Biniiseʼ fuera de guidxi Tampere, Finlandia, ti lugar tranquilu ra nabé nuu yaga nagáʼ. Qué ñapa familia stinneʼ religión, peru rusisácacabe cheʼ xiiñicabe scuela ne gápacaʼ respetu binni. De Alemania jñaaʼ, pur ngue nabé guyaaʼ raqué dxi gucaʼ nahuiiniʼ purtiʼ raqué guleza bixhozebiidaʼ ne jñaabiidaʼ.

 Dxi nahuiineʼ gudxiteʼ caadxi deporte purtiʼ guizáʼ guyuuladxeʼ cani. Peru dxi gupaʼ 14 iza guliéʼ guiaanaʼ lade equipu de tenis. Dxi maʼ gupaʼ 16 iza bineʼ entrenar chupa o chonna biaje ti dxi. Chupa biaje gucuaaʼ entrenamientu profesional. Ne huadxí la? maʼ stubeʼ bineʼ practicar. Guizáʼ guyuuladxeʼ guiráʼ modo gudxítecabe juegu riʼ. Nabé nagana biʼyaʼ deporte que purtiʼ biquiiñeʼ stipa ne guendabiaaniʼ para gudxiteʼ ni. Nécaxa guyuuladxeʼ guireeniáʼ ca xhamiguaʼ ne gatigá gueeʼ ti cerveza, peru qué ñuu dxi ñacaʼ drogar o ñacaʼ ti binni güeʼ. Ni jma bisaca para naa nga deporte de tenis que.

 Dxi gupaʼ 17 iza bineʼ participar lu campeonatu stiʼ ATP. a Bineʼ ganar stale de laacani ne zaqué gucaʼ famoso ndaaniʼ xquidxeʼ. Dxi gupaʼ 22 iza gucaʼ tobi de ca 50 jugador ni jma galán gudxite tenis lu guidubi Guidxilayú.

 Guiráʼ ladu bineʼ viajar casi ti jugador profesional pur stale iza. Binebiaʼyaʼ caadxi lugar sicarú, peru laaca bidieeʼ cuenta nuu stale guendanagana casi guendaridinde, cubaʼ binni droga ne modo cayuni contaminárcabe medioambiente. Casi dxi guyuudu Estados Unidos gúdxicabe laadu cadi chuudu caadxi lugar de guidxi que purtiʼ nabé peligroso cani. Nabé triste guyuaaʼ pur guiráʼ ngue. Nécaxa gucaʼ dedicar xiixa ni nabé guyuuladxeʼ peru ra ziluxe dxi runeʼ sentir nuuruʼ xiixa ni cayaadxaʼ naa.

 Xnoviaʼ, Sanna, bizulú biindaʼ Biblia né ca testigu stiʼ Jehová. Bidxagayaaʼ ora gunnaʼ riuuláʼdxibe gápabe religión, ngue runi qué nucueezaʼ laabe de nicaabe estudiu que. Bichaganadu lu iza 1990 ne ti iza despué guyuunísabe. Naa qué ñapaʼ religión, peru bineʼ cré nuu ti Dios. Rietenalaʼdxeʼ nabé biindaʼ jñaabiidaʼ Biblia ne dede bisiidiʼ naa guneʼ orar.

 Ti dxi, ti guendaxheelaʼ de Testigu biʼniʼ invitarcaʼ naa ne Sanna ra lídxicaʼ. Ne Kari, xheelaʼ hermana que guniné naa de ca profecía ni zeeda lu Biblia de «ca últimu dxi» (2 Timoteo 3:1-5). Nabé bidxagayaaʼ ni, purtiʼ zaqué bidieeʼ cuenta xiñee cayaca stale cosa feu lu Guidxilayú riʼ. Dxi que maʼ qué ninírudu de religión. Peru qué nusaana de niniʼné Kari naa de cani rusiidiʼ Biblia. Guiráʼ ni caziideʼ que, biiyaʼ biaʼsi cani. Cumu nabé nuu xhiiñaʼ ne rireeʼ de viaje la? qué rándapeʼ ridúʼyadu. Peru neca zaqué, qué ñuu dxi niree Kari gana. Rucaabe carta ra nuaaʼ para guicábibe ca pregunta ni runeʼ laabe ora ruundanebe naa Biblia. Biiyaʼ biáʼsipeʼ modo ricabi Biblia ca pregunta ni runi binni lu xquendanabani. Chaʼhuiʼ chaʼhuiʼ bieneʼ xi tema napa Biblia: Reinu stiʼ Dios zuni cumplir guiráʼ ni maʼ gudixhe ique Dios. Biziideʼ, Jehová nga lá Dios, ne ra biiyaʼ guiráʼ ni bíʼnibe pur laanu guizáʼ gucaneni naa (Salmo 83:18). Ni jma bidxagayaaʼ nga ora gunnaʼ de rescate, purtiʼ bisihuínnini nadxii Dios laanu ne cadi para si guni cumplirbe ley stibe (Juan 3:16). Ne laaca biziideʼ zanda gacaʼ xhamiguaʼ Dios ne guibaneʼ sin chuʼ dxi gateʼ ndaaniʼ ti paraísu (Santiago 4:8). Pur ngue guníʼ iqueʼ: «¿Ximodo zanda gusihuinneʼ cudieeʼ xquíxepeʼ Dios yaʼ?».

