Cani rúnidu ora gatiʼ tuuxa binni (ora gaca ti funeral), ne modo ridúʼyadu ca cosa ca rusihuinni cani zinándadu modo rusiidiʼ Biblia, chiguzéʼtenu chupa chonna ejemplu de laacani:

•   Normal nga chuʼnu triste ora gatiʼ tuuxa ni nadxiinu. Ca discípulo stiʼ Jesús biinacaʼ ora gutiʼ tuuxa binni nadxiicaʼ (Juan 11:33-35, 38; Hechos 8:2; 9:39). Nga runi, para laadu ora gaca ti funeral qué ridúʼyadu ni casi xiixa ni guni festejardu (Eclesiastés 3:1, 4; 7:1-4). Ora gatiʼ ti binni ridúʼyadu ni casi ti oportunidad para gusihuínnidu cayuni sentirdu ni cayuni sentir stiʼ binni (Romanos 12:15).

•   Qué runi sentir ca gueʼtuʼ gastiʼ ne qué riuubaʼ laacaʼ. De intiica raza ziúpadu o cultura, qué rinándadu ca costumbre ne qué rúnidu ca cosa ni runi binni pur creencia stiʼ, casi guiníʼ íquecaʼ nabániruʼ ca binni ni maʼ guti ne zanda gacanecaʼ laanu, purtiʼ cadi nga diʼ rusiidiʼ Biblia (Eclesiastés 9:5, 6, 10). Laadu qué rúnidu ofrenda para ca binni ni maʼ guti ne qué rinínedu laacaʼ, qué rinábadu laacaʼ xiixa favor ne qué rinándadu ca costumbre runi binni ora gatiʼ xheelaʼ tuuxa ne laaca qué rúnidu ca celebración ni rúnicabe para ca gueʼtuʼ, nin mixaʼ ni raca ora gusaacaʼ iza ra runíticabe stale bueltu. Dios cayabi laadu lu Biblia ra ná: «Laixele de laacabe, ne cadi cánatu ni cadi nayá», ne laadu rinándadu ni ná mandatu riʼ ora rucáʼnadu guiráʼ ca cosa ni ná Stiidxaʼ Dios cadi gúnidu (2 Corintios 6:17).

•   Zanda guibani ca gueʼtuʼ ca stiʼ biaje. Biblia rusiidiʼ zedandá dxi guibani ca binni ni maʼ guti ne zedandá dxi maʼ qué ziuu guendaguti (Hechos 24:15; Apocalipsis 21:4). Esperanza riʼ gucané ni ca primé xpinni Cristu ne laaca laani nga racané ni laadu para cadi gúʼnadu casi ruunaʼ binni ora gatiʼ tuuxa familia stiʼ (1 Tesalonicenses 4:13).

•   Biblia rusiidiʼ binni gapa modestia (Proverbios 11:2). Qué ridúʼyadu ca funeral ca casi ti oportunidad para gúnidu xiixa ni guidxagayaa binni o para gusihuínnidu nápadu bueltu ne pabiáʼ risaca binnilídxidu (1 Juan 2:16). Nga runi, qué runítidu stale bueltu ora gúnidu ti funeral casi maʼ biaa binni guni para guni sentircaʼ galán ne laaca qué riquíʼñedu cajón caru ne qué ruzucháʼhuidu stale para guuyadxí binni laadu.

•   Que rucaʼdu binni chinanda creencia stidu ora guni ti funeral. Lugar de nga rinándadu principiu stiʼ Biblia ra ná: «Cada tobi nu zabidxi Dios cuenta laanu» (Romanos 14:12). Ne ora ganda la? rúnidu stipa gusiénedu ni runi credu binni ne rúnidu ni né stale respetu (1 Pedro 3:15).

 Lugar raca ni: Pa ti familia naʼ guni ti funeral, laacabe zanda cuícabe paraa gaca ni. Zanda gaca ni ndaaniʼ Yoo stiʼ Reinu, ndaaniʼ ti funeraria, ndaaniʼ ti yoo, ti lugar ra runi cremárcabe binni (crematorio) o ra pantión.

 Serviciu rudiʼdu ora gatiʼ tuuxa: Para quixhedxidu ladxidóʼ ca binni ni gutiʼ binnilidxi, ridiʼdiʼ ti discursu ra rusiénecabe xi rusiidiʼ Biblia de guendaguti ne de promesa ni caníʼ zabani binni sti biaje (Juan 11:25; Romanos 5:12; 2 Pedro 3:13). Laaca rietenaláʼdxidu ca cosa galán ni biʼniʼ binni ni guti ca ne laaca rinidu xi rizíʼdidu de ejemplu galán stibe pur bizuubabe stiidxaʼ Dios (2 Samuel 1:17-27).

 Zanda guiuundaʼ ti canción ni biree de lu Biblia (Colosenses 3:16). Riluxe serviciu ca né ti oración ni riguixhedxí ladxidóʼ binni (Filipenses 4:6, 7).

 Ñee riaxa la?: Qué runi cobrardu ora raca ti funeral, nin ca ora rudiʼdu sti serviciu ndaaniʼ religión stidu. Qué rinábadu bueltu lu ca reunión ni rúnidu (Mateo 10:8).

 Tu zanda cheʼ: Ora chitiidiʼ discursu de funeral ca ndaaniʼ Yoo stiʼ Reinu qué runi cobrardu para chuʼ binni, raca ni cásica ora rápadu ca reunión stidu. Nga runi, zanda chigucaadiaga ca binni ni cadi naca testigu.

 Cada tobi naquiiñeʼ guicaa decisión stiʼ sin guiaandaʼ laa ni maʼ biziidiʼ conciencia stiʼ de lu Biblia (1 Timoteo 1:19). Peru, qué riuʼdu lu ca costumbre o ceremonia stiʼ ca religión ni cadi zinanda ni rusiidiʼ Biblia (2 Corintios 6:14-17).