Guleʼ Uganda, ndaaniʼ ti guidxi láʼ Gomba. Nabé pobre ca binni de raqué. Cumu qué gápadu biaaniʼ la? riquiiñedu lámpara de aceite ora maʼ zixhinni.

  De Ruanda bixhozeʼ ne jñaaʼ peru despué yendézacaʼ Uganda. Bidxiibacabe café ne biduaa, ne riquiiñecabe ca biduaa que para gúnicabe ti licor ni láʼ waragi. Laaca bisiroobacabe bere, chivu, bihui ne yuze. De nahuiineʼ bisiidicabe naa naquiiñeʼ guzuubaʼ ti gunaa stiidxaʼ xheelaʼ ne cadi naquiiñeʼ guiníʼ xi riníʼ ique, zaqué nga costumbre stiʼ ca binni de raqué.

 Yendezaʼ Ruanda dxi napaʼ 23 iza, raqué nabé guyuuladxeʼ chaaʼ baile né xcaadxi joven biaʼ naa. Rietenalaʼdxeʼ nabé guyaaʼ ra ti discoteca dede bidiicabe naa ti pase para chuaaʼ gratis. Laaca nabé guyuuladxeʼ guuyaʼ película ra cadíndecabe ne ra cayuuticabe binni. Pur guiráʼ ni ruuyaʼ ne ca binni ni ridxaagaʼ nabé guxudxeʼ, bineʼ practicar pecadu sexual ne gucaʼ ti binni qué iquiiñeʼ.

 Lu iza 2000 que yendezaniáʼ ti baʼdudxaapaʼ ni láʼ Skolastique Kabagwira, ne gúpadu chonna xiiñidu. Pur modo bisiidicabe naa dxi nahuiineʼ, guníʼ iqueʼ caquiiñeʼ guzuxíbibe nezaluáʼ para ugapadiuxibe naa o cada guinábabe naa xiixa. Laaca guníʼ iqueʼ stinneʼ siaʼ guiráʼ ni nápadu que ne zanda iquiiñeʼ ca ni modo gapaʼ gana. Stale biaje rireeʼ maʼ huaxhinni ne maʼ naxudxeʼ ribiguetaʼ ra lidxeʼ biaʼ las tres de la mañana. Riguaaʼ golpe ra puertaʼ ne pa guindaa Skolastique para guxheleʼ la? riguiñeʼ laa.

 Ca dxi que, cayuneʼ dxiiñaʼ casi supervisor de seguridad privada, ne galán runeʼ ganar. Gucala’dxi’ Skolastique niniá’ laa ra yu’du’ pentecostal ra rié, guníʼ íquebe zaqué zuchaaʼ modo nacaʼ. Peru qué nina’ya’. Lugar de nga gupaʼ stiʼ gunaa. Cumu nabé binena’ya’ Skolastique pur guiráʼ ni runeʼ que la? yebí’nebe ca xiiñidu ra lidxi bixhózebe ne jñaabe.

 Ti xhamígudu maʼ huaniisi gudxi naa huaxiéʼ galán modo nabaneʼ que. Pur guiráʼ ni gúdxibe naa que, bicaa ni naa guibiguetaniaʼ Skolastique. Guniʼbe huaxiéʼ galán guiniisi ca xiiñidu sin bixhózecaʼ. Ngue runi lu 2005 que bisaanaʼ de xhudxeʼ, laaca bisaanaʼ sti gunaa gupaʼ que ne biguetaniaʼ Skolastique. Bichaganadu lu 2006 que, peru caʼruʼ diʼ guchaaʼ, runeʼ maltratar ruaʼ xheelaʼ.

