Nuu binni ridiʼdiʼ tiempu para guiziidicaʼ de ca cosa feu ni bizaacacaʼ. Naa nga tobi de laacabe. Guleʼ Barcelona ne raqué biniiseʼ, guiropa guidxi jma naroʼbaʼ ni nuu España. Familia stinneʼ guleza ti lugar láʼ Somorrostro, ti guidxihuiiniʼ jma naroʼbaʼ ni nuu gaxha de ra playa. Nabé runibiáʼ binni lugar riʼ purtiʼ rutoocabe droga ne ribáʼnacabe.

 Naa nga jma huaniiseʼ de lade gaʼ baʼduʼ gupa jñaaʼ ne bixhozeʼ. Cumu nabé pobre gúcadu la? biseendaʼ bixhozeʼ naa chiguneʼ dxiiñaʼ ndaaniʼ ti club de tenis ni nuu guidxi que para chitopaʼ pelota. Napaʼ chii iza dxiqué ne bineʼ dxiiñaʼ chii hora ti dxi. Qué randa riaaʼ scuela casi xcaadxi xcuidi biaʼ naa. Dxi napaʼ 14 iza bineʼ dxiiñaʼ ndaaniʼ ti taller de herrería.

 Lu iza 1975 gulídxicabe naa guneʼ servicio militar, dxiqué runi obligárcabe binni guni ni España. Cumu rapaʼ gana guneʼ sti cosa lu xquendanabaneʼ la? ngue runi bicaaʼ laʼyaʼ chuaaʼ lu grupu militar láʼ La Legión española ni nuu Melilla, ti territorio stiʼ España ni nuu ladu guiaʼ de África. Tiempu que nga biabaʼ lu viciu stiʼ droga ne nisadxuʼniʼ.

 Dxi bireeʼ lu grupu que, biguetaʼ Barcelona ne bineʼ ti pandilla. Ribánadu intiica cosa ne despué rutoʼdo cani para gápadu bueltu sidu droga. Bizulú guduʼbaʼ LSD ne anfetamina, ne biquiiñeʼ tiempu stinneʼ para gapaʼ relación sexual, gueʼ nisadxuʼniʼ ne quiteʼ apuesta. Modo bibaneʼ ca bicaa ni naa gacaʼ ti binni ni nabé ridinde. Qué riaadxaʼ ti gudxíu lu nayaʼ, ti jacha o ti machete. Ne guyuaaʼ dispuestu iquiiñeʼ cani ora tiica si.

 Ti biaje, pandilla stinneʼ ne naa gulánadu ti carru ne guzananda puliciá laadu pur ngue. Cásipeʼ lu película. Guzanándacabe laadu 30 kilómetru dede ora bizulú ca puliciá que bichacaʼ tiru laadu. Últimu bidxelasaanedu coche que ne biree guxóʼñedu. Ora gunna bixhozeʼ ni, guladxi naa de ra yoo.

 Gaayuʼ iza gulezaʼ lu calle. Guseʼ ra puertaʼ stiʼ caadxi edificiu, ndaaniʼ camión, lu ca banguʼ ni nuu ra parque ne ra pantión. Dede gulezaʼ ti tiempu ndaaniʼ ti cueva. Bineʼ sentir qué risaca xquendanabaneʼ ne guirutiʼ rizaalaʼdxiʼ pa nabaneʼ o pa maʼ guteʼ. Rietenalaʼdxeʼ ora maʼ nuaaʼ drogadu ruchuuguaʼ nayaʼ ne yanni nayaʼ. Ne de yanna náparuaʼ ca cicatriz ca.

 Dxi napaʼ 28 iza, bedayubi jñaa naa ne gúdxibe naa ibiguetaʼ ra yoo. Gudxeʼ laabe zabiguetaʼ ne zuchaaʼ modo nabaneʼ. Peru gudiʼdiʼ tiempu para gunda bineʼ ni.

 Ti huadxí beeda chupa testigu stiʼ Jehová ra lídxidu. Laga cucaadiagaʼ laacabe, bicaa bixhozeʼ ridxi dede dentru que ná guseeguaʼ puertaʼ que neca zuhuaa ca binni que raqué. Peru cumu ridxiicheʼ chuʼ tu guni mandar naa la? qué ñuneʼ ni. Bisaanané ca Testigu que naa chonna libruhuiiniʼ, ne cayecheʼ gucuaaʼ cani, gunabadiidxaʼ laacabe paraa ridagulisaacabe. Qué nindaa maʼ zuhuaaʼ ra puertaʼ stiʼ Yoo stiʼ Reinu.

