Biniiseʼ ndaaniʼ ti familia católicu ndaaniʼ guidxi Rochester (Nueva York). Dxi napaʼ xhono iza, bisáʼbixheelaʼ bixhozeʼ ne jñaaʼ, ngue runi gulezaniáʼ jñaaʼ ne ca bizanaʼ ne bicheʼ ndaaniʼ ti yoo ra ribeza binni pobre. Ne ca fin de semana, riaa ra nuu bixhozeʼ laa nabeza ti lugar jma galán. Ora ruuyaʼ xi guiráʼ runi jñaaʼ para gusiniisi xhoopaʼ xiiñiʼ stubi, guníʼ iqueʼ gaca ricu para gacaniáʼ laa.

 Cumu racalaʼdxiʼ bixhozeʼ gacaʼ ti binni risaca la? biyúbibe modo guneʼ estudiar ndaaniʼ ti universidad nabé risaca. Guyuuladxeʼ guneʼ estudiar ngue runi gucuá laʼyaʼ ra scuela que. Gunabaʼ Dios gacané naa guneʼ ganar stale bueltu ne gacané naa guibaneʼ nayecheʼ. Bineʼ sentir zaqué nga cacábibe oración stinneʼ. Gaayuʼ iza bineʼ estudiar administración hotelera, derecho mercantil ne economía empresarial ne laaca runeʼ dxiiñaʼ ndaaniʼ ti hotel ne casino ni nuu Las Vegas (Nevada).

 Dxi napaʼ 22 iza, mápeca runeniaʼ binni ni naca vicepresidente stiʼ ti hotel ne casino dxiiñaʼ. Guiráʼ binni biiyaʼ naa casi ti binni ricu ne tuuxa ni ribeendú ni galán. Gudahuaʼ guendaró de ni jma galán ne güeʼ vinu ne licor de ni jma caru. Sicaríʼ gudxi ca binni ni bineniaʼ dxiiñaʼ naa: «Cadi guiaandaʼ lii ni jma risaca nga gapa binni bueltu». Gúdxicabe naa zaqué purtiʼ riníʼ íquecabe caquiiñeʼ gapa binni bueltu para guibani nayecheʼ.

 Ra dxiiñaʼ ni runeʼ que napa xidé guneʼ tender stale hombre ne gunaa ni guizáʼ napa bueltu ni rié Las Vegas para quiteʼ apuesta. Guizáʼ napa ca binni que bueltu peru cadi nabánicaʼ nayecheʼ. Ne naa laaca cadi nabaneʼ nayecheʼ. Ra jma runeʼ ganar stale bueltu la? jma ridxagaʼ ne qué randa raseʼ. Guníʼ iqueʼ pur gana si nabaneʼ ne biree gana modo nabaneʼ que. Rietenalaʼdxeʼ bineʼ orar Dios ne gunabaʼ laa gacané naa guibaneʼ nayecheʼ.

 Tiempu que, maʼ testigu stiʼ Jehová chupa de ca bizanaʼ ne nabézacaʼ Las Vegas. Neca qué riuuladxeʼ guundaʼ ca publicación stícabe, bidieeʼ lugar guʼndanécabe naa Biblia stinneʼ. Ne laaca biindaʼ ni stubeʼ. Ndaaniʼ Biblia stinneʼ dieʼ naxiñáʼ ca diidxaʼ guníʼ Señor Jesucristu. Cumu nanna ca bizanaʼ nabé runeʼ respetar Jesús la? ngue runi jma guniʼnécabe naa de ca ni guniʼbe.

 Lu Biblia biindaʼ stale cosa ni nabé bidxagayaaʼ. Casi tobi de laani nga ra guníʼ Jesús: «Ora guni orarluʼ, cadi guiniʼluʼ ngueca ca ngueca casi runi binni de xcaadxi nación, purtiʼ riníʼ íquecaʼ zucaadiaga Dios laacaʼ tisi riniʼcaʼ stale diidxaʼ» (Mateo 6:7). Maʼ napa tiempu bidii ti sacerdote naa ti fotohuiiniʼ ra cá imagen stiʼ Jesús ne gúdxibe naa pa guiniéʼ chii padrenuestro ne chii avemaría zudii Dios naa guiráʼ bueltu ni guinabaʼ laa. Peru pa guiniéʼ ngueca ca ngueca lu ca oración ni guneʼ, ¿ñee cadi ngue nga ni guníʼ Jesús cadi naquiiñeʼ gúninu la? Laaca biindaʼ ndaaniʼ Biblia ca diidxaʼ ni guníʼ Jesús: «Cadi gábitu padre guirutiʼ lu guidxilayú riʼ, purtiʼ tobi si nga Padre stitu ni nuu guibáʼ» (Mateo 23:9). Ngue runi, guníʼ iqueʼ: «¿Xiñee laadu ca católicu rábidu padre ca sacerdote?».

