Lu iza 2017 guyé 12 testigu stiʼ Jehová ti guidxihuiiniʼ ni láʼ Costa de los Mosquitos, ni nuu Nicaragua, ne biʼniʼ viajárcarbe lu ti barcu ni láʼ Sturi Yamni. Sicaríʼ guníʼ Stephen, tobi de ca hermanu ni guyé lu barcu que: «Guyuudu raqué para cuʼdu gana grupu huiiniʼ de hermanu de guidxi que, ne gacanedu laacaʼ gaca predicar ca noticia galán lu territorio sticaʼ».

 Biree ca 12 Testigu riʼ de Laguna de Perlas, gudíʼdicabe Río Grande de Matagalpa ne yendácabe ti guidxihuiiniʼ ni láʼ La Cruz de Río Grande, biaʼsi biʼniʼ viajárcabe 200 kilómetru. Qué lica niníʼ ique ca hermanu riʼ pabiáʼ zacané ca noticia galán stiʼ Reinu ca binni de guidxi que. Despué de 12 hora, yendácabe ra zécabe que. Né stale guendanayecheʼ bidxaagalú xhoopaʼ Testigu de guidxi que laacabe.

 Gueelaʼ yendácabe que, guizáʼ reciu biaba nisaguié ne qué nindaa bidxaa guiiguʼ ni láʼ Río Grande de Matagalpa. Ne cumu chupa gubidxa qué ñaanadxí nisaguié que la? biree guiiguʼ que ne bilaahua Yoo stiʼ Reinu ne lidxi ca binni ni nabeza guidxihuiiniʼ La Cruz. Ca hermanu ni yendá guidxi que gucanecaʼ ca binni que guireecaʼ de ra lídxicaʼ. Stale de laacabe yeguiaanacabe chupa gueelaʼ ra lidxi ti hermana ni napa ti yoo de chupa pisu.

 Qué nindaa, gunabaʼ presidente stiʼ guidxi La Cruz que ca Testigu gutiiñecaʼ barcu sticaʼ purtiʼ laani jma naguidxi ni para chigacanecaʼ xcaadxi guidxihuiiniʼ ra nuu binni ni gucaná. Né stale guendanayecheʼ gucané ca Testigu riʼ laacabe.

 Sti dxi siadóʼ que biree chonna hermanu Testigu yenecaʼ ti grupu de binni para gacanecaʼ. Stephen Bizeeteʼ: «Cadi casi ziuudu gudídidu guiiguʼ que purtiʼ né ni stale yaga ne nuu stale remolinu luni ne nagueenda cuxooñeʼ nisa que». Peru neca zaqué gunda yendá ca hermanu riʼ ne gucanécabe chonna guidxihuiiniʼ.

 Cumu nabé nagana ra cadiʼdiʼ ca binni que la? caquiiñecabe tu quixhedxí ladxidóʼcabe, ngue runi guluu guionnaʼ Testigu que gana laacabe. Laaca gudiiziʼ ca hermanu que revista ¡Despertad! de 2017, ni láʼ: «Cuando golpea un desastre. Qué hacer para sobrevivir». Ngue peʼ nga información ni caquiiñeʼ ca binni que.

 Nga runi, guizáʼ bidiicabe xquixe peʼ ca Testigu pur gucanecaʼ laacabe ne purtiʼ biquiiñecaʼ Biblia para quixhedxicaʼ ladxidóʼcabe. Caadxi binni guníʼ: «Guyuucabe dispuestu gacanécabe laadu ora peʼ cadídidu ra nagana». Ne xcaadxi bizeeteʼ: «Dxandíʼ nadxiicabe binni». Ra biʼyaʼ ca binni que modo gucané ca Testigu ca hermanu sticaʼ ne laacabe, stale tu laa guyuu dispuestu gucaadiaga ni zeeda lu Stiidxaʼ Dios.