 Guníʼ iqueʼ xi cayuneʼ né xquendanabaneʼ. Lu Biblia biziideʼ jma nayecheʼ riuu binni ora gudii de ni napa ne bineʼ sentir deseu de guinieniaʼ binni de cani caziideʼ (Hechos 20:35). Cumu dxiiñaʼ stinneʼ nga gacaʼ deportista profesional la? ngue runi riuaaʼ fuera de ra lidxeʼ 200 dxi lu ti iza, purtiʼ riaaʼ lu ca campeonatu que. Rinanda familia stinneʼ naa guiráʼ ra chaaʼ pur dxiiñaʼ napaʼ que. Peru bidieeʼ cuenta caquiiñeʼ guchaaʼ.

 Nannaʼ pa gusaanaʼ deporte que pur religión la? guirutiʼ tu ziene ni. Peru oportunidad de gunebiaʼyaʼ Jehová ne guibaneʼ sin chuʼ dxi gateʼ, ngue nga jma risaca para naa que intiica premiu ni ñuneʼ ganar lu deporte de tenis que; ngue runi bieneʼ xi naquiiñeʼ guneʼ. Gudixheʼ iqueʼ maʼ cadi gulabeʼ ni guiníʼ xcaadxi. Ngue nga decisión stinneʼ. Ti textu stiʼ Biblia ni gucané naa guneʼ huantar presión que nga Salmo 118:6, ra ná: «Jehová nuuné naa; qué zadxibediáʼ. ¿Xi zanda guni binni naa yaʼ?».

 Ca dxi que, caadxi de cani runi apoyar deporte bí’nica’ naa ti oferta galán ni zacané naa gacaʼ dedicar dxiiñaʼ que, ne guibaneʼ sin chuaaʼ xizaa pur stale iza. Peru naa maʼ gucuaaʼ ti decisión. Bineʼ rechazar oferta que ne bisaanaʼ de quiteʼ lu ca campeonatu stiʼ ATP. Bineʼ seguir ne estudiu stinneʼ de lu Biblia ne guyuaanisaʼ 2 stiʼ Julio iza 1994 casi testigu stiʼ Jehová.

 Qué nuyube’ Dios purtiʼ si bizaacaʼ xiixa desgracia ne laaca qué ñacaʼ ti binni ni cuyubi si ni dxandíʼ. Guníʼ iqueʼ maʼ nabaneʼ galán ne maʼ gastiʼ cayaadxaʼ naa. Peru málasi bidieeʼ cuenta, casi ora cabeza si ni dxandíʼ stiʼ Biblia ca guidxelaʼ laa ne zaqué gunnaʼ nuu xi pur nabáninu. Qué lica niníʼ iqueʼ pa jma galán nibaneʼ yanna. Maʼ tobi si nuu familia stinneʼ. Ne rudieeʼ xquíxepeʼ purtiʼ chonna de ca xiiñeʼ yenándacaʼ ejemplu stinneʼ, cadi casi deportista, sínuque purtiʼ gúcacaʼ xpinni Dios.

 Riguíteruaʼ tenis. Huayuneʼ dxiiñaʼ de entrenador ne nacaʼ administrador ndaaniʼ ti club de tenis. Zacá randa runeʼ ganar bueltu para guibaneniaʼ familia stinneʼ ca iza riʼ. Peru yanna, maʼ qué risaca deporte ca para naa. Dxiqué bineʼ entrenar stale hora lu semana para gacaʼ ti jugador ni jma galán riguite. Yanna maʼ nacaʼ precursor ne riquiiñeʼ tiempu stinneʼ para gacaniáʼ xcaadxi binni gunibia’ca’ ne gúnicaʼ ni ná ca principiu stiʼ Biblia, ni gucané naa bichaaʼ. Ni jma risaca para naa nga gacaʼ xhamiguaʼ Jehová ne guinieniaʼ binni de ca promesa galán ni zeeda, nga nga ni jma rusiecheʼ naa (1 Timoteo 6:19).