Guleʼ ndaaniʼ guidxi Calgary, ni nuu ndaaniʼ guidxi Alberta (Canadá). Dxi nahuiineʼ, guca divorciar bixhozeʼ ne jñaaʼ, ne yendezaniáʼ jñaaʼ ra lidxi ca bixhozebiidaʼ. Guizáʼ gunnaxhiicabe laadu, ne nayecheʼ guyuaaʼ raqué. Qué ziuu dxi guiaandaʼ naa tiempu que.

 Peru bichaa xquendanabaneʼ dxi napaʼ gadxe iza. Bichaganáʼ jñaaʼ bixhozeʼ sti biaje ne yendézadu San Luis, Misuri (Estados Unidos). Qué nindaa bidieeʼ cuenta guizáʼ naduxhuʼ bixhozeʼ. Primé dxi guyaaʼ scuela, gudíñecabe naa ne qué ñacaʼ defender. Ora gunna bixhozeʼ ni, guizáʼ bidxiichiné naa ne jma naná gudiñe naa. Dede dxi que maʼ guyuuladxeʼ tindeʼ ra scuela.

 Xpiaʼ bixhozeʼ que bichiichi ni jñaaʼ ne pur ngue guizáʼ ridinde diidxacabe. Dxi napaʼ 11 iza bizuluáʼ gudubaʼ droga ne guxudxeʼ. Gucaʼ ti binni naduxhuʼ ne nisi maʼ cuyubeʼ tindeʼ. Dxi biluxeʼ secundaria maʼ nacaʼ ti binni ni guizáʼ riuulaʼdxiʼ tinde.

 Dxi napaʼ 18 iza guyuaaʼ lade Marina stiʼ Estados Unidos. Ne raqué biziideʼ guuteʼ. Despué de gaayuʼ iza bireeʼ de raqué ne bineʼ estudiar Psicología, ti ganda guneʼ dxiiñaʼ né FBI. Bizuluáʼ bineʼ estudiar Estados Unidos, ne despué bineʼ estudiar Canadá.

 Dxi cayuneʼ estudiar ndaaniʼ universidad, bineʼ sentir pur gana si nuaaʼ raqué. Biiyaʼ nabé ruyubi binni puru si para laa. Ne bineʼ sentir qué zanda gaca chaahuiʼ ca guendanagana nuu lu Guidxilayú riʼ. Qué zanda diʼ guni chaahuiʼ binni ca guendanagana ca.

 Ngue gulee gana naa, ne bizuluáʼ gudubaʼ droga ne guxudxeʼ ne nisi guníʼ iqueʼ gapaʼ bueltu ne chuaaniáʼ gunaa. Guizáʼ guyaaʼ saa ne guyuaaniáʼ jma gunaa. Cumu guyuaaʼ lade Marina la? bineʼ sentir guirutiʼ zanda guni ganar naa ne siempre ruyubeʼ tindeʼ. Ora guuyaʼ cayuninácabe tuuxa, maca zigucaaluáʼ laa para guneʼ justicia. Maʼ gucaʼ ti binni ni guizáʼ riuulaʼdxiʼ tinde.

 Ti dxi, nuaaniáʼ ti xhamiguaʼ ra lidxeʼ ne guizáʼ maʼ gudúbadu droga, ne caguʼduʼ listu ti paquete marihuana para gutoʼdo, málasi gunabadiidxaʼ xhamiguaʼ que naa pa runeʼ cré Dios. Para gudxeʼ laabe: «Pa Dios napa donda pur cayacaná binni, ¡xi guneʼ gannaʼ de laabe yaʼ!». Sti dxi, primé dxi guyaaʼ dxiiñaʼ, ti compañeru stinneʼ ni naca testigu stiʼ Jehová gunabadiidxaʼ naa: «¿Ñee rábiluʼ Dios napa donda pur cayacaná binni la?». ¡Guizáʼ bidxagayaaʼ! Purtiʼ ti dxi ante gunieeʼ Dios napa donda pur guiráʼ yuubaʼ ni nuu. Ngue bicaa naa guyubeʼ gannaʼ jma de Dios. Lu xhoopaʼ beeu guniʼné hermanu que naa de Biblia, ne bicábibe ca pregunta ni huayuneʼ.

 Qué ñuulaʼdxiʼ baʼdudxaapaʼ ni nabezaniaʼ que guinieniáʼ laa de ni caziideʼ. Ti domingu gudxeʼ laabe bineʼ invitar ca Testigu gueedacaʼ ra yoo para gudiicaʼ estudiu laadu. Sti dxi, ora biguetaʼ de dxiiñaʼ maʼ bitópabe ca cosa stibe ne zebe. Bireeʼ lu calle que ne cayuunaʼ. Ne bineʼ orar Dios gacané naa. Ngue nga primé biaje gunieeʼ lá Dios, Jehová, lu ti oración (Salmo 83:18).

