Laadu, ca testigu stiʼ Jehová, qué rúnidu lanibidóʼ purtiʼ de guidubi ladxidoʼdo runi credu qué riuulaʼdxiʼ Dios gúnidu ni. Nécapeʼ qué riníʼ Biblia cadi naquiiñeʼ gacaʼ ni, peru racaneni laadu guiénedu ximodo ruuyaʼ Dios saa riʼ. Guidúʼyanu tapa cosa ni rusiidiʼ Biblia de laani.

1.   Zeeda lanibidóʼ de religión ni qué rusiidiʼ ni dxandíʼ. Ti diccionariu enciclopédico na runi binni lanibidóʼ purtiʼ runi cré nuu caadxi «espíritu malu ni napa poder ni cuyubi si pora guniná binni cusaa iza», peru «pa nuu ca xhamígube ra nuube ne cayábicaʼ laabe diidxaʼ ni guedané suerte para laabe la? zapa cani laabe» (Funk & Wagnalls Standard Dictionary of Folklore, Mythology, and Legend). Sti libru cusiene xiruʼ biʼniʼ binni dxiqué: ricá lá guiráʼ cani gale, purtiʼ «nabé riquiiñeʼ ni para gaca ti horóscopo» ni ribeecabe lu «ciencia stiʼ astrología». Ne laaca ruzeeteʼ libru riʼ: «Stale binni runi cré napa ca guiʼriʼ ni ruzuhuaacabe lu pastel stiʼ ti binni cusaa iza magia ni racané gaca cumplir ni guinabaʼ binni ca» (The Lore of Birthdays).

    Peru Biblia na malu guni binni magia, guni adivinar, guni xiixa de espiritismo o xcaadxi cosa casi laacani (Deuteronomio 18:14; Gálatas 5:19-21). Tobi de ca razón pur biʼniʼ castigar Dios guidxi Babilonia guyuu dxiqué nga purtiʼ runi practicar ca binni que astrología, ti modo riquiiñeʼ binni para guni adivinar (Isaías 47:11-15). Laadu, ca testigu stiʼ Jehová, huaxiéʼ rizaaláʼdxidu gánnadu paraa biasastí guiráʼ costumbre ne saa ni runi binni, peru riuuláʼdxidu gánnadu xi riníʼ Biblia de espiritismo ne ximodo ruuyaʼ Dios ni.

2.   Qué ñuni ca primé xpinni Cristu lanibidóʼ. Ti enciclopedia ruzeeteʼ ximodo biʼyaʼ ca primé xpinni Cristu saa riʼ: «Para laacabe la? intiica saa guni binni ora cusaa iza zeedani de ca costumbre stiʼ ca binni ni qué runi adorar Dios», o de religión ni qué rusiidiʼ ni dxandíʼ (The World Book Encyclopedia). Biblia na gudixhe ca apóstol ne xcaadxi binni bisiidiʼ Jesús dxi guyuu lu Guidxilayú riʼ xii nga cani naquiiñeʼ guni ca xpinni Cristu yanna (2 Tesalonicenses 3:6).

3.   Qué ñaca mandar diʼ ca xpinni Cristu guietenaláʼdxicaʼ dxi gule tuuxa, sínuque dxi gutiʼ Jesús (Lucas 22:17-20). Ne cadi guendaridxagayaa ni bizéʼtenu riʼ, purtiʼ Biblia na: «Jma sicarú [...] dxi gátinu que dxi gálenu» (Eclesiastés 7:1). Dxi mayaca gatiʼ Jesús lu Guidxilayú riʼ maʼ nácabe ti binni risaca nezalú Dios. Nga runi, jma risaca dxi gútibe que dxi gúlebe (Hebreos 1:4).

4.   Qué ruzeeteʼ Biblia pa guyuu ti xpinni Dios ni biʼniʼ lanibidóʼ. Ñee biaandaʼ nucaacabe ni la? Coʼ. Purtiʼ ruzeeteʼ Biblia de chupa binni ni biʼniʼ lanibidóʼ, peru qué runi adorarcaʼ Dios. Ne huaxiéʼ galán ni riníʼ Biblia ora ruzeeteʼ de guiropaʼ lanibidóʼ riʼ (Génesis 40:20-22; Marcos 6:21-29).

 Cásica runi guiráʼ binni napa xiiñiʼ, ca testigu stiʼ Jehová laaca nadxiicaʼ xiiñicaʼ. Nga runi, intiica si dxi rusigáʼdecabe laacaʼ xiixa ne ruyúbicabe gúnicabe xiixa casi ti saa para chúʼcabe nayecheʼ. Rúnicabe stipa chinándacabe ejemplu stiʼ Dios, purtiʼ laa ora tiica si riuulaʼdxiʼ gudii cosa sicarú ca xpinni (Mateo 7:11). Nga runi, para ca xiiñiʼ ca Testigu cadi cuníticaʼ xiixa galán. Rihuinni zacá ni pur ca diidxaʼ guníʼ caadxi de laacabe:

•   «Jma riuu binni nayecheʼ ora rudiicabe laa ti regalu ni cadi cabeza.» (Tammy, de 12 iza.)

•   «Qué rusigaʼdeʼ bixhozeʼ ne jñaaʼ naa xiixa dxi rusaaʼ iza, peru rúnicabe ni intiica si dxi. Jma riuuladxeʼ gusigáʼdecabe naa xiixa dxi cadi cabezaʼ ni.» (Gregory, de 11 iza.)

•   «Pastel si nga ró ca xcuidi ca ne ruundacaʼ. Qué riuuladxediáʼ ca saa ca, jma galán cani rúnidu ra lidxeʼ.» (Eric, de 6 iza.)