Ca testigu stiʼ Jehová rúnidu stipa pur gúnidu cani bisiidiʼ Jesús, ne laaca yenanda ca apóstol stibe cani. Tema riʼ zusiene ni caadxi de ni runi credu.

1.   Dios. Runi adorardu tobi lucha Dios ni dxandíʼ, ni jma nandxóʼ ne ni bizáʼ guiráʼ cosa. Jehová nga labe (Salmo 83:18; Apocalipsis 4:11). Laabe nga Dios stiʼ Abrahán, Moisés ne Jesús (Éxodo 3:6; 32:11; Juan 20:17).

2.   Biblia. Runi credu laani nga mensaje stiʼ Dios para guiráʼ binni guidxilayú (Juan 17:17; 2 Timoteo 3:16). Guiráʼ ni runi credu zeeda cani lu 66 libru ni napa ni, cani zeeda lu Antiguo ne Nuevo Testamento. Zacá bizeeteʼ Profesor Jason BeDuhn ni ora bicaa de ca testigu stiʼ Jehová «lu Biblia nga zeeda cani runi creca’ ne cani rúnicaʼ, ne qué ruchaacaʼ ni ná ni o cadi laacaʼ gudíxheca’ ni ná ni». a

    Neca rúnidu guiráʼ ni rusiidiʼ Biblia, cadi nácadu fundamentalista. Rihuínnica nuu caadxi de ca relatu zeeda lu Biblia gucuá cani né ti lenguaje figurativo o símbólico, nga runi qué zanda guininu literal cani (Apocalipsis 1:1).

3.   Jesús. Zinándadu ejemplu stiʼ Jesucristu ne cani bisiidiʼ, ne rusisácadu laabe purtiʼ zulabe laadu ne Xiiñiʼ Dios laabe (Mateo 20:28; Hechos 5:31). Nga rusihuinni nácadu xpinni Cristu (Hechos 11:26). Peru Biblia qué rusiidiʼ naca Jesús Dios ni jma napa poder ne qué rusiidiʼ ni de Trinidad (Juan 14:28).

4.   Reinu stiʼ Dios. Laani nga ti gobiernu ni nuu guibáʼ; ne cadi xiixa ni nuu ndaaniʼ ladxidóʼ binni. Ziuuni lugar stiʼ guiráʼ gobiernu ne zúnini cani maca racalaʼdxiʼ Dios guni lu Guidxilayú riʼ (Daniel 2:44; Mateo 6:9, 10). Maʼ cadi candaa zaca cani, purtiʼ ca profecía ni zeeda lu Biblia ná maʼ nabáninu lu tiempu ra maʼ cazaa «xhi guidxilayú», o lu ca últimu dxi (2 Timoteo 3:1-5; Mateo 24:3-14).

    Jesús nga Rey lu Reinu stiʼ Dios guibáʼ. Bizulú biʼniʼ mandarbe 1914 (Apocalipsis 11:15).

5.   Ni zulá laanu. Pur bidii Jesús xquendanabani nga zanda guilá binni de pecadu ne guendaguti (Mateo 20:28; Hechos 4:12). Para ganda guilanu la? caquiiñeʼ gápanu fe Jesús, guchaʼnu modo nabáninu ne chuʼnísanu (Mateo 28:19, 20; Juan 3:16; Hechos 3:19, 20). Pur cani guni binni nga zahuinni pa dxandíʼ napa fe (Santiago 2:24, 26). Peru naquiiñeʼ gánnanu zulá Dios laanu purtiʼ guizáʼ nachaʼhuiʼ ne cadi purtiʼ naquiiñeʼ gulá laanu (Gálatas 2:16, 21)

6.   Guibáʼ. Jehová, Jesucristu ne ca ángel fiel nabézacaʼ guibáʼ b (Salmo 103:19-21; Hechos 7:55). Ti grupuhuiiniʼ de binni, biaʼsi 144,000, ziásacaʼ de lade gueʼtuʼ ne zabánicaʼ guibáʼ para guni mandárnecaʼ Jesús lu Reinu stiʼ Dios (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Guidxilayú. Bizáʼ Dios Guidxilayú riʼ para guibani binni luni sin qué chuʼ dxi gatiʼ (Salmo 104:5; 115:16; Eclesiastés 1:4). Zaguu Dios ndaayaʼ binni ni guzuubaʼ diidxaʼ ne ziuuca’ nazaaca ne zabánicaʼ sin qué chuʼ dxi gáticaʼ ndaaniʼ ti paraísu lu Guidxilayú riʼ (Salmo 37:11, 34).

8.   Cosa malu ne guendananá. Biblia cusiene bicaalú ti ángel Dios. Despué bizulú guyuu cosa malu ne guendananá (Juan 8:44). Bicaalú si ángel riʼ Dios la? binibiáʼcabe laa casi Diablu ne Binidxabaʼ, bicaabe Adán ne Eva guidaagucaʼ laabe. Pur laacabe gupa ca xiiñicabe stale guendanagana (Génesis 3:1-6; Romanos 5:12). Para guixá ca cosa ni cadi jneza guníʼ Binidxabaʼ, cudii Dios lugar chuʼ cosa malu ne guendananá ti tiempu, purtiʼ naguíxhebe ziuu dxi cueebe cani.

9.   Guendaguti. Ora rati binni nga riluxe xquendanabani (Salmo 146:4; Eclesiastés 9:5, 10). Ne qué racanácabe lu guí ndaaniʼ ti infiernu.