 Primé ca ni bidxagayaaʼ raqué nga guuyaʼ modo zuchaahuiʼ ca binni que. Peru naa ziuulaʼ guicha iqueʼ, guizáʼ feu guicha ruaaʼ ne nayuxe xhabaʼ. Guníʼ iqueʼ qué zanda chuaaʼ raqué, ngue runi biaanaʼ fuera. ¡Peru guizáʼ bidxagayaaʼ ora biiyaʼ Juan raqué, tobi de ca xhamiguaʼ ni guyuu lu pandilla stinneʼ dxiqué! ¡Peru zuchaahuibe ne de traje laabe! Despué gunnaʼ maʼ nápabe ti iza de nácabe testigu stiʼ Jehová. Ora biiyaʼ laabe raqué bidii ni confianza naa para chuaaʼ dentru. Dede dxi que bizulú bichaa xquendanabaneʼ.

 Gunabaʼ guʼndanécabe naa Biblia ne nagueendaca bidieeʼ cuenta caquiiñeʼ gusaanaʼ ca cosa malu ni runeʼ que pa racalaʼdxeʼ chuulaʼdxiʼ Dios modo naa. Peru guizáʼ nagana guca ni. Biziideʼ caquiiñeʼ guchaaʼ xquendanabaneʼ ne ni riníʼ iqueʼ para gusiecheʼ Jehová (Romanos 12:2). Bidxagayaaʼ modo biá Dios naa. Purtiʼ neca maʼ bicheeʼ stale, bineʼ sentir casi ora cudiibe ti oportunidad naa para guzuluáʼ sti biaje. Cani biziideʼ de Jehová yendá cani dede ndaaniʼ ladxiduáʼ. Bieneʼ nuu ti Creador ni rizaalaʼdxiʼ naa (1 Pedro 5:6, 7).

 Ngue bicaa naa guchaaʼ. Casi ti biaje ora cayuundanécabe naa Biblia gunidu cadi jneza cubaʼ binni gueza, óraque guníʼ iqueʼ: «Pa Jehová ná gaca xquendanabaneʼ nayá, caquiiñeʼ gusaabeʼ ca gueza riʼ» (2 Corintios 7:1). Ngue runi yesaabeʼ cani ndaaniʼ guixi.

 Laaca naquiiñeʼ gusaanaʼ de cubaʼ ne gutuaaʼ droga. Ngue guca jma nagana para naa. Para ganda gusaanaʼ ca viciu que, gupa xidé bisaanaʼ de guidxaagaʼ ca xhamiguaʼ, purtiʼ qué zanda guneʼ ni ná Jehová pa guidxaagaruáʼ laacabe. Gudiʼdiʼ tiempu jma maʼ gupaʼ confianza Dios ne ca xhamiguaʼ ni nacubi cayunebiaʼyaʼ ndaaniʼ congregación. Qué ñuu dxi nidxaagaʼ binni ni dxandíʼ nadxii casi ca hermanu. Ra zidiʼdiʼ beeu gunda bisaanaʼ ca droga que ne maʼ nabaneʼ «modo naguixhe Dios», casi ora ñacuáʼ ti lari cubi, purtiʼ zacá zanda guneʼ ni riuulaʼdxiʼ Jehová (Efesios 4:24). Guyuaanisaʼ casi ti testigu stiʼ Jehová lu beeu agosto de iza 1985.

 Gucané Biblia naa gulaʼyaʼ xquendanabaneʼ. Bilá ni naa de stale cosa ni ñuniná naa ne de nusaana binni de ñapa respetu naa. Jma de treinta de ca xhamiguaʼ nahuiinirucaʼ gúticaʼ de sida ne de xcaadxi guendahuará pur ca droga ni gudúʼbacaʼ. Peru naa rudieeʼ xquíxepeʼ Dios, purtiʼ yenandaʼ ca conseju stiʼ Biblia, ne zaqué maʼ qué niluxeʼ casi bilúxecabe.

 Ca gudxíu ne jacha ni guzayaniáʼ dxi gudindeʼ que maʼ bisaanaʼ cani. Ni dxandíʼ la? qué ñuu dxi niníʼ iqueʼ nizayaniáʼ Biblia para gacaniáʼ binni lugar de laacani. Yanna riʼ, naa ne xheelaʼ ribeedu stale tiempu para guni predicardu.

 Neca qué lica ñaca bixhozeʼ ne jñaaʼ testigu stiʼ Jehová, bidiicabe cuenta gucané Biblia naa stale. Dede bixhozeʼ runi defender ca Testigu nezalú ca xhamigu ne nanna dxíchibe religión stinneʼ que nga gucané naa para bichaaʼ modo naa. Yanna jñaaʼ ná xiñee qué nuzulú ñuundaʼ Biblia de dxiqué. ¡Nápabe stale razón!

 Cani maʼ bizaacaʼ riʼ bisiidiʼ cani naa gannaʼ qué ziuu binni nayecheʼ lu ca droga ca nin lu xcaadxi viciu. Ni rusiecheʼ naa stale nga gacaniáʼ binni ganna de cani dxandíʼ rusiidiʼ Stiidxaʼ Dios, cani dxandíʼ bilá xquendanabaneʼ.