Ca testigu stiʼ Jiobá nápacaʼ 15 sucursal ni runi imprimir guiʼchiʼ lu guidubi Guidxilayú. Tobi de laacani nuu Europa central ne riaana ni ndaaniʼ ti guidxihuiiniʼ láʼ Selters Alemania, ne nuu ni lu ti región ni láʼ Steinfels ni riníʼ «guié dani» lu diidxaʼ Alemán.

Gudíxhecabe chonna gubidxa para chigunibiáʼ binni sucursal riʼ, guca ni 23 hasta 25 de mayo de 2014, ne guyé ca vecinu, ca empresariu ne ca xaíque guidxi. Ni biʼniʼ ca testigu que gulee lacaʼ ni «Treinta iza ndaaniʼ guidxi Selters» purtiʼ guca inaugurar ni 21 de abril de 1984.

Jma de 3,000 binni ni guca invitar, guyecaʼ yegunibiaʼcaʼ sucursal riʼ. Alcalde de lugar que, ni maʼ ziné casi treinta iza de huayuniné ayuntamientu dxiiñaʼ, guníʼ: «Aque galán biʼniʼ ca testigu stiʼ Jiobá biʼniʼ invitarcaʼ laadu bedagunibiaʼdu sucursal sticaʼ. Rietenaladxeruáʼ, nabé bidxagayaadu pabiáʼ nagueenda modo gurí sucursal de Steinfels, lu ca iza 1979 hasta 1984

Guca ti exposición ni láʼ: «Xquidxi Jiobá ni nuu Europa central», ne laani cusiene ni xi huazaaca lu 120 iza de historia ni maʼ ziné ca testigu lu región que. Ne maʼ qué nindísacabe exhibición riʼ, bisaanacabe ni ndaaniʼ sucursal riʼ.

Laaca biiyaʼ ca binni ni guyé ndaaniʼ sucursal que caadxi Biblia ni rutopalúcabe, ne nabé risaca cani. Lade cani nuu tobi de iza 1534 ne biree guidubi lu diidxaʼ alemán, laaca nuu ti ndaa Biblia ni né 12 idioma juntu stiʼ Elias Hutter, ni biree lu iza 1599. Ne bicaacabe caadxi cuadru ne guluucabe videu ni cusihuinni pabiáʼ racané ca conseju stiʼ Biblia binni ca dxi riʼ.

Gudíxhecabe chupa modo zanda saʼ binni para gunibiáʼ ndaaniʼ sucursal riʼ, raqué biiyaʼ ca invitadu que ximodo runi jma de ti mil binni nabeza ndaaniʼ sucursal que dxiiñaʼ ne modo nabánicaʼ. Primé modo que biree lá ni «Ximodo nabánidu», raríʼ biiyacabe ca cuartu stiʼ chupa chonna de cani nabeza raqué, gudócabe ra comedor stiʼ ni, ne guzácabe lade ca jardín napa ni. Tobi de ca invitadu que guníʼ: «Nabé sicarú lugar riʼ».

Sti modo que biree lá ni «Producción», raqué biiyacabe ra raca imprimir, ra raca encuadernar libru ne ra nuu Departamento de Envíos. Gunda biiyaʼ ca binni que laapecaʼ ximodo raca ca publicación ni riree lu Biblia ne ruseendacabe cani ra nuu jma de 50 guidxi. Sicaríʼ guníʼ ti hombre: «Qué ñuu dxi niníʼ iqueʼ pa nuu ca testigu ndaaniʼ stale guidxi. Rindá ca libru stícabe ca lugar jma zitu ni nuu lu Guidxilayú. Dxandipeʼ ti milagru ndiʼ, purtiʼ puru si binni ni qué riaxa runi cani».

Ti cosa ni nabé bidxagayaa binni nga ni bíʼyacabe de jw.org, sitiu ni napa ca testigu stiʼ Jiobá lu Internet. Cásica cani nahuiiniʼ zaqueca cani huaniisi biiyacaʼ caadxi presentación ne videu ne bisiénecabe laacaʼ stale de cani gunabadiidxacaʼ.

Ra biiyaʼ chaahuicabe ximodo runi ca Testigu dxiiñaʼ lu guidubi Guidxilayú, stale de laacabe nabé nayecheʼ bibiguétacaʼ ne caniʼcaʼ pabiáʼ bidxagayaacaʼ dxiiñaʼ raca ndaaniʼ sucursal riʼ. Tobi de ca invitadu que guníʼ: «Cadi huaʼ jneza riníʼ iqueʼ de ca Testigu, yanna huaxa maʼ bichaaʼ modo riníʼ iqueʼ de laacabe». Ne ti gunaa caníʼ cada ratu: «Cani bidúʼyadu raríʼ rucaa cani laadu cadi guiníʼ íquedu mal de ca Testigu».