 Lu 2008 que, bixhidxináʼ ti testigu stiʼ Jehová láʼ Joël ra lidxeʼ, ne bicaadiagaʼ laa. Laabe ne sti Testigu láʼ Bonaventure yegánnacabe naa chupa chonna beeu, peru nisi ruyubeʼ gucaaluáʼ laacabe. Bineʼ laacabe stale pregunta, jmaruʼ si de ca ni ruzeeteʼ libru stiʼ Apocalipsis. Bineʼ ni para si gusihuinneʼ cadi dxandíʼ ni rusiidiʼ ca Testigu. Gudxeʼ laacabe xiñee rusiidicabe ndaaniʼ Guidxilayúʼ riʼ nga chiguibani ca binni ni ruzeeteʼ Apocalipsis 7:9, pa lu versículo ca ná zuhuaacabe «delante de trono [stiʼ Dios] ne delante de Dendxuhuiiniʼ». Né stale paciencia bicabi Joël ca pregunta stinneʼ. Gúdxibe naa, lu Isaías 66:1 ná zeeda gaca Guidxilayú riʼ casi ra riguixhe ñeebe. Nga runi, ca binni ni ruzeeteʼ Apocalipsis dxandíʼ zuhuaacaʼ delante de trono stiʼ Dios. Laaca biindaʼ lu Salmo 37:29 ra ná lu Guidxilayú riʼ nga chiguibani ca binni ni runi ni jneza.

 Gudiʼdiʼ si tiempu, bidieeʼ lugar gudiicabe naa estudiu. Bonaventure nga bidii estudiu naa ne Skolastique. Chaahuiʼ chaahuiʼ gucané Biblia naa guchaaʼ modo nabaneʼ. Biziideʼ guneʼ respetar xheelaʼ ne maʼ qué ribezaʼ guzuxíbibe para ugapadiuxibe naa o para guinábabe naa xiixa, ne maʼ qué niníʼ iqueʼ stinneʼ guiráʼ ni nápadu. Laaca bisaanaʼ de guuyaʼ película ra cadíndecabe. Guizáʼ nagana guca para naa gusaanaʼ guiráʼ ndiʼ; gupa xidé biziideʼ gacaʼ humilde ne gucueezaʼ laca naa.

 Chupa chonna iza ante, yesaanaʼ Christian, xiiñeʼ ni jma huaniisi, Uganda para cuezané chupa chonna familia nápadu raqué. Peru despué de biindaʼ ni ná Deuteronomio 6:4-7, bidieeʼ cuenta nezalú Dios la? naa ne xheelaʼ nga naquiiñeʼ gápadu ca xiiñidu ne gusíʼdidu laacaʼ ni zeeda lu Biblia. ¡Guizáʼ nayecheʼ guyuʼdu dxi bibiguétabe! ¡Ne laabe laaca nayecheʼ guyuube!

 Biziideʼ naca Jehová ti Dios ni riáʼ ne neca bineʼ stale cosa ni cadi jneza dxiqué, peru nuaa’ seguru maʼ bi’ni’ perdonarbe naa. Guizáʼ biecheʼ purtiʼ laaca guná Skolastique guni estudiar Biblia. Guca dedicardu Jehová ne guyuʼnísadu 4 de diciembre de 2010. Yanna maʼ napasaadu confianza laadu ne laaca riuuláʼdxidu chinándadu ca conseju ni zeeda lu Biblia para gápadu familia stidu. Nabé riuulaʼdxiʼ xheelaʼ casi peʼ guireeʼ de dxiiñaʼ maca ziaaʼ ra yoo. Laaca riuuláʼdxibe gapaʼ ne guneʼ respetar laabe, ne biéchebe dxi gudixheʼ iqueʼ maʼ qué lica xhudxeʼ. Yanna huaxa maʼ nabánibe nayecheʼ purtiʼ maʼ bichaaʼ modo nacaʼ. Lu 2015 que gucaʼ ancianu para gacaniáʼ congregación. Ne lade gaayuʼ xiiñidu, chonna de laacaʼ maʼ guyuunísacaʼ.

 Dxi bizulú ca testigu stiʼ Jehová biindanecaʼ naa Biblia, cadi casi ziaaʼ bineʼ cré guiráʼ ni. Peru ti cosa ni guizáʼ bidxagayaaʼ nga cada biaje guinabadiidxaʼ laacabe xiixa ricábicabe naa né Biblia. Naa ne Skolastique bidiʼdu cuenta ca binni ni racalaʼdxiʼ gacaʼ xpinni Dios naquiiñeʼ guibánicaʼ modo riuuláʼdxibe. Rudieeʼ xquixe peʼ Jehová purtiʼ gulí naa ne bidii lugar chuaaʼ ndaaniʼ familia stiʼ. Né ni bizaacaʼ riʼ, maʼ bidieeʼ cuenta zanda gacané Dios tutiica binni gapa gana guchaa ne guibani modo riuuláʼdxibe.