    Zusibani Dios millón de binni ni maʼ guti (Hechos 24:15). Peru pa qué naʼ ca binni ni guibani de lade gueʼtuʼ guzuubacaʼ stiidxaʼ Dios la? záticaʼ sti biaje ne maʼ qué ziuuruʼ dxi guibánicaʼ (Apocalipsis 20:14, 15).

10.   Familia. Casi modo maca gudixhe Dios ni, para laadu ti guendaxheelaʼ nga guichaganáʼ ti hombre ne ti gunaa, ne ti razón risaca si para gaca divorciar ti guendaxheelaʼ nga ora chuʼné tobi de laacaʼ sti binni ni cadi xheelaʼ (Mateo 19:4-9). Nanna dxíchidu guizáʼ risaca ca conseju ni zeeda lu Biblia ne racané ni ca familia guibánicaʼ nayecheʼ (Efesios 5:22-6:1).

11.   Adoración stidu. Qué runi adorardu cruz, ne nin ti clase bidóʼ (Deuteronomio 4:15-19; 1 Juan 5:21). Raríʼ zeeda xcaadxi cosa risaca rúnidu para guni adorardu Dios:

    •   Runi orardu Dios (Filipenses 4:6).

    •   Ridúʼndadu Biblia ne runi estudiardu ni (Salmo 1:1-3).

    •   Riníʼ íquedu cani ridúʼndadu lu Biblia (Salmo 77:12).

    •   Ridagulisaadu para guni orardu, guidúʼndadu Biblia, gúʼndadu canción juntu, gusihuínnidu fe stidu ne uguʼdu gana xcaadxi (Colosenses 3:16; Hebreos 10:23-25).

    •   Runi predicardu ca diidxaʼ sicarú de Reinu stiʼ Dios (Mateo 24:14).

    •   Racanedu cani jma caquiiñeʼ ni (Santiago 2:14-17).

    •   Rucuidu Yoo stiʼ Reinu ne runi chaahuidu cani ne zaqueca rúnidu né xcaadxi lugar ni riquiiñeʼ para ganda guiziidiʼ jma binni de Biblia (Salmo 127:1).

    •   Racanedu ora rizaaca xiixa desastre natural (Hechos 11:27-30).

12.   Organización stidu. Nuudu organizadu pur congregación. Ndaaniʼ cada tobi de laacani nuu ancianu ni ruuyaʼ modo gaca dxiiñaʼ ndaaniʼ cani, cadi casi ca clérigu laacabe ne qué riáxacabe (Mateo 10:8; 23:8). Qué rudiʼdu diezmu ne qué rúnidu colecta (2 Corintios 9:7). Raca ca dxiiñaʼ stidu né bueltu ni rudii binni biaʼ naʼ ladxidóʼ ne nuu biaje guirutiʼ ranna tu rudii cani.

     Ti grupuhuiiniʼ de xpinni Cristu ni napa stale experiencia, runibiáʼcabe ni casi Grupu ni Zaniruʼ, laacaʼ ruuyacaʼ modo gaca dxiiñaʼ stiʼ ca testigu stiʼ Jehová dede ndaaniʼ sede mundial stidu (Mateo 24:45).

13.   Nuudu tobi si. Neca de gadxé gadxé guidxi laadu, ngueca ni runi credu (1 Corintios 1:10). Rúnidu stipa pur cadi gúnidu menu stobi purtiʼ si pobre laa, o purtiʼ de gadxé raza o de gadxé guidxi laa (Hechos 10:34, 35; Santigao 2:4). Neca tobi si nuudu, cada tobi riguixhe ique xi guni ne rinanda ni gabi xconciencia laa purtiʼ maʼ bisiidiʼ ni modo ná Biblia (Romanos 14:1-4; Hebreos 5:14).

14.   Conducta stinu. Rúnidu stipa pur gusihuínnidu dxandíʼ nadxiidu binni lu guiráʼ ni gúnidu (Juan 13:34, 35). Rucueezadu laadu de gúnidu ca cosa ni qué riuulaʼdxiʼ Dios. Nga runi riuʼdu cuidadu iqueeñedu rini jneza. Qué ricadu rini. (Hechos 15:28, 29; Gálatas 5:19-21). Nácadu binni nachaʼhuiʼ ne qué riuudu lu guerra (Mateo 5:9; Isaías 2:4). Runi respetardu ca gobiernu ne rinándadu ca ley stícabe pa qué zucaa cani laadu guchéʼnedu ca ley stiʼ Dios (Mateo 22:21; Hechos 5:29).

15.   Modo ridxaagadu xcaadxi binni. Sicaríʼ guníʼ Jesús: «Gunaxhii stobi cásica nadxii lu lii». Laaca guniʼbe de ca xpínnibe «cadi zinanda cabe guidxilayú» (Mateo 22:39; Juan 17:16). Rúnidu stipa pur gacanedu binni, nácadu binni neutral, qué riuʼdu lu política ne qué riuʼdu lu xcaadxi religión (Gálatas 6:10; 2 Corintios 6:14). Peru runi respetardu ni quixhe ique binni guni lu intiica cosa (Romanos 14:12).

 Pa racaláʼdxiluʼ gannuʼ jma de cani runi cré ca testigu stiʼ Jehová la? zanda guiziidiluʼ jma de laadu lu sitiu ni nápadu lu Internet. Laaca zanda gucaaluʼ ra oficina stidu, cheluʼ tobi de ca reunión stidu ra Yoo stiʼ Reinu ni riaana jma gaxha de ra lídxiluʼ, o guinabadiidxaluʼ ti Testigu ni nuu neza ra nabézaluʼ.