 Óraruʼ biindaʼ carta stiʼ Santiago lu Biblia, guníʼ iqueʼ xi cayuneʼ né xquendanabaneʼ. Santiago bicaa lu capítulo 4 versículo 4: «¿Ñee qué gánnatu pa gaca xhamígutu guidxilayú cayácatu enemigu stiʼ Dios la? Nga runi, tutiica gacalaʼdxiʼ gaca xhamigu guidxilayú maʼ cayaca enemigu stiʼ Dios» (Santiago 4:4). Ne jmaruʼ si bidxagayaaʼ ni ná lu versículo 17: «Pa nuu tuuxa nanna guni ni jneza, peru qué runi ni la? maʼ cuchee». Ngue runi, gunieniaʼ guiropaʼ bizanaʼ ne gudxeʼ laacaʼ chigusaanaʼ dxiiñaʼ ni napaʼ que. Purtiʼ maʼ qué racalaʼdxeʼ guibaneʼ lade binni ni ruyubi gapa stale bueltu ne ni riguite apuesta.

 Racalaʼdxeʼ chuaaʼ jma gaxha de Dios ne chuaaʼ tobi si ne jñaaʼ ne bixhozeʼ, ca bizanaʼ ne ca bicheʼ. Peru caquiiñeʼ cueeʼ tiempu para guneʼ ni. Ngue runi bisaanaʼ de guneʼ caadxi cosa neca guca ni nagana. Maʼ qué ninaʼyaʼ nicaaʼ dxiiñaʼ ni cudiicabe naa ndaaniʼ ca hotel que ne ndaaniʼ ca casino que. Dede gúdxicabe naa zaguíxecabe naa chonna biaje jma de biaʼ runeʼ ganar que. Peru despué de bineʼ orar Dios, gudixheʼ iqueʼ maʼ qué zuneʼ dxiiñaʼ que. Bisaanaʼ dxiiñaʼ que ne yebieeniaʼ jñaaʼ, ra lídxibe bineʼ chaahueʼ ti lugar ra ganda guiaanaʼ. Ne dxiiñaʼ bineʼ nga bineʼ imprimir carta ra ricá guendaró ni rutoo ca restaurán.

 Neca biiyaʼ modo cayacané Biblia naa guicaaʼ decisión jneza peru qué naʼyaʼ chaaʼ reunión ni runi ca testigu stiʼ Jehová. Ti biaje gunabadiidxaʼ ca bizanaʼ naa pa qué riuuladxeʼ ni rusiidiʼ ca Testigu. Para bicabeʼ laacaʼ: «Ni qué riuuladxeʼ nga, ruxheleʼ Jehová, Dios stitu ca familia. Laatu qué runi celebrartu lanibidóʼ ne Navidad naa dxi ca si nga zanda chuaaniaʼ laatu juntu». Bizulú tobi de ca bizanaʼ que cayuunaʼ ne gudxi naa: «Laga xcaadxi dxi ca yaʼ, ¿paraa nuuluʼ? Siempre ribézadu lii guidubi iza, peru lii ora si Navidad ne lanibidóʼ nuuluʼ gueedaluʼ ne cadi purtiʼ riale de ndaaniʼ ladxidoʼloʼ gueeduʼ». Yendá ca diidxaʼ gudxi bizanaʼ naa dede ndaaniʼ ladxiduáʼ ne bizuluáʼ cayuunaniaʼ laabe.

 Bidieeʼ cuenta nadxii ca Testigu ca familia sticaʼ ne rizaaláʼdxicaʼ laacabe, ngue runi bizuluáʼ guyaaʼ reunión. Raqué binebiaʼyaʼ Kevin, ti hermanu ni nanna de Biblia ne napa stale experiencia ne bizulú bidii naa estudiu.

 Biiyaʼ nabani Kevin ne xheelaʼ ne ca cosa ni caquiiñesicaʼ purtiʼ racaláʼdxicaʼ iquiiñecaʼ tiempu sticaʼ para gacanecaʼ xcaadxi binni guiziidiʼ de lu Biblia. Laaca runi ahorrarcabe para chécabe África ne Centroamérica para gacanécabe cuiʼ edificiu de sucursal stiʼ ca Testigu stiʼ Jehová. Rihuinni nadxiicabe ne dxandíʼ nabánicabe nayecheʼ. Naa laaca racalaʼdxeʼ guibaneʼ zaqué.

 Ti dxi biluíʼ Kevin naa ti videu ra rihuinni pabiáʼ nayecheʼ nabani ca misioneru. Ngue runi, gudixhe iqueʼ gacaʼ misioneru. Xhoopaʼ beeu de cayuneʼ estudiar Biblia guyuaanisaʼ, lu iza 1995. Zaqué beeda gacaʼ ti testigu stiʼ Jehová ne bisaanaʼ de guinabaʼ Dios guni naa ricu. Yanna ni rabeʼ laabe nga: «Cadi guʼnuʼ naa pobre nin ricu» (Proverbios 30:8).

 Yanna huaxa dxandíʼ ricu naa, peru cadi purtiʼ napaʼ stale bueltu, sínuque purtiʼ nuaaʼ gaxha de Dios. Naa ne Nuria, xheelaʼ, huayuni servirdu de misioneru Panamá ne México. Binebiaʼyaʼ laabe Honduras. Maʼ biiyaʼ dxandíʼ ca diidxaʼ ni zeeda lu Biblia: «Ndaayaʼ stiʼ Jehová nga ni runi binni ricu, ne ora gudiibe ni qué redaneni yuubaʼ» (Proverbios 10:22).