 Chupa gubidxa despué, bizulú ti guendaxheelaʼ bidii estudiu naa. Zésicabe, bizuluáʼ biindaʼ libru ni cudiinécabe naa estudiu, laani nga libru Usted puede vivir para siempre en el paraíso en la Tierra. Ti gueelaʼ si biindaʼ guidubi ni. a Ni biziideʼ de Jehová ne de Xiiñiʼ, Jesucristu, yendani ndaaniʼ ladxiduáʼ. Bieneʼ riaʼ Jehová binni ne riuubaʼ ladxidoʼbe ora gúʼyabe cayacananu (Isaías 63:9). Ti cosa ni yendá ndaaniʼ ladxiduáʼ nga ora gunnaʼ nadxii Dios naa ne bidii Xiiñiʼ para gatiʼ pur naa (1 Juan 4:10). Bidieeʼ cuenta napaʼ Jehová paciencia naa «purtiʼ qué racaláʼdxibe guinitilú nin tobi, ni racaláʼdxibe nga gaca arrepentir guiráʼ binni» (2 Pedro 3:9). Bineʼ sentir racalaʼdxiʼ Jehová chuaaʼ gaxha de laa (Juan 6:44).

 Ne semana que bizuluáʼ guyaaʼ reunión. Ziuulaʼ guicha iqueʼ ne nandaʼ arete dede ridxibi binni ora guʼyaʼ naa, nabé galán modo bidxaagalú ca Testigu naa, casi ñaca nidxaagalucaʼ ti familia sticaʼ ni maʼ xadxí de qué huayuuyacaʼ. Guizáʼ galán bineʼ sentir casi dxi guyuaaʼ ra lidxi bixhozebiidaʼ, peru jma galán.

 Qué nindaa, gucané ca ni caziideʼ de lu Biblia que naa guchaa modo nabaneʼ. Bigayaʼ guicha iqueʼ, bisaanaʼ viciu de gapaʼ gunaa, xhudxeʼ ne cubaʼ droga (1 Corintios 6:9, 10; 11:14). Racalaʼdxeʼ chuulaʼdxiʼ Jehová ni cayuneʼ. Ngue runi, ora riziideʼ qué riuulaʼdxiʼ Jehová xiixa cosa ni cayuneʼ, nagueendaca rusaanaʼ ni ne riníʼ iqueʼ: «Maʼ qué zuneʼ diaʼ ni». Laaca bichaaʼ modo nabaneʼ ne modo riníʼ iqueʼ. Ra bineʼ ca cosa riʼ, biiyaʼ pabiáʼ riguu Jehová ndaayaʼ ca ni runi ni nabe. Ne 29 de julio de 1989, xhoopaʼ beeu despué de ricaaʼ estudiu, guyuaanisaʼ ne gucaʼ ti testigu stiʼ Jehová.

 Huayacané Biblia naa guchaaʼ modo naa. Dxiqué, guizáʼ nagueenda ridxiicheʼ ora gucaalúcabe naa. Peru yanna runeʼ stipa chuaaʼ «en paz né guiráʼ binni» (Romanos 12:18). Ne Jehová nga huayacané naa, purtiʼ napa Stiidxabe ne espíritu santu stibe poder ne racaneni guchaaluʼ modo nabániluʼ (Gálatas 5:22, 23; Hebreos 4:12).

 Maʼ qué riuuladxeʼ cubaʼ droga, guendaridinde ne gapaʼ stale gunaa, yanna runeʼ stipa guneʼ ni riuulaʼdxiʼ Jehová. Gudiʼdiʼ si caadxi iza despué de guyuaanisaʼ, guyaaʼ sti país yegacaniáʼ ra nuu huaxiéʼ binni para guni predicar. Lu ca iza huadiʼdiʼ ca huayuuyaʼ ximodo huayacané Biblia stale binni guchaa modo nabani ne yanna maʼ nabánicaʼ galán. Sti cosa ni rusiecheʼ naa nga maʼ naca jñaaʼ testigu stiʼ Jehová, purtiʼ biiyabe modo gucané Biblia naa guchaa modo nabaneʼ.

 Lu iza 1999 gucaʼ graduar ndaaniʼ guidxi El Salvador lu ti cursu ni láʼ yanna Escuela para Evangelizadores del Reino. Raqué biziideʼ guneʼ predicar jma jneza, gusiideʼ ndaaniʼ congregación ne gapaʼ ca hermanu ne hermana. Ne iza queca bichaganaʼyaʼ ti hermana láʼ Eugenia. Yanna guirópadu rúnidu xhiiñaʼ Dios de tiempu completu ndaaniʼ guidxi Guatemala.

 Yanna maʼ qué riuaaʼ triste, sínuque guizáʼ nayecheʼ nabaneʼ. Yanna maʼ libre naa purtiʼ zinandaʼ ni rusiidiʼ Biblia, maʼ cadi nacaʼ ti binni ni riuulaʼdxiʼ tinde ne maʼ qué runeʼ cosa ni cadi jneza. Nannaʼ nadxii Dios naa ne rudii naa paz stiʼ, ne nga rusiecheʼ ni naa.