

 Lugar de gucaa religión stidu laadu gúnidu ni cadi jneza la? laga racané ni laadu ne xcaadxi binni. Casi cani rusíʼdidu binni de Biblia huayacané ni laacaʼ gusaanacaʼ nisadxuʼniʼ ne droga. Laaca racanedu binni guiziidiʼ guʼndaʼ ne gucaa lu guidubi Guidxilayú ne pur nga millón de laacaʼ maʼ nánnacaʼ gúʼndacaʼ ne gucaacaʼ. Sti cosa ni rúnidu nga racanedu ora guizaaca xiixa desastre. Ne rúnidu stipa naroʼbaʼ pur gácadu nachaʼhuiʼ né binni, casi bisiidiʼ Jesús (Mateo 5